နှာခေါင်းဘေးက အမဲစက်ကလေးတွေ
လူတော်တော်များများရဲ့နှာခေါင်းဘေးလေးတွေမှာ အမဲစက်ကလေးတွေရှိကြမှာပါ။အချို့ကအစက်သေးသေးလေးတွေ သိပ်မသိသာဘူး၊အချို့ကျ ထင်းထင်းကြီးပေါ်နေပြီး မျက်နှာအလှပါပျက်တတ်တာမို့ ဒီအမဲစက်ကလေးတွေအကြောင်း အနည်းငယ်ပြောပြချင်ပါတယ်။
နှာခေါင်းဘေးက အမဲစက်ကလေးတွေဆိုတာ ဘာတွေလဲ…
Blackheads(open comedones)ခေါ်တဲ့ ဆားဝက်ခြံ(အမဲစက်ကလေးတွေ)ဟာ ဝက်ခြံအမျိုးအစားတစ်ခုပဲဖြစ်ပါတယ်။မျက်နှာကထွက်တဲ့အဆီ၊အရေပြားဆဲလ်သေများ၊ဖုန်အညစ်အကြေးများနဲ့ ဘက်တီးရီးယားပိုးလေးတွေဟာ မျက်နှာအသားအရေပေါ်မှာရှိတဲ့မွေးညင်းပေါက်ကလေးတွေမှာပိတ်ပြီး လေနဲ့ထိတွေ့ကာ အမဲရောင်အစက်(ဝက်ခြံ)လေးတွေ အဖြစ် ပေါ်လာတာဖြစ်ပါတယ်။
ဆားဝက်ခြံက ဘာလို့နှာခေါင်းဘေးမှာ ပိုဖြစ်သလဲ…
မျက်နှာအစိတ်အပိုင်းတွေထဲမှာ နှာခေါင်းဟာ အဆီဂလင်းအများဆုံးရှိတဲ့နေရာဖြစ်လို့ပါပဲ။ဆားဝက်ခြံဟာ ခန္ဓာကိုယ်ရဲ့နေရာအနှံ့မှာ ဖြစ်နိုင်ပါတယ်။
ဆားဝက်ခြံတွေကို ဘယ်လိုဖယ်ရှားကြမလဲ…
ဆားဝက်ခြံတွေကို ညှစ်ထုတ်ပစ်လို့ရပေမယ့် ထုတ်ပြီးမကြာခင်ပြန်ပြန်ဖြစ်ပါတယ်။မွေးညင်းပေါက်တွေထဲကို အဆီဂလင်းတွေကနေပြီး အဆီတွေဆက်တိုက်ဝင်ကာပိတ်ဆို့လို့ပဲဖြစ်ပါတယ်။
ဆားဝက်ခြံတွေကို ဖယ်ပစ်လဲဘာမှမထူးဘူးလား…
ဒီလိုတော့လဲ မဟုတ်ပါဘူး။အရင်ဆုံးတော့ စိတ်ရှည်ရပါမယ်။ဆားဝက်ခြံတွေကို ဖယ်ရှားပွတ်ထုတ်ခြင်း(Exfoliation)ဖြင့် သက်သာနိုင်ပါတယ်။လက်နဲ့ညှစ်ခြင်းဟာ ခနတာပျောက်ကင်းမယ့်နည်းလမ်းဖြစ်ပြီး ဘေးပတ်ဝန်းကျင်ကအရေပြားကိုပါထိခိုက်စေကာ အခန့်မသင့်လျှင် ပိုးဝင်တတ်တာကြောင့် သတိထားသင့်ပါတယ်။Facial scrub ဖြင့်မျက်နှာသစ်ခြင်း၊ရေစိုဝတ်၊အညိုရောင်သကြားဖြင့် ပွတ်တိုက်ပေးခြင်းတို့လုပ်ပေးနိုင်ပါတယ်။Exfoliation ကို တစ်ပါတ်၂ကြိမ်၊၃ကြိမ်ထက် ပိုမလုပ်သင့်ပါဘူး။
ဆားဝက်ခြံကို ဘယ်လိုကာကွယ်မလဲ…
Retinoids ပါတဲ့လိမ်းဆေးတွေဟာ ဆားဝက်ခြံဖြစ်ပွားမှုကို လျော့နည်းစေပါတယ်။
ဒါ့အပြင် အရေပြားမခြောက်အောင် moisturizer လိမ်ပေးခြင်း၊မျက်နှာကိုသန့်စင်အောင်ထားခြင်း၊အဆီပြန်ခြင်းကိုထိန်းသိမ်းခြင်းတို့ဟာလဲ အထောက်အကူပြုနိုင်တဲ့ နည်းလမ်းတွေဖြစ်ပါတယ်။
ဆားဝက်ခြံ မသက်သာလျှင်…
မသက်သာလျှင်တော့ အရေပြားအထူးကုဆရာဝန်နှင့် တိုင်ပင်ဆွေးနွေးပြီး ကုသမှုခံယူသင့်ပါကြောင်းပြောရင်းနဲ့ နှာခေါင်းဘေးကအမဲစက်ကလေးတွေအကြောင်းကို အဆုံးသတ်လိုက်ပါတယ်။
အားလုံးပဲ ကျန်းမာချမ်းသာကြပါစေ။
dr.yelwin mm