ဟယ် ဝလာလိုက်တာ မှတ်တောင်မမှတ်မိဘူး။ ဝိတ်လေးဘာလေးလျှော့ဦး။ စတဲ့ စကားတွေကို လူတိုင်းကြားဖူး ပြောဖူးကြမှာပါ။ ဝလာတယ်ဆိုသည် သာမန်အားဖြင့် ပြဿနာတစ်ခု မဟုတ်သော်လည်း အဝလွန်လာပြီဆိုလျှင်တော့ အရေးကြီးပါသည်။ အဘယ်ကြောင့်ဆိုသော် မကြာမီ ကျန်းမာရေးပြဿနာများကို ဖိတ်ခေါ်လာတော့မည် ဖြစ်သောကြောင့်ဖြစ်ပါသည်။
အဝလွန်နေသည်ကို မည်သို့သိရှိနိုင်ပါမည်နည်း။
ဘီအမ်အိုင် ဖြင့် တိုင်းတာနိုင်ပါသည်။ BMI ကို ဇယားနှင့်တကွ ဖော်ပြပေးလိုက်ပါသည်။
ခါးအရွယ်အစားကို တိုင်းတာခြင်းဖြင့် အဝလွန်သော ပုံစံကို ခွဲနိုင်ပါသည်။ ချက်ပတ်ပတ်လည် ခါးအရွယ်အစားကို တိုင်းတာရပါမည်။
• အမျိုးသားဖြစ်လျှင် ၁၀၂ စင်တီမီတာ ကျော်ပါက
• အမျိုးသမီးဖြစ်လျှင် ၈၈ စင်တီမီတာ ကျော်ပါက သွေးတိုး၊ ဆီးချိုကဲ့သို့သော ရောဂါများကို ပို၍ ဖြစ်စေနိုင်ပါသည်။
အဝလွန်နေပါက မည်သို့ဆောင်ရွက်သင့်ပါသနည်း။
အကောင်းဆုံး နည်းလမ်းမှာ အစားအသောက်နှင့် ဘဝနေထိုင်မှုပုံစံကို ကျန်းမာစေသောပုံစံအဖြစ် ပြောင်းလဲခြင်းပင်တည်း။
တစ်နေ့လျှင် လူတစ်ယောက်သည် နေ့စဉ်
• အမျိုးသားဖြစ်လျှင် ကယ်လိုရီ ၂၄၀၀
• အမျိုးသမီးဖြစ်လျှင် ကယ်လိုရီ ၂၀၀၀ ခန့် လိုအပ်ပါသည်။
• ကာယလုပ်သားများတွင် ပို၍လိုအပ်တတ်ပါသည်။
ကယ်လိုရီဆိုသည်မှာ အစားအစာတွင် ပါဝင်သော စွမ်းအင်ပမာဏကို ဆိုလိုပါသည်။ ထိုစွမ်းအင်ကို အစာအာဟာရမှ ရရှိပါသည်။သို့သော် နေ့စဉ်လိုအပ်သည်ထက် ပို၍စားသုံးပါက ပိုနေသောအာဟာရဓာတ်တို့ကို ခန္ဓာကိုယ်တွင် အဆီအဖြစ်ဖြင့် သိမ်းဆည်းထားပါသည်။ ကြာလာသောအခါ အဝလွန်လာသည်။
အသီးအရွက်၊ သစ်သီးဝလံများတွင် ကယ်လိုရီလျော့နည်းရုံ မက ကျန်းမာရေးနှင့်လည်းညီညွှတ်သောကြောင့် ဝိတ်ချနေသူများ စားသုံးရန် သင့်လျော်ပါသည်။
ထို့ကြောင့် အဝလွန်သူများသည် တစ်နေ့လျှင် ကယ်လိုရီ ၆၀၀မှ ၁၀၀၀ အတွင်းသာစားသုံးသင့်ပါသည်။
အလေးချိန်တစ်ပေါင်လျှင် ၃၅၀၀ ကယ်လိုရီနှင့်ညီမျှပါသည်။ ထို့ကြောင့် တစ်ရက်လျှင် ကယ်လိုရီ ၁၀၀၀ လျော့စားခြင်းဖြင့် တစ်ပတ်လျှင် ပျမ်းမျှ ၂ ပေါင်ခန့် ကျနိုင်ပါသည်။ သို့သော် စားသောက်သော အစားအစာတွင် အစာအုပ်စု ၃ မျိုးလုံးပါဝင်ရန်လိုအပ်ပါသည်။ လိုအပ်ပါက ဆရာဝန်နှင့်တိုင်ပင် ဆွေးနွေးပါ။
တစ်ပတ်လျှင် ၁ပေါင်မှ ၂ပေါင် အတွင်းသာ လျော့သင့်ပါသည်။
မိမိနှင့် သင့်လျော်သော ကိုယ်လက်လှုပ်ရှားအားကစား တစ်ခုခု နေ့စဉ်ပုံမှန်ပြုလုပ်ပါ။ ဆေးလိပ်၊ အရက်၊ ဘီယာ များ မသောက်သင့်ပါ။
မည်သို့သော သူများသည် ဆေးဖြင့် ကုသမှုခံယူသင့်ပါသနည်း။
• ဤသို့ ၃လ ခန့် စနစ်တကျ စားသောက် နေထိုင်သော်လည်း အလေးချိန် မကျလျှင်၊
• ဘီအမ်အိုင် ၃၀ ကျော်လျှင်
• ဘီအမ်အိုင် ၂၇ ဖြစ်သော်လည်း ရောဂါအခံ တစ်ခုခု ရှိနေလျှင် ဆရာဝန်နှင့် တိုင်ပင်ကာ ဆေးဝါးဖြင့်ကုသမှုခံယူသင့်ပါသည်။ မိမိသဘောဖြင့် ဆေးများမသောက်သုံးသင့်ပါ။
ရီချို (ဆေး-၁)