အစားအစာတွင် ပါဝင်သောအာဟာရဓာတ်များ
ကျွနု်ပ်တို့နေ့စဉ်စားသုံးနေသော အစာအုပ်စု ၃စုရှိပါသည်။ ထိုအစာအုပ်စု ထဲတွင် ပါဝင်သော အာဟာရဓာတ်မှာ ၆မျိုး ရှိပါသည်။ ၎င်းတို့မှာ
ကစီဓာတ်(carbohydrate)
အသားဓာတ်(protein)
အဆီဓာတ်(fat)
သက်စောင့်ဓာတ်(vitamine)
သတ္တုဓာတ်(minerals)
ရေဓာတ်(water) တို့ဖြစ်ပါသည်။
ဤအစာအာဟာရဓာတ်များသည် နေ့စဉ်လှုပ်ရှားသွားလာမှုများပြုလုပ်ရန် လိုအပ်ပါသည်။ တစ်ခါတစ်ရံ
• အစားအသောက်ပုံစံ မမှန်၍ဖြစ်စေ၊
• အာဟာရပါဝင်သောအစားအစာများကို လုံလောက်မျှတစွာ မစားသောကြောင့်ဖြစ်စေ အာဟာရဓာတ်ချို့တဲ့သောဝေဒနာ ခံစားရတတ်ပါသည်။
ချို့တဲ့သော အာဟာရဓာတ်ပေါ်မူတည်၍ ရောဂါဝေဒနာ ခံစားရပုံ ကွာလေ့ရှိပါသည်။ သာမန် အားနည်းခြင်းမှသည် ကျန်းမာရေးဆိုးရွားစွာထိခိုက်သည် အထိ ဖြစ်တတ်ပါသည်။ ထို့ကြောင့် အာဟာရဓာတ် ၆မျိုးလုံးပြည့်စုံစွာ စားရန်လိုအပ်ပါသည်။
လုံလောက်မျှတသော အစားအသောက်ပုံစံ(Balanced diet)
လုံလောက်မျှတသော အစားအသောက်ပုံစံ ဆိုသည်မှာ အစာအုပ်စု ၃စုမှ အစားအစာများ အချိုးကျ ပါဝင်၍ နေ့စဉ်လှုပ်ရှားသွားလာရန် လိုအပ်သော အာဟာရဓာတ် ၆ မျိုးလုံးပါဝင်သည့် အစာအသောက်ပုံစံကို ဆိုလိုခြင်း ဖြစ်ပါသည်။
နေ့စဉ် စားသုံးသင့်သောအစားအစာများ
ကစီဓာတ်များသောအစားအစာများ-ထမင်း၊ ပေါင်မုန့်၊ ခေါက်ဆွဲ၊ အာလူး စသည်တို့သည် စွမ်းအင်အများဆုံးပေးနိုင်သော အဓိက အစာအုပ်စုဝင်ဖြစ်ပါသည်။
ဟင်းသီးဟင်းရွက်နှင့် သစ်သီးဝလံများ- သစ်သီး ၆ စိတ် သို့ ပဲ သို့ အနည်းငယ်ချက်ထားသော အစိမ်းရောင်ဟင်းသီးဟင်းရွက်များ နေ့စဉ် စားသုံးသောအစားအစာများတွင် ပါဝင်ရန်လိုအပ်ပါသည်။ အမျှင်ဓာတ်များသော အစားအစာအုပ်စုဖြစ်၍ မပါမဖြစ်စားသုံးပေးရပါမည်။
အသား၊ ငါးများ-ဆီမပါဘဲ ချက်ပြုတ်စားနိုင်ပါက အကောင်းဆုံးဖြစ်ပါသည်။ အဆီနည်းသောအသားများ (ဥပမာ-အဆီအခေါက်မပါသော ဝက်သား)၊ ငါးများ၊ ဟင်းသီးဟင်းရွက်မှရသော အသားဓာတ်များကို ပိုမိုစားသုံးသင့်ပါသည်။
နို့ထွက်ပစ္စည်းများ-အဆီလျော့ထားသောနွားနို့၊ ဒိန်ချဉ်၊ ဒိန်ခဲများလည်း အနည်းငယ်စားသုံးပေးရန် လိုအပ်ပါသည်။
အဆီနှင့် သကြားပါသောအစားအစာများ-အဆီများများချက်ခြင်းကိုရှောင်ကြဉ်သင့်ပါသည်။ ကြော်စားသည်ထက် ပြုတ်၊ ကင်၊ ပေါင်း၊ ချက်စားခြင်းက ပိုကောင်းပါသည်။ အသင့်စားမုန့်များနှင့် အအေးများ ရှောင်ကြဉ်သင့်ပါသည်။
ရေများများ သောက်သုံးရန်လည်း လိုအပ်ပါသည်။
စားသုံးသင့်သောပမာဏ
• ကစီဓာတ်ပါသောအစားအစာများကို နေ့စဉ်စားသုံးသော အစားအစာ၏ ၃ပုံ ၁ပုံခန့် ပါဝင်ရပါမည်။
• ထို့အတူ ဟင်းသီးဟင်းရွက်နှင့် သစ်သီးဝလံများသည်လည်း ၃ပုံ ၁ပုံ ခန့်စားပေးသင့်ပါသည်။
• ကျန် ၃ပုံ ၁ပုံ တွင် အထက်ဖော်ပြပါ အစားအစာများ မျှတစွာ စားပေးခြင်းဖြင့် ကျန်းမာသောအစားအသောက်ပုံစံ ရရှိနိုင်မည်ဖြစ်ပါသည်။
ဒေါက်တာချို(ဆေး ၁)