ဆီးချိုနှီးနွယ်ခြေထောက်ရောဂါ

ဆီးချိုရောဂါလို့ဆိုလိုက်တာနဲ့ insulin ထိုးရတာ၊ အမြင်မှုန်ဝါးလာတာ၊ သွေးတိုး၊ လေဖြတ် နှလုံးသွေးကြောကျဉ်းတာ၊ ခြေထောက်မှာအနာဖြစ်တာ စသည်ဖြင့် နောက်ဆက်တွဲရောဂါတွေကို တသီတတန်းကြီး ပြေးမြင်တတ်ကြပါတယ်။ အဲဒီနောက်ဆက်တွဲ ရောဂါတွေထဲကမှ အများစုက ခြေထောက်ဖြတ်ရမှာကို ပိုပြီးစိုးရိမ်ကြပါတယ်။

img

ဆီးချိုရောဂါဆိုတာ အခြေခံအားဖြင့်သွေးထဲမှာ အချိုဓာတ်အရမ်းများတာလို့ သိထားကြပေမယ့် တခြားလက္ခဏာတွေလည်းရှိတတ်ပါတယ်။ အကျဉ်းချုပ်ပြောရရင် သွေးထဲမှာအချိုဓာတ်များလာရင် သွေးကြောမျှင်လေးတွေမှာ အနာတရဖြစ်တတ်ပါတယ်။ အဲဒီသွေးကြောလေးတွေ ယောင်ရမ်းရာက သူတို့တာဝန်ယူပြီး ထောက်ပံ့ပေးနေတဲ့ အာရုံကြောမျှင်လေးတွေပါ အားနည်းတတ်ပါတယ်။ အဲဒီလိုအာရုံကြောတွေထိခိုက်လာပြီးဆိုရင်တော့ ဆီးချိုရောဂါရဲ့ ကျိန်စာဆိုးလို့တင်စားရမယ့် ခြေထောက်ရောဂါ စပါတော့တယ်။

အရင်ဆုံး အာရုံကြောတွေထိခိုက်လာလို့ ပူတာ၊ အေးတာ၊ နာတာ၊ ထုံတာတွေ၊ အာရုံခံစားမှုတွေ လျော့နည်းလာပါတယ်။ ခလုတ်တိုက်တာ၊ ဓားရှတာ၊ ထိခိုက်ဒဏ်ရာရတာတွေကို မသိနိုင်တော့တဲ့အတွက် ခြေထောက်၊ ခြေဖဝါး၊ ခြေချောင်းတို့မှာ အနာတွေဖြစ်လာပါတယ်။ အဲဒီအနာတွေကနေ ရောဂါပိုးဝင်တာကတစ်ဆင့် အနာမကျက်တာ၊ ပြည်တည်တာတွေဖြစ်ပြီး နောက်ဆုံးမှာတော့ခြေထောက်ဖြတ်ရတဲ့အခြေအနေထိရောက်နိုင်ပါတယ်။

img3

ဆီးချိုရောဂါကြောင့် သွေးကြောတွေရောင်ရမ်းရာကနေ ခြေထောက်မှာသွေးလည်ပတ်မှု နှေးကွေးတာမျိုးလည်းုဖြစ်တတ်ပါတယ်။ သွေးလည်ပတ်မှု နှေးကွေးလာရင်ထိလို့ထိမှန်းမသိတာတွေ၊ နာလို့နာမှန်းမသိတာတွေကြောင့် အနာဖြစ်နိုင်တဲ့အပြင် ခြေချောင်းတွေမည်းနက်တာ၊ အရောင်ပြောင်းတာတွေဖြစ်ပြီး ခြေထောက်ပုပ်တာလည်းဖြစ်နိုင်တာမို့ အန္တရာယ်များလှပါတယ်။

ဆီးချိုရောဂါသည်တွေ ခြေထောက်ထိခိုက်လာပြီဆိုရင်တော့ အထူးကြပ်မတ်ဖို့လိုအပ်လာပါပြီ။ ဆီးချိုရောဂါကြောင့် အနာကျက်တာလည်းနှေးတာမို့သောက်ဆေးနဲ့တင်မကပဲ တစ်ခါတစ်ရံ ထိုးဆေးနဲ့ပါကုသရပါတယ်။ သိပ်မပြင်းထန်တဲ့ အနာတွေအတွက် တစ်ပတ်ကနေ နှစ်ပတ်အထိ ဆေးသောက်ရတာမျိုးရှိသလို အရိုးပါထိရင် ခြောက်ပတ်ခန့်ထိ ကုသခံရမှာပါ။ ဒါ့အပြင် တစ်ဖက်မှာလည်း ဆီးချိုကိုပုံမှန်ပမာဏအတွင်းရှိအောင် ထိန်းသိမ်းထားသင့်ပါတယ်။ မိမိခြေထောက်ကိုလည်း နေ့စဉ်ဂရုစိုက်ကြည့်ရှုသင့်ပါတယ်။ အဲဒီလိုဂရုစိုက်မှအနာတွေပွန်းပဲ့ရာတွေကို စောစောသိပြီး စောစောကုသနိုင်မှာဖြစ်ပါတယ်။ ဒါ့အပြင် ခြေထောက်ကို ခြောက်သွေ့အောင်၊ သန့်ရှင်းအောင် ဂရုပြုရပါမယ်။ အသားမာတွေ၊ အရေပြားကွဲတာတွေကို မပေါ့ဆပဲ အထူးဂရုစိုက်ပြီး ကုသသင့်ပါတယ်။ ခြေထောက်မှာအနာမဖြစ်အောင်နေနိုင်ရင် အကောင်းဆုံးပါပဲ။ ခြေထောက်ကိုထိခိုက်တာ နည်းနိုင်သမျှနည်းအောင်လည်း ကာကွယ်သင့်ပါတယ်။ ဥပမာ-ခြေဗလာသွားတာမျိုးရှောင်ကြည်ဖို့နဲ့ ဖိနပ်စီးရင်ခြေထောက်ကို အကာအကွယ်ပေးနိုင်တဲ့ ဖိနပ်မျိုး၊ ထူထဲတဲ့ဖိနပ်မျိုးတွေ ရွေးချယ်သင့်ပါတယ်။

