အမျိုးသမီးများနှင့်သံဓါတ်
‘သံဓါတ်’
လူတိုင်းနဲ့ရင်းနှီးပြီးသား စကားလုံးလေး။ ဒီနေ့ကတော့ အဲ့သံဓါတ်ဆိုတာရဲ့ အကြောင်းလေးကိုနည်းနည်းလေး ပြန်နွှေးပေးချင်တာ။ ဒီတစ်ခေါက်ကတော့ အမျိုးသမီးတွေအတွက်အဓိကထားပြောချင်တာပေါ့။ သိကြပြီးဖြစ်တဲ့အတိုင်း သံဓါတ်ဟာလူတို့အတွက်မရှိမဖြစ်လိုအပ်တဲ့ သတ္တုဓါတ်တစ်မျိုး။ ဘာလို့မရှိမဖြစ်လဲဆိုတော့ ခန္ဓာကိုယ်ရဲ့ဆဲလ်တွေအတွက်လိုအပ်တဲ့အောက်ဆီဂျင်နဲ့ အာဟာရကိုသယ်ဆောင်ပေးတဲ့ သွေးဆဲလ်လေးတွေထုတ်လုပ်ဖို့အတွက် ၎င်းကမရှိမဖြစ်မို့လို့ပါ။
အမျိုးသမီးတွေအတွက် သံဓါတ်ကဘာလို့အရေးပါတာလဲ???
ယောကျာ်းမိန်းမ မရွေးသံဓါတ်ဟာအရေးပါပါတယ်။ အမျိုးသမီးတွေမှာဘာလို့ပိုပြီးအရေးပေးပြောရသလဲဆိုရင်တော့ ၎င်းတို့ဟာလစဉ်ရာသီလာချိန်မှာသံဓါတ်ဆုံးရှုံးရတာရယ်၊အဲ့ဆုံးရှုံးသွားတာကို ပြန်ဖြည့်ဖို့လောက်ငှအောင်မစားမိကြတာရယ်ကြောင့် ၎င်းတို့ဟာ သွေးအားနည်းရောဂါကိုပိုမိုခံစားရလေ့ရှိလို့ပဲ ဖြစ်ပါတယ်။
အခြားဘယ်အချိန်မှာရော သံဓါတ်ကိုပိုဂရုစိုက်စားသုံးပေးရမလဲ???
ကိုယ်ဝန်ဆောင်ချိန်ပါ၊၊ ကိုယ်ဝန်ဆောင်ချိန်မှာ မိခင်အတွက်ရော၊သန္ဓေသားကြီးထွားဖွံ့ဖြိုးမှုမှာပါ သံဓါတ်က အရမ်းအရေးပါလို့ပဲဖြစ်ပါတယ်။
သံဓါတ်ကိုခန္ဓာကိုယ်ရဲ့လိုအပ်တဲ့ပမာဏပြည့်အောင်မစားရင် ဘာတွေဖြစ်မလဲ???
သံဓါတ်မပြည့်ဝတဲ့အခါမှာ မောပန်းနွမ်းနယ်ခြင်း၊အစားအသောက်ပျက်ခြင်း၊ရင်တုန်ခြင်း၊မူးဝေခြင်းစတဲ့ရောဂါလက္ခဏာတွေဖြစ်ပေါ်တတ်ပါတယ်။
သံဓါတ်နည်းတဲ့ရောဂါလက္ခဏာတွေပေါ်လာရင် ဘာလုပ်ရမလဲ???
အထက်ပါရောဂါလက္ခဏာတွေပေါ်လာရင် ဆရာဝန်နှင့်ပြသပြီး ဆရာဝန်ညွှန်ကြားတဲ့အတိုင်းစမ်းသပ်စစ်ဆေးမှု၊ကုသမှုတွေကိုလုပ်ဆောင်ရမှာဖြစ်ပါတယ်။
သံဓါတ်ပေါကြွယ်ဝတဲ့အစားအစာတွေက ဘာတွေလဲ???
သံဓါတ်ပြည့်ဝတဲ့ အစားအစာတွေကတော့-
၁။အသား(အမဲ၊ကြက်၊ဝက်၊သိုး၊ငါး စသည်)
၂။အသည်းအမျိုးမျိုး
၃။ဥ အမျိုးမျိုး
၄။အသီးအနံှများ(ဂေါ်ဖီပန်း၊ပန်းဂေါ်ဖီစိမ်း၊ဂေါ်ဖီ၊ပဲအမျိုးမျိုး)
၅။အခွံမာသီးများ စသည်တို့ဖြစ်ပါတယ်။
သံဓါတ်စုပ်ယူမှုကောင်းအောင်ဘာတွေလုပ်ရမလဲ???
၁။ဗီတာမင်စီဟာ အစာအိမ်အူလမ်းကြောင်းမှသံဓါတ်စုပ်ယူမှုကိုအားကောင်းစေတာကြောင့် ၎င်းနှင့်သံဓါတ်ပေါကြွယ်ဝတဲ့အစားအစာတွေကိုတွဲဖက်စားသုံးပေးသင့်ပါတယ်။
၂။လက်ဖက်ရည်၊ကော်ဖီ၊ဝိုင်နီတို့ဟာ သံဓါတ်စုပ်ယူမှုကိုလျှော့ကျစေတာကြောင့် အစားအစာနဲ့ ၎င်းတို့ကိုတွဲပြီးမစားသင့်ပါဘူး။
ဒီလောက်ဆိုရင်တော့ အမျိုးသမီးတွေမှာသံဓါတ်ရဲ့အရေးပါပုံကို ခန့်မှန်းမိကြပြီထင်ပါတယ်။
အမျိုးသမီးအားလုံး သံဓါတ်ပြည့်ဝ၊လှပစေကြောင်း ဆုမွန်တောင်းလျက်။
dr.ye lwin mm