ဝက်ခြံပေါက်ပြီး အမာရွတ်ထင်မကျန်ခဲ့စေဖို့။
လူတိုင်းစိတ်ဝင်စားမယ့်အကြောင်းအရာလေးပါ၊ဝက်ခြံပေါက်ပြီး အမာရွတ်တွေမကျန်ခဲ့အောင်ဘယ်လိုလုပ်ကြမလဲတဲ့။ ဝက်ခြံတွေဟာပေါက်တဲ့အချိန်မှာဒုက္ခပေးသလို၊ပျောက်သွားတဲ့အခါမှာလဲ အမာရွတ်တွေထင်ကျန်ရစ်ပြီးဒုက္ခအမျိုးမျိုးပေးတတ်ပါတယ်။ ဒီလိုမျိုးဝက်ခြံထွက်ပြီး အမာရွတ်တွေထင်မကျန်ရစ်အောင် ဘယ်လိုပြုလုပ်နိုင်မလဲဆိုတာလေးတွေကို ပြောပြပေးပါ့မယ်။
လုပ်ဆောင်ရမယ့်နည်းလမ်းတွေကတော့-
၁။ဝက်ခြံကိုစောနိုင်သမျှစောစောကုပါ။ ဝက်ခြံစထွက်ပြီဆိုတာနဲ့ ဆရာဝန်နှင့်ပြသသင့်ပါတယ်။ စောစောကုသခြင်းဟာ အရေပြားထိခိုက်ပျက်စီးမှုကိုနည်းစေပြီး အမာရွတ်ဖြစ်ခြင်းကိုလဲသက်သာစေနိုင်ပါတယ်။
၂။ဝက်ခြံပေါက်ထွက်သွားပြီဆိုတာနဲ့ ဆရာဝန်နှင့်ပြသသင့်ပါတယ်။ အရေပြားဟာ ပေါက်ပြဲသွားပြီဆိုတာနဲ့ ပြန်လည်ပြုပြင်ခြင်းလုပ်ငန်းကိုသဘာဝအတိုင်းစပါတယ်။ ဒီအခါမှာ
စိတ်ထင်ရာဆေးလိမ်းဆေးသောက်ခြင်းဟာ အနာကျက်မှုကိုအနှောင့်အယှက်ဖြစ်စေပြီး အမာရွတ်ကိုလဲပိုမိုဖြစ်ပေါ်စေနိုင်ပါတယ်။
၃။ဝက်ခြံတွေကိုညှစ်ထုတ်ခြင်း၊ကုတ်ဖဲ့၍ထုတ်ခြင်းကိုရှောင်ပါ။ ညှစ်တဲ့ကုတ်ဖဲ့တဲ့အခါမှာအရေပြားဟာပိုမိုဒဏ်ဖြစ်ရောင်ရမ်းပြီး အနာကျက်ခြင်းကိုကြာစေရုံမက အမာရွတ်ကိုပိုမိုဖြစ်ပေါ်စေနိုင်ပါတယ်။
၄။မျက်နှာကိုပုံမှန်သန့်စင်ဆေးကြောပေးပါ။ တစ်ရက်လျှင်အနည်းဆုံး(၂)ကြိမ်နှင့် ဖုန်သဲများကပ်တိုင်း၊အဆီပြန်ချွေးထွက်များတဲ့အခါတိုင်း မျက်နှာကိုစင်ကြယ်အောင်ဆေးကြောပေးပါ။
၅။ဆေးလိပ်သောက်ခြင်းကိုရှောင်ပါ။ ဆေးလိပ်ဟာအနာကျက်ခြင်းကိုကြာစေနိုင်တာကြောင့် အမာရွတ်ကိုပိုမိုဖြစ်ပေါ်စေနိုင်ပါတယ်။
၆။ရေများများသောက်ပါ၊ကျန်းမာရေးနဲ့ညီသောအစားအစာများကိုသာစားသုံးပါ။ ရေဟာအဆိပ်အတောက်တွေကိုဖယ်ရှားပေးရုံမက အရေပြားဆဲလ်သေများကိုလဲ လျင်မြန်စွာဖယ်ရှားပေးပါတယ်။ အစားအစာမှာပါတဲ့ ဗီတာမင်နဲ့သတ္တုဓါတ်တွေကလဲ အနာကျက်ခြင်းကိုမြန်ဆန်ကောင်းမွန်စေပါတယ်။
၇။အမာရွတ်ပျောက်ဆေးများလိမ်းခြင်း။ ဆရာဝန်ညွှန်ကြားသော အရည်အသွေးစစ်မှန်စိတ်ချရတဲ့ အမာရွတ်ပျောက်ဆေးများဟာ ဝက်ခြံကြောင့်ဖြစ်ပေါ်တတ်တဲ့အမာရွတ်တွေကိုသက်သာပျောက်ကင်းစေနိုင်ပါတယ်။
အထက်ပါအချက်များကို လိုက်နာခြင်းအားဖြင့် ဝက်ခြံကြောင့်ဖြစ်ပေါ်တတ်သောအမာရွတ်များ မိမိတို့အသားအရေပေါ်ကျန်မနေခဲ့အောင်ပြုလုပ်နိုင်ပါကြောင်း ဆွေးနွေးပြောကြားလျက်။
dr.ye’lwin mm