img1

“ဆီးချိုရှိရင်သတိယှဉ် ကာကွယ်စောင့်ရှောက် သင့်ခြေထောက်” ဆိုတဲ့အတိုင်း ဆီးချိုရောဂါသည်တွေအနေနဲ့ မိမိခြေထောက်ကို အထူးဂရုပြုသင့်ပါတယ်။ အဲဒီလိုဂရုပြုကြပါမှ ဆီးချိုကြောင့်ဖြစ်တဲ့ ခြေထောက်ရောဂါတွေကို ရှောင်လွှဲနိုင်ကြမှာဖြစ်ပါတယ်။

Dr.ZZ

Related posts
All Articlesကိုယ်ဝန်ဆောင်နှင့်မိခင် ကျန်းမာရေးမိခင်နှင့်ကလေးကျန်းမာရေး

Complication of lack of antenatal care

1 Mins read
ကိုယ်ဝန်မအပ်ခြင်းရဲ့ ပြဿနာများ မိမိရင်သွေးလေးတွေ ကျန်းကျန်းမာမာနဲ့ မွေးဖွားကြီးပြင်းလာစေချင်တာ မိဘတိုင်းရဲ့ ဆန္ဒတစ်ခုပဲဖြစ်ပါတယ်။ ကျန်းမာသန်စွမ်းတဲ့ ကလေးငယ်တွေအဖြစ် ကြီးပြင်းလာစေဖို့ ကိုယ်ဝန်ဆောင်စဉ် အချိန်တည်းက ဂရုစိုက်သင့်ပါတယ်။ တတ်ကျွမ်းနားလည်တဲ့ ကျန်းမာရေး စောင့်ရှောက်သူများနဲ့ စောလျင်စွာ ကိုယ်ဝန်အပ်ခြင်း၊ ညွှန်ကြားချက်များ လိုက်နာခြင်း၊ စနစ်တကျ ကိုယ်ဝန်စောင့်ရှောက်မှုများ…
နေထိုင်မှုပုံစံအထွေထွေရောဂါများအလှအပနှင့်နေထိုင်စားသောက်မှုပုံစံ

Why do bones and joints make noises every time they move?

1 Mins read
အရိုးနှင့် အဆစ် တွေကနေ လှုပ်ရှားလိုက်တိုင်း အသံတွေထွက်နေတာ ဘာကြောင့်လဲ… ကျွန်တော် တို့ရဲ့ အရိုးနှင့် အဆစ်တွေဟာ လှုပ်ရှားမှုလုပ်လိုက်တာနဲ့ အရိုးတွေ အဆစ်တွေကြားထဲကနေ အသံတွေထွက်လာတတ်တာ လူတိုင်း အနည်းနှင့် အများကြုံဘူး သိဘူးကြမှာပါ။ ဘာကြောင့် ဒီလိုအသံတွေ ဖြစ်ရလဲ ဘယ်လို…
Covid - 19ကူးစက်တတ်သောရောဂါများအထွေထွေရောဂါများ

ကိုဗစ်ကာကွယ်ဆေး Booster ဆိုတာဘာလဲ

1 Mins read
လူတိုင်းထိုးစရာလို‌နေပြီလား??? 💉💉💉💉💉💉💉💉💉💉💉💉💉 အရင်ကကာကွယ်ဆေး ကို နှစ်ကြိမ်ထိုးပြီးသူတွေရဲ့ ရှိပြီးသား ကာကွယ်ဆေးအစွမ်းမကျသွားအောင် ခန္ဓာကိုယ်ထဲမှာ တိုက်ပွဲဝင်ဖို့အသင့်ဖြစ်အောင် လေ့ကျင့်တဲ့သဘောနဲ့ ထပ်ပြီးBooster Dose ကို တတိယအကြိမ်(1st booster) သာမက အခု စတ္ထုထအကြိမ် (2nd booster) ပါ တခြားနိုင်ငံတွေမှာထိုးနေကြပြီဖြစ်ပါတယ်။…

Leave a Reply

Your email address will not be published. Required fields are marked *