” သုက်ရည်တွင်သွေးပါခြင်း “
သုက်ရည်ထဲမှာသွေးပါတယ်ဆိုတဲ့အဖြစ်အပျက်ဟာ ကြုံတွေ့ရလေ့သိပ်မရှိပါဘူး။ ကြုံတွေ့လာခဲ့ပြီဆိုရင်လည်း စိတ်ပူပန်သောကဖြစ်ရပါတယ်။ သို့လောသို့လောစဉ်းစားစရာတွေဖြစ်လာပြီး စိတ်ပင်ပန်းတတ်ကြပါတယ်။
သုက်ရည်ထဲမှာသွေးပါစေနိုင်တဲ့အကြောင်းတွေကတော့ အမျိုးမျိုးရှိပါတယ်။ သုက်ရည်ထုတ်လုပ်ရာအစိတ်အပိုင်း၊ လမ်းကြောင်းတစ်လျှောက် ထိခိုက်ထားရင်သွေးပါနိုင်ပါတယ်။ ဆီးကြိတ်ရောင်တာ၊ ဆီးလမ်းကြောင်းပိုးဝင်တာတွေကြောင့်လည်းဖြစ်နိုင်ပါတယ်။ ဖြစ်တောင့်ဖြစ်ခဲအနေနဲ့တော့ ဆီးကြိတ်ကင်ဆာလိုရောဂါမျိူးရှိနေတာကြောင့်လည်းသွေးပါတတ်ပါတယ်။
သုက်ရည်မှာသွေးပါတာအပြင် အခြားဝေဒနာတွေအနေနဲ့ ဝှေးစေ့ရောင်ရမ်းတာ၊ နာကျင်နာ၊ ပေါင်ခြံမှာအလုံးအကြိတ်စမ်းမိတာ၊ ပေါင်ခြံနာတာတွေရှိနိုင်ပါတယ်။ ဆီးလမ်းကြောင်းပိုးဝင်တာနဲ့သက်ဆိုင်နေရင်တော့ ဆီးပူဆီးကျဉ်တာ၊ ဆီးအောင့်တာ၊ ဆီးအရောင်မကောင်းတာ စတာ တွေနဲ့ပါယှဉ်တွဲနေနိုင်ပါတယ်။
သုက်ရည်ထဲသွေးပါတာရဲ့ အဖြစ်အများဆုံးအကြောင်းအရာကတော့ ဆီးကြိတ်ကနေ အသားစယူလို့ဖြစ်တတ်ပါတယ်။
သွေးပါလာပြီဆိုရင်တော့ မပေါ့ဆသင့်ပါဘူး။ ဒါပေမယ့်အရမ်းစိုးရိမ်သောကရောက်တာမျိူးမလုပ်ပဲ သတိထားပြီးစောင့်ကြည့်သင့်ပါတယ်။ ပမာဏအနည်းအများ၊ ပါတဲ့အကြိမ်အရေအတွက် စတာတွေကိုဂရုတစိုက်မှတ်သားထားသင့်ပါတယ်။
ကုသဖို့အတွက်ကတော့ လိုအပ်ချင်မှလိုအပ်ပါလိမ့်မယ်။ သွေးပါတဲ့ဖြစ်စဉ်ဟာ အရမ်းစိုးရိမ်ဖို့မလိုအပ်လို သူ့ဟာသူပျောက်ကင်းသွားတတ်ပါတယ်။ ဆီးကြိတ်ကနေ အသားစယူထားရင်လည်း ဆီးကြိတ်ကသွေးတိတ်သွားတာနဲ့ အလိုလိုပဲပျောက်သွားမှာပါ။
အဲဒီအကြောင်းအရာတွေကြောင့်မဟုတ်ပဲ တခြားအကြောင်းရင်း ကြောင့်ဆိုရင်တော့ အဲဒီအကြောင်းရင်းကိုပဲ အဓိကထူာပြီးကုသရမှာပါ။ ဥပမာ ဆီးလမ်းကြောင်းပိုးဝင်တာကို ပိုးသတ်ဆေးပေးလိုက်တာမျိုးနဲ့ကုသလိုက်တာနဲ့သွေးပါတာလည်းရပ်သွားမှာဖြစ်ပါတယ်။
တကယ်အရေးကြီးတာကတော့ သုက်ရည်ထဲမှာသွေးပါလာပြီဆိုတာနဲ့ သတိထားပြီးစောင့်ကြည့်ရမှာဖြစ်တဲ့အပြင် ဝေဒနာရဲ့သဘောသဘာဝကိုလည်း သိထားရမှာဖြစ်ပါတယ်။ သွေးပါတဲ့အချိန်အရမ်းကြာလာပြီဆိုရင်တော့ လိုအပ်တဲ့စမ်းသပ်စစ်ဆေးမှုတွေပြုလုပ်ပြီး ကုသမှုခံယူသင့်ပါတယ်။
Dr. ZZ