ဘယ်အချိန်မှာ ကလေးသွားတိုက်ဆေးကနေ လူကြီးသွားတိုက်ဆေးပြောင်းတိုက်ပေးရမလဲ
အခုခေတ်မှာ ကလေးသွားတိုက်တံနဲ့ ကလေးသွားတိုက်ဆေးလေးတွေ အလွယ်တကူရနိုင်နေပြီမို့ မိဘအများစုဟာ ကလေးငယ်တွေကို အဆိုပါ သွားတိုက်တံ သွားတိုက်ဆေးလေးတွေ အသုံးပြုပြီး သွားသန့်ရှင်းရေး ပြုလုပ်ပေးတတ်ကြပါတယ်။ ဒီလိုမိဘတွေက မေးလာတတ်တဲ့ မေးခွန်းအများစုက ဘယ်အချိန်မှာ လူကြီးသွားတိုက်ဆေး ပြောင်းတိုက်ပေးရမလဲ ဆိုတာပါပဲ။ အလွယ်ဖြေရရင်တော့ လူကြီးသွားပေါက်တဲ့အချိန်မှာ လူကြီးသွားတိုက်ဆေးပြောင်းပေးနိုင်ပါပြီလို့ ဖြေရပါမယ်။
လူကြီးသွားဟာ ပျမ်းမျှ အသက် ၆နှစ်အရွယ်မှာ စပေါက်ပါတယ်။ ကလေးသွားလေးတွေရဲ့ နောက်ဆုံးမှာ ပေါက်လာတာပါ။ လူကြီးသွားတွေရဲ့ နာမည်နဲ့ခေါ်ရင် ပထမအံသွားကြီး (First Molar) ပါ။ အဆိုပါလူကြီးသွားတွေဟာဆုံးရှုံးသွားရင် နောက်ထပ်အစားထိုးစရာမရှိတော့တာမို့ မိဘတွေ အနေနဲ့ မိမိတို့ ရင်သွေးငယ်တွေရဲ့ အသက်၆နှစ်အရွယ်မှာ သေချာလေးဂရုတစိုက်နဲ့ စောင့်ကြည့်သွားတိုက်စေဖို့လိုပါတယ်။ ကလေးသွားနဲ့မှားပြီး မေ့လျော့ပေါ့ဆခြင်းခံရတဲ့ အဆိုပါ ပထမအံသွားကြီးဟာ သွားပိုးအစားဆုံးနဲ့ အနှုတ်ပစ်ခံရဆုံးသွားတစ်ချောင်းဖြစ်တာမို့ သေချာလေးဂရုစိုက်ထိန်းသိမ်းပေးရပါမယ်။
Dr. သုဈာန်