သင့်မှာစိတ်ကျဝေဒနာခံစားနေရတဲ့သူငယ်ချင်းတယောက်ရှိနေပါလား?
ဒါဆိုရင်တော့သင်တယောက်ထဲမဟုတ်ပါဘူး။ အမျိုးသားစိတ်ကျန်းမာရေးအဖွဲ့အစည်းရဲ့ ခန့်မှန်းချက်အရ အမေရိကန်ရဲ့ အရွယ်ရောက်ပြီးသူ ရရာခိုင်နှုန်းခန့်က စိတ်ကျဝေဒနာကို ခံစားနေရပါတယ်။
ကမ္ဘာတဝှမ်းမှ ကလေးလူကြီး သန်း၃ဝဝခန့်ဟာစိတ်ကျဝေဒနာခံစားနေရသူတွေပဲဖြစ်ပါတယ်။ ဖြစ်ပုံဖြစ်နည်းမတူညီကြလို့ တစ်ချို့က စိတ်ကျလို့ကျမှန်းမသိဖြစ်နေတတ်ပါတယ်။
သင့်ရဲ့သူငယ်ချင်းမိတ်ဆွေကိုကြည့်ရတာ
-ဝမ်းနည်းနေတဲ့ပုံစံ
-အနာဂတ်အတွက်မျှော်လင့်ချက်မဲ့နေတဲ့ပုံစံ
-ကိစ္စတစ်ခုခုအပေါ်အဆိုးမြင်နေတဲ့ပုံစံ
-သာမာန်ထက်စကားပြောဆိုရခက်ခဲနေတဲ့ပုံစံ
-အလွယ်တကူစိတ်အနှောင့်အယှက်ဖြစ်နေတဲ့ပုံစံတွေရှိနေရင်တော့ စိတ်ကျဝေဒနာအစပြုနေပြီလို့သုံးသပ်နိုင်ပါတယ်။
နောက်ထပ်လက္ခဏာတွေအနေနဲ့ တကိုယ်ရည်သန့်ရှင်းရေးကို အလေးမထားတော့တာ၊ အိပ်စက်ချိန်ပြသနာရှိလာတာ ပုံမှန်လုပ်နေကျ အလုပ်တွေကို အာရုံမရှ်ိတော့တာ၊ ဘာကိုမှစိတ်မဝင်စားပဲသေဆုံးခြင်းကိုပဲတဖွဖွပြောနေတတ်တာမျိုးတွေလည်းဖြစ်နေတတ်ပါတယ်။
အဲ့ဒီလိုအခါမျိုးမှာလုပ်ဆောင်ပေးသင့်တာကတော့ သူပြောချင်တဲ့စကားတွေကို နားထောင်ပေးနိုင် ဖို့လိုပါတယ်။သူ့ရင်ထဲကပြောချင်နေတဲ့စကားတွေအတွက် ပိုပြီး ပြောထွက် လာဖို့ကူညီပေးသင့်သလို ဒါကဘာအဓိပ္ပါယ်ရှိလဲဆိုတာမျိုးမေးခွန်းပြန်ထုတ်ဖို့လည်းလိုပါတယ်။
ဒါ့အပြင်သူ့အတွက် အပြောင်းအလဲဖြစ်စေမယ့် အတွေးအခေါ်မျိုးတွေကိုလည်း ပြောပြပေးနိုင်ရပါမယ်။
နောက်ပြီးသူပုံမှန်လုပ်တောင်ရမယ့် စိတ်ကျဝေဒနာအတွက် ကုသရမယ့်အချိန်တွေကို ပျက်မသွားအောင် ကူညီပေးဖို့လိုပါတယ်။ သူ့ကိုဘေးကနေ စောင့်ရှောက်ကူညီပေးသင့်ပြီးဆရာဝန်နဲ့တွေ့ရမယ့်အချိန် ဆေးသောက်ရမယ့်အချိန်တွေကို မပျက်အောင် သတိထားပေးသင့်ပါတယ်။ သင်ကသူယုံကြည်ရ သူတစ်ယောက် ဖြစ်လာပြီဆိုရင်တော့သူ့ကို လူတွေကြားထဲပြန်လည်ရောက်ရှိစေဖို့ ဖြည်းဖြည်းချင်း ခေါ်ဆောင်သွားသင့်ပါတယ်။ အသင်းအဖွဲ့လေးတွေမှာ သွားရောက်ပါဝင်တာ၊ ပရဟိတတစ်ခုခုလုပ်ပေးတာ၊ ယောဂသင်တန်းလေးတွေတက်တာ၊ ငယ်သူငယ်ချင်းတွေနဲ့ မိတ်ဆုံစားပွဲလေးတွေလုပ်ပေးတာတွေက သူတို့ကို စိတ်အပြောင်းအလဲတစ်ခုဖြစ်လာစေမှာ အမှန်ပါ။
သူတို့ကိုကူညီပေးချိန်မှာ အရေးကြီးတာကတော့စိတ်ရှည်သည်းခံပေးဖို့လိုပါတယ်။
သူတို့ဟာတရက်မှာစိတ်ပျော်နေတတ်ပေမယ့် နောက်ရက်မှာတော့စိတ်အခြေအနေဆိုးရွားနေ တတ်သူတွေဖြစ်တာကြောင့်တစ်နေ့တာအတွက်ကောင်းအောင်ကြိုးစားပေးဖို့ပဲတွေးပြီးကူညီပေးသင့်ပါတယ်။
စိတ်ကျဝေဒနာဟာများသောအားဖြင့် ဝမ်းနည်းအားငယ်ခြင်းဆိုပေမယ့် ဒေါသထွက်ခြင်း၊ စိတ်ပူပန်ခြင်း၊ အာရုံစူးစိုက်ရခက်ခြင်း၊ စိတ်ရှုပ်လွယ်ခြင်း၊ စိတ်ပင်ပန်းလွယ်ခြင်း၊ ခေါင်းကိုက်ခြင်း၊ ကြွက်သားနာကြဉ်ခြင်းစတာတွေကလည်းစိတ်ကျခြင်းရဲ့လက္ခဏာတွေပဲဖြစ်ပါတယ်။
စိတ်ကျနေတဲ့မိတ်ဆွေသူငယ်ချင်းရှေ့မှာ ရှောင်ကြဉ်သင့်တဲ့ အပြုအမူတွေကတော့
သူတို့ကိုအပြစ်တင်တာ၊ သူတပါးနဲ့နှိုင်းယှဉ်တာ၊ ဆုံးဖြတ်ချက်တစ်ခုခုကိုဝင်ချပေးတာ၊ သူတို့ကို စိတ်ရှုပ်ထွေးစေမယ့် အပြုအမူမျိုးတွေကို လုပ်တာမျိုးကနေရှောင်ကြဉ်သင့်ပါတယ်။ နောက်ပြီးသူတို့ရဲ့အခြေအနေတွေ တိုးတက်လာတဲ့အခါမှာလည်း သူတို့ရဲ့စိတ်ပိုင်း၊ရုပ်ပိုင်းရပ်တည်ချက်တွေကို သူတပါးအပေါ်မှီခိုမနေဖို့ကို ကူညီပေးရပါမယ်။ သူတို့ဘာသာသူတို့ကိုယ်ပိုင်ရပ်တည်ချက်တစ်ခုရှိလာအောင် ဘေးကနေဖေးမပေးမယ်ဆိုရင်တော့ စိတ်ကျဝေဒနာတွေကနေ သက်သာရာရလာကြမှာပဲဖြစ်ပါတယ်။
ဒေါက်တာနိုင်း (ဆေး-၁)