ကလေးငယ်များတွင် ခန္ဓာကိုယ်အပူချိန်ထိန်းညှိပေးဖို့ ဘယ်လိုအရေးကြီးလဲ
မွေးပြီးရက်သတ္တပတ်အနည်းငယ်အတွင်း ကလေးငယ်များတွင် ခန္ဓာကိုယ်အပူချိန်ထိန်းညှိမှုစနစ်သည်ကောင်းစွာအလုပ်မလုပ်သေးပေ။ ထို့ပြင်အပူချိန်ဆုံးရှုံးမှုကိုကာကွယ်ပေးသော အဆီပမာဏလည်းနည်းသောကြောင့် ကိုယ်ခန္ဓာအပူချိန်လျော့ကျခြင်း လျင်မြန်စွာဖြစ်ပေါ်နိုင်သည်။ အပူချိန်အလွန်အမင်းလျော့ကျခြင်းက သေဆုံးသည်အထိဖြစ်နိုင်သောကြောင့် အထူးသတိပြုရမည်။(အထူးသဖြင့် ပေါင်ချိန်မပြည့်ပဲမွေးသောကလေးငယ်များနဲ့ လမစေ့ပဲမွေးသောကလေးများတွင်ပို၍အန္တရာယ်ရှိသည်။)
ကလေးငယ်များ၏ ပုံမှန်အပူချိန်မှာ 96.8-98.6 ဖာရင်ဟိုက်အတွင်းရှိသည်။ ကိုယ်ပူချိန်တိုင်းရာတွင် ပြဒါးဆိပ်သင့်ခြင်းမဖြစ်စေရန် ဒစ်ဂျစ်တယ်စက်ဖြင့်တိုင်းလျှင်ပိုကောင်းသည်။ မွေးကင်းစကလေးငယ်များ၏ ခြေဖျား၊လက်ဖျားလေးများအေးနေလျှင် ပို၍နွေးနွေးထွေးထွေးဝတ်ဆင်ပေးသင့်သည်။ ကောင်းကောင်းအိပ်၊ကောင်းကောင်းစား၍ ဂျီမကျလျှင်လည်း ကလေးကိုယ်အပူချိန်မျှတနေကြောင်းသိရှိနိုင်သည်။
ကလေးအားရေချိုးပေးလျှင် အကာအကွယ်မရှိသောနေရာမျိုး၊ ပြတင်းပေါက်ရှိသောနေရာမျိုးတွင် မပြုလုပ်သင့်ပေ။ ထိုအရွယ်ကလေးများတွင် အပူဓာတ်ဆုံးရှုံးမှုအများစုသည် ဦးခေါင်းမှဖြစ်သည်။ ထို့ကြောင့်ရေချိုးချိန်မှလွဲလျှင် အမြဲဝတ်ဆင်ပေးသင့်သည်။ ချိုးပြီးလျှင်လည်း ခြောက်သွေ့အောင်ရေအမြန်သုတ်၍ ဦးထုပ်၊အဝတ်အစားဆင်ပေးရမည်။ အဝတ်အစားလဲပေးရန်ကလေးတင်သောနေရာကိုလည်း စောင်(သို့) အနှီးဖြင့်နွေးထွေးစေရန်ခင်းထားရမည်။ ပုံမှန်အားဖြင့် ကလေးငယ်နဲ့ မိမိတစ်ခန်းတည်းတွင်အတူရှိနေလျှင် မိမိဝတ်ထားသောအဝတ်အစားထက် တစ်လွှာပို၍ကလေးကိုဝတ်ဆင်ပေးရန်လိုအပ်ပါသည်။
မေတ္တာမွန်ဖြင့်
နွေ