ကိုယ်ဝန်ဆောင်ခြင်းနှင့်လိပ်ခေါင်း
ကိုယ်ဝန်ဆောင်ချိန်မှာ ခန္ဓာကိုယ်တစ်ခုလုံးမှာ အပြောင်းအလဲတွေများစွာဖြစ်ပေါ်ပါတယ်။ သွေးပေါင်၊ သွေးခုန်နှုန်းကအစ ခုခံအားအထိ တစ်ကိုယ်လုံးကစနစ်တွေက အမေကောအဆင်ပြေအောင် အပြောင်းအလဲတွေလုပ်နေတဲ့အချိန်မှာ လိုလားအပ်တာတွေကောမလိုလားအပ်တာတွေပါကြုံတွေ့လာရပါတယ်။ နဂိုကသွေးတိုးမရှိသူတွေက သွေးတိုးရောဂါရှိလာတာ၊ ဆီးချိုမရှိရာကနေ ဆီးချိုဖြစ်လာတာ၊ ရှိပြီးသားဆီချိုက ထိန်းရတာပိုခက်လာတာ စတာတွေကြုံတွေ့လာနိုင်ပါတယ်။ အဆိုပါအခြေအနေတွေမှာ လိပ်ခေါင်းလည်းပါဝင်ပါတယ်။
လိပ်ခေါင်းဖြစ်တယ်ဆိုတာ စအိုနားတစ်ဝိုက်က သွေးပြန်ကြောတွေကျယ်လာပြီး ရောင်ရမ်းပြီး သွေးတွေအိုင်လာတဲ့အခြေအနေကိုခေါ်ပါတယ်။ ကိုယ်ဝနိရှိလာတဲ့အခါ စအိုနားကသွေးပြန်ကြောတွေအနေနဲ့ သားအိမ်ရဲ့အလေးချိန်၊ ကလေးရဲ့အလေးချိန်တွေကို ထမ်းထားရသလိုဖြစ်ပြီး ဖိအားတွေများလာပါတယ်။ သွေးတွေကအပေါ်ကို ပြန်မတက်နိုင်တော့ပဲ စအိုနားမှာသွေးတွေပုံလာပါတယ်။ အဲဒီသွေးတွေက စအိုနားမှာပုံလာတဲ့အခါ လိပ်ခေါင်းဖြစ်လာပါတယ်။
နောက်တစ်ခုကတော့ ကိုယ်ဝန်ဆောင်တဲ့အခါ progesteroneဆိုတဲ့ဟော်မုန်းက ခန္ဓာကိုယ်မှာများပြားလာပါတယ်။ အဆိုပါဟော်မုန်းတွေကလည်း သွေးကြောတွေကိုပျော့ပြောင်းစေပြီး သွေးအိုင်စေနိုင်ပါတယ်။ ကိုယ်ဝန်ရှိချိန်မှာအဆိုပါဟော်မုန်းတွေက များနေတဲ့အတွက် ကိုယ်ဝန်ဆောင်ချိန်မှာ လိပ်ခေါင်းပိုဖြစ်စေနိုင်တယ်လို့ ဆိုကြပါတယ်။
လိပ်ခေါင်းရဲ့လက္ခဏာတွေကတော့ စအိုနားတစ်ဝိုက်မှာနာကျင်ခြင်း၊ ယားယံခြင်း၊ စအိုနားမှာအကြိတ်အလုံးစမ်းမိနိုင်တာ၊ နေမထိထိုင်မသာဖြစ်နိုင်တာစတာတွေဖြစ်နိုင်ပါတယ်။ နောက်ပိုင်းပိုဆိုးလာတဲ့အချိန်တွေမှာတော့ အခန့်မသင့်ရင် အထိမခံနိုင်လောက်အောင်နာကျင်လာတာ၊ လိပ်ခေါင်းထွက်နေရာကနေပြန်သွင်းလို့မရတော့တာ၊ ပြန်မဝင်တော့တာတွေပါဖြစ်နိုင်ပါတယ်။
ကိုယ်ဝန်ဆောင်ချိန်မှာလိပ်ခေါင်းထွက်တဲ့အခါ များသောအားဖြင့်တော့ ကလေးမွေးပြီးတာနဲ့သက်သာသွားသလို ပျောက်သွားနိုင်ပါတယ်။ မသက်သာရင်တော့ ဆားခါးနဲ့ဖျော်ထားတဲ့ရေထဲမှာ စိမ်ပေးရင်သက်သာနိုင်ပါတယ်။
စအိုနားတစ်ဝိုက်ကိုသန့်ရှင်းအောင်ထားခြင်း၊ မတ်တပ်အကြာကြီးရပ်တာကိုရှောင်ခြင်း၊ ရေများများသောက်ခြင်း၊ ဝမ်းမချုပ်အောင်နေခြင်းတို့နဲ့သက်သာအောင်လုပ်ပေးသင့်ပါတယ်။ မသက်သာတဲ့အခါမှာတော့ သင့်တော်တဲ့ဆေးတွေ၊ ကုသနည်းတွေကို ဆရာဝန်နဲ့တိုင်ပင်ပြီးထိရောက်အောင်ကုသသင့်ပါတယ်။
ကိုယ်ဝန်ဆောင်ချိန်မှာလိပ်ခေါင်းထွက်တယ်ဆိုတာ ဖြစ်လေ့ဖြစ်ထရှိပါတယ်။ လိပ်ခေါင်းထွက်တဲ့အခါ မိမိသဘောနဲ့လက်တည့်မစမ်းပဲ တတ်ကျွမ်းသူနဲ့ပြသပြီးကုသသင့်ပါတယ်။
Dr. ZZ