မွေးစကလေးနှင့် သနပ်ခါးပြဿနာ
မြန်မာလူမျိုးများနှင့် သနပ်ခါးမှာ ခွဲခြားလို့မရပါဘူး။ ရှေးခေတ်အဆက်ဆက်တည်းက မြန်မာအမျိုးသမီးလေးတွေ ခေါင်းစခြေဆုံး အမြတ်တနိုး လိမ်းချယ်လေ့ရှိတဲ့ ရိုးရာသနပ်ခါးလည်းဖြစ်ပါတယ်။ မိမိတို့ တန်ဖိုးထားလိမ်းချယ်ကြတဲ့ သနပ်ခါးကို မိမိတို့ရဲ့ သားလှရတနာလေးတွေကိုလည်း လိမ်းချယ်ပေးလေ့ရှိကြပါတယ်။
တကယ်တော့ သနပ်ခါးကို မွေးစအရွယ် ကလေးငယ်တွေကို လိမ်းချယ်ပေးတာက ကောင်းတဲ့အမူအကျင့်တော့ မဟုတ်ပါဘူး။ အသားပေါ်မှာ သနပ်ခါးခြောက်သွေ့လာတဲ့အခါ ဖွာထွက်လာတဲ့ အမှုန်တွေက ကလေးငယ်ရဲ့ အသက်ရှူလမ်းကြောင်းကို အန္တရာယ်ပြုနိုင်လို့ပဲ ဖြစ်ပါတယ်။ သနပ်ခါးခြောက်သွေ့လာတဲ့အခါ ထွက်လာတဲ့ အမှုန်ငယ်လေးတွေက ဖွံဖြိုးကျန်းမာတဲ့ လူကြီးအဆုတ်နဲ့ အသက်ရှူလမ်းကြောင်းအတွက် အန္တရာယ်တစ်စုံတစ်ရာ မဖြစ်နိုင်ပေမဲ့ မွေးစကလေးငယ်တွေမှာတော့ သေးငယ်ပြီးနုနယ်တဲ့ အဆုတ်နှင့် အသက်ရှူလမ်းကြောင်းကို ပိုင်ဆိုင်တာကြောင့် အသက်ရှူလမ်းကြောင်းမှာ အမှုန်တွေနဲ့ပိတ်ဆို့တာ၊ ပိုးဝင်တာ၊ အသက်ရှူကြပ်တာတွေ ဖြစ်လာနိုင်ပါတယ်။ သနပ်ခါးတင်မဟုတ်ဘဲ အမှုန်ဖွာနိုင်တဲ့ ပေါင်ဒါလိုအရာမျိုးကိုလည်း ရှောင်ကြဉ်သင့်ပါတယ်။
ပေါင်မပြည့်၊ လမစေ့မွေးဖွားသောကလေးများ၊ မွေးရာပါ နှလုံးရောဂါသည်ကလေးများ၊ ပန်းနာရင်ကြပ် ဝေဒနာသည်ကလေးများ၊ အဆုတ်အားနည်းသော ကလေးများ စတဲ့ ကလေးတွေမှာ ပုံမှန်ကလေးတွေထက် အားနည်းပြီး အသက်ရှူလမ်းကြောင်းဆိုင်ရာ ပြဿနာတွေ ဖြစ်လွယ်တာကြောင့် သနပ်ခါး၊ ပေါင်ဒါ လိမ်းခြင်းကို ပိုပြီး ကြပ်ကြပ်မတ်မတ် ရှောင်ရှားသင့်ပါတယ်။
ကျန်းမာလှပသော ဘဝတစ်ခု ပိုင်ဆိုင်စေရန် ရည်ရွယ်လျက်
ပွင့်ရည်(ဆေး၂)