သားအိမ်ခေါင်းလျော့ရဲခြင်း
သားအိမ်ခေါင်းလျော့ရဲတယ်ဆိုတဲ့ဝေါဟာရကိုဟာ ကိုယ်ဝန်ဆောင်မိခင်တွေအတွက် ကြားလေ့ကြားထသိပ်မရှိတဲ့ ဝေါဟာရတစ်ခုဖြစ်နိုင်ပါတယ်။ နေ့မစေ့ပဲမီးဖွားတယ်၊ သားပျက်သားလျှောဖြစ်တယ်၊ စတာတွေလောက် မကြားရတတ်ပေမယ့် အဆိုပါအခြေအနေတွေကို ဖြစ်စေနိုင်ပါတယ်။
သားအိမ်ခေါင်းဆိုတာ သားအိမ်နဲ့မိန်းမကိုယ်ကို ဆက်သွယ်ပေးထားတဲ့ ဆလင်ဒါပုံစံအစိတ်အပိုင်းဖြစ်ပါတယ်။ ပုံမှန်အနေနဲ့ ကိုယ်ဝန်မရှိတဲ့အချိန်မှာ 4cmကနေ 5cm အထိရှိပါတယ်။ ကိုယ်ဝန်ရင့်လာတာနဲ့အမျှ သားအိမ်ခေါင်းကတိုတိုလာပြီး မွေးခါနီးဆိုရင်တော့ ပါးလွှာလာရမှာဖြစ်ပါတယ်။
သားအိမ်ခေါင်းလျော့ရဲစေတဲ့အကြောင်းတွေကတော့ အများကြီးရှိနိုင်ပါတယ်။ သားအိမ်ခေါင်းကိုခွဲစိတ်ဖူးတာ၊ အရင်ကိုယ်ဝန်တွေမှာမွေးရခက်တာ၊ အရင်ကိုယ်ဝန်တွေပျက်ကျလို့ သားအိမ်ခြစ်ရတာ စတဲ့သားအိမ်ခေါင်းကိုထိခိုက်ထားဖူးရင် သားအိမ်ခေါင်းလျော့ရဲတာဖြစ်နိုင်ပါတယ်။
သားအိမ်ခေါင်းလျော့ရဲတာကြောင့် အဖြစ်အများဆုံးကတော့ သားပျက်သားလျှောဖြစ်တတ်ပါတယ်။ ပုံမှန်အနေနဲ့ မီးဖွားကာနီးမှပွင့်ရမယ့်သားအိမ်ခေါင်းဟာလျော့ရဲလာပြီဆိုရင်တော့ သားပျက်သားလျှောဖြစ်ပါတယ်။ သားအိမ်ခေါင်းမလုံတာကြောင့် သားပျက်သားလျှောဖြစ်ပြီဆိုရင် ကိုယ်ဝန်ရဲ့ ဒုတိယမြောက်နဲ့တတိယမြောက်သုံးလပတ်(4လ-9 လ)မှာဖြစ်တတ်ပါတယ်။
ဆေးရုံတွေမှာကိုယ်ဝန်အပ်ရင် စမ်းသပ်စစ်ဆေးတဲ့အခါ သားအိမ်ခေါင်းလျော့ရဲတာကို စစ်ဆေးလေ့မရှိပါဘူး။ ဒါကြောင့် သားပျက်သားလျှောတာ၊ နေ့မစေ့ပဲမီးဖွားတာတွေဖြစ်လာမှသာ သားအိမ်ခေါင်းလျော့ရဲနေမှန်းသိကြရပါတယ်။ သားအိမ်ခေါင်းလျော့ရဲတာကိုသိနိုင်ဖို့အတွက် စစ်ဆေးမှုတွေပြုလုပ်သင့်သလို သားအိမ်ခေါင်းနဲ့ပက်သက်တဲ့ ကျန်းမာရေးအခြေအနေတွေကိုပါ ကိုယ်ဝန်အပ်တဲ့အခါ ပြောပြထားဖို့လိုပါတယ်။
သားအိမ်ခေါင်းလျော့ရဲတာကိုသိတာနဲ့ သားအိမ်ခေါင်းကိုတောင့်တင်းအောင့် ပြုလုပ်လို့ရတဲ့ခွဲစိတ်မှုကို လုပ်ဆောင်နိုင်ပါတယ်။ ကိုယ်ဝန်ဆောင်ချိန် 14ပတ်မတိုင်ခင် ပြုလုပ်ရပြီး မီးဖွားခါနီးရင်တော့ ချုပ်ရိုးတွေပြန်ဖြေရပါတယ်။ ပြန်မဖြေမိရင် မွေးဖွားတဲ့အခါသားအိမ်ခေါင်းက ကျယ်မလာတော့ပဲ မွေးချိန်ကြာတာ၊ သွေးသွန်တာ၊ သားအိမ်ကကောင်းကောင်းမကျုံ့တာတွေ ရှိလာနိုင်ပါတယ်။
သားအိမ်ခေါင်းလျော့ရဲတာဟာ ကြုံတွေ့ရတာသိပ်မရှိပေမယ့် ဖြစ်လာခဲ့ပြီဆိုရင်တော့ ကိုယ်ဝန်ပျက်တာအထိဖြစ်နိုင်တာကြောင့် သတိထားသင့်ပါတယ်။ လျော့ရဲနေတာကိုသိတာနဲ့ ကုသထားမှသာ ဘေးထွက်ဆိုးကျိုးတွေကို ရှောင်ရှားနိုင်မှာဖြစ်ပါတယ်။
Dr. ZZ