သားမဲ့သန္ဓေ
သားမဲ့သန္ဓေဆိုတာ မျိုးအောင်ပြီး မမျိုးဥဟာ သားအိမ်နရံကိုတွယ်ကပ်ပေမယ့် သန္ဓေသားအဖြစ် ဖွံဖြိုးမှုမရှိလာခြင်းကိုခေါ်ပါတယ် ။ ဒီကိစ္စဟာ ကိုယ်ဝန်အစောပိုင်း သားပျက်သားလျှောခြင်းဖြစ်စဉ်တွေထဲမှာ အဓိကအဖြစ်များဆုံးပဲဖြစ်ပါတယ် ။ တစ်ခါတစ်ရံ စောလွန်းတဲ့အတွက် ကိုယ်ဝန်ရှိမှန်းတောင် မသိလိုက်သည်အထိ ဖြစ်ပွားပါတယ် ။
ဒီသားမဲ့သန္ဓေဖြစ်စဉ်ဟာ ကိုယ်ဝန်ဆောင်ပထမ သုံးလပတ်အတွင်း ကိုယ်ဝန်ပျက်ကျခြင်း နှစ်ကြိမ်လျှင် တစ်ကြိမ် ဟာ ဒီဖြစ်စဉ်ကြောင့်ဖြစ်သာ်အထိ များပြားပါတယ် ။
အမျိုးသမီးတစ်ယောက် ကိုယ်ဝန်ရှိတဲ့အခါ မျိုးအောင်ပြီးတဲ့ မမျိုးဥဟာ သားအိမ်နံရံကို တွယ်ကပ်ပြီး ငါးပတ်ကနေ ခြောက်ပတ်ကြာတဲ့အချိန်မှာ သန္ဓေသားလောင်းလေးအဖြစ် စရှိသင့်နေပါပြီ ။ ဒီသားမဲ့သန္ဓေဖြစ်တဲ့အခါ သန္ဓေသားကို ဝန်းရံပြီး အုပ်ထားတဲ့ ရေမွှာအိတ်ဟာ ကြီးလာပေမယ့် အထဲမှာ သန္ဓေသားဟာ မဖွံ့ဖြိုးလာဘဲ ရှိနေပါတယ် ။
ဘာကြောင့်ဖြစ်ပွားရသလဲ ?
အဓိကမှာ Genes မျိုးရိုးဗီဇကြောင့်ဖြစ်ပါတယ် ။ တစ်ခါတစ်ရံ မမျိုးဥ သုတ်ပိုးကောင် အရည်အသွေးအားနည်းတာကြောင့်လဲဖြစ်နိုင်ပါတယ် ။
အဓိကမှတ်သားရန်မှာ ဒီလိုဖြစ်ရတဲ့အကြောင်းအရင်းဟာ သင့်အနေအထိုင်အပြုအမူ သင့်ကြောင့်လုံးဝမဟုတ်သလို ကာကွယ်လို့လဲမရပါဘူး ။ အမျိုးသမီးအများစုမှာ ဒီလိုသားမဲ့သန္ဓေဟာ အနည်းဆုံးတစ်ကြိမ်တော့ဖြစ်ပွားပါတယ် ။
ရောဂါလက္ခဏာများ
ဒီလိုသားမဲ့သန္ဓေဖြစ်တဲ့အခါ သင့်အနေနဲ့ ပုံမှန်ကိုယ်ဝန်ဆောင်သကဲ့သို့ လက္ခဏာများခံစားတွေ့ရှိရနိုင်ပါတယ် ။ ဆီးစစ်ကြည့်တဲ့အခါမှာလဲ ကိုယ်ဝန်ရှိကြောင်း ပြနိုင်ပါတယ် ။
ထိုကဲ့သို့လက္ခဏာရပ်များပြပြီး မကြာမီ သားပျက်သားလျှော လက္ခဏာတွေ ခံစားရနိုင်ပါတယ် ။ လက္ခဏာရပ်များအနေနဲ့
* ဗိုက်အောင့်တာ
* သွေးဆင်းတာ အစက်အပျောက်တွေစွန်းတာ
* ပုံမှန်ထက်သွေးဆင်းမှု များပြားတာ
ဒီလိုလက္ခတွေတွေ့ရှိရပြီဆို သင့်အနေနဲ့ ပျက်ကျခြင်းအခြေအနေဖြစ်နေပါပြီ ။
ဒီရောဂါကိုသိရှိစေရန်နှင့် သေချာရောဂါနာမည်တပ်နိုင်စေရန် အတွက် သွေးအတွင်း hCG ပမာဏကိုတိုင်းနိုင်ပြီး Ultrasounds နှင့် ကြည့်ရှုစမ်းသပ်ရန် လိုအပ်ပါတယ် ။
ဒါကြောင့်သင့်အနေနဲ့ သံသယရှိတဲ့အခါ အချိန်မရွေး ဆရာဝန်နှင့် လျင်လျင်မြန်မြန်ပြသရန်လိုအပ်ပြီး သက်ဆိုင်ရာဆရာဝန်မှ သားအိမ်ထဲတွင် အန္တရာယ်ရှိပစ္စည်းများမကျန်ရန် သားအိမ်ခြစ်ခြင်းကဲ့သို့ လုပ်ဆောင်ချက်များကို လုပ်ဆောင်နိုင်မှာပဲ ဖြစ်ပါတယ် ။
အားလုံးကျန်းမာကြပါစေ
ဒေါက်ပီ