မွေးလမ်းကြောင်းလေးမကျယ်စေလို ကိုကိုစိတ်တိုင်းကျမကျ
ကိုယ်ဝန်ဆောင်တစ်ယောက်ဟာ မီးဖွားပြီးတဲ့အခါမှာ ကလေးငယ်အတွက်အစွမ်းကုန်ဖြည့်ဆည်းပေးရင်း သားသမီးဇောနဲ့ စိတ်ပူရသလို မိမိကိုယ်ကိုလည်းပြန်လည်စမ်းစစ်ရင်း စိတ်ပူတတ်ကြပါတယ်။ အဲဒီအထဲကမှ စိတ်ပူတတ်ကြတဲ့ကိစ္စတစ်ခုကတော့ ကလေးကို ရိုးရိုးမွေးပြီးတဲ့အခါ မိန်းမကိုယ်ကြွက်သားတွေ လျော့သွားလိမ့်မလား၊ အမျိုးသားနဲ့အတူနေတဲ့အခါ စိတ်တိုင်းကျမှုရှိပါတော့မလားဆိုတဲ့ ကိစ္စပါ။ ဒီ့အတွက် မိမိဟာ စိတ်ပူသင့်သလား မပူသင့်ဘူးလားဆိုတာကိုကြည့်ကြရအောင်။
ဒီကိစ္စအတွက် အသေအချာ သီးသန့်စစ်တမ်းကောက်ယူထားခြင်းတော့မရှိပါဘူး။ ဒါပေမယ့် လေ့လာတွေ့ရှိချက်အချို့နဲ့ ဆရာဝန်များရဲ့အဆိုအရ ရိုးရိုးမွေးပြီးတဲ့အခါမှာ အတူနေတဲ့အခါ ယခင်နဲ့မတူတဲ့ခံစားချက်မျိုးဖြစ်နေတယ်ဆိုပြီး လာရောက်တိုင်ပင်သူ လူနာအရေအတွက်ဟာလည်း မနည်းပါဘူးလို့ဆိုပါတယ်။ ဒါပေမယ့် ရိုးရိုးမွေးပြီးတိုင်း ကြွက်သားများ အားနည်းသွားတာတော့မဟုတ်ပါဘူးတဲ့။ အမျိုးသမီးအများစု အထူးသဖြင့် ငယ်ရွယ်သန်စွမ်းကျန်းမာတဲ့ အမျိုးသမီးများဟာ ရိုးရိုးမွေးပြီး ခြောက်လအကြာမှာ မိန်းမကိုယ်ကြွက်သားတွေဟာ ပုံမှန်သန်စွမ်းမှုကို ပြန်လည်ရရှိကြတယ်လို့ တွေ့ရပါတယ်လို့ဆိုပါတယ်။ အချို့အမျိုးသမီးများမှာတော့ ကြွက်သားသန်စွမ်းမှုပြန်ရဖို့အချိန်ကြာတတ်ပါတယ်။ ဒီလိုအားနည်းချက်ရှိသွားစေနိုင်တဲ့ အကြောင်းအရာတွေကတော့
အသက်အရွယ်ကြီးခြင်း
အသက်ကြီးတဲ့အခါ မိန်းမကိုယ်ရဲ့ ကြွက်သားနဲ့ တစ်သျူးတွေဟာ အားနည်းလာတအြတွက် ပုံမှန်ကြွက်သားအခြေအနေပြန်ရဖို့ ခက်ခဲစေပါတယ်။
ကလေးမွေးဖွားမှုများခြင်း
သားဦးမွေးထားတဲ့အမျိုးသမီးဟာ ပုံမှန်အခြေအနေကိုပြန်ရနိုင်ပေမယ့် ကလေး လေး၊ ငါးယောက်မွေးပြီးတဲ့အမျိုးသမီးမှာတော့ ကြွက်သားများလအားနည်းနေနိုင်ပါတယ်။
မွေးဖွားစဉ် မိန်းမကိုယ်ကြွက်သားများထိခိုက်ဒဏ်ရာရဖူးခြင်း
ကျွမ်းကျင်တဲ့ ကျန်းမာရေးဝန်ထမ်းများနဲ့မွေးဖွားတဲ့အခါ အဆင်ပြေသွားနိုင်ပေမယ့် အိမ်မှာလက်သည်နဲ့မွေးတဲ့အခါ မွေးရခက်ချိန် အတင်းညှစ်ခြင်းတို့ကြောင့် မိန်းမကိုယ်ကြွက်သားများ ပြဲစုတ်သွားတဲ့အခါမှာ ပုံမှန်ကြွက်သားလုပ်ဆောင်နိုင်စွမ်း မရှိတော့တာမျိုးကြုံရနိုင်ပါတယ်။
အကယ်၍ ကလေးမွေးပြီးနောက်ပိုင်း အမျိုးသားနဲ့အတူနေရာမှာ စိတ်တိုင်းကျမှုမရှိခြင်း၊ အားနည်းနေခြင်းတို့ခံစားရတယ်ဆိုရင်တော့ တတ်ကျွမ်းနားလည်တဲ့ဆရာဝန်များနဲ့ ပြသကာ တိုင်ပင်သင့်ပါတယ်။
မေတ္တာဖြင့်
စိုင်းမြတ်သူ