တားဆေးရယ်လို့ဆိုလိုက်လျှင် နေ့စဉ်သောက်တားဆေးကို အရင်ဆုံးပြေးမြင်ကြမှာပါ။မြန်မာနိုင်ငံမှာ လူသုံးများ လူသိအများဆုံး ကိုယ်ဝန်တားနည်းတွေထဲကတစ်ခုလို့ ပြောလို့ရပါတယ်။ဒါပေမယ့် နေ့စဉ်သောက်တားဆေးမှာမှ အမျိုးအစား(၂) မျိုးရှိတယ်ဆိုတာကိုတော့ လူတော်တော်များများမသိကြသေးပါဘူး။သောက်ပုံသောက်နည်းချင်းတူပေမယ့် အမျိုးအစားမတူတဲ့အတွက်ကြောင့် အသုံးဝင်ပုံချင်း နည်းနည်းကွဲတာကြောင့် အနည်းငယ်ရှင်းပြပေးလိုပါတယ်။
အမျိုးအစား (၂)မျိုးဆိုတာ
(၁) ဟော်မုန်း၂မျိုးပေါင်းဆေးကဒ်
(၂) ဟော်မုန်း ၁မျိုးတည်းပါဆေးကဒ်
နံပါတ် (၁) အကြောင်းအရင်ပြောပါမယ်။သူက ဟော်မုန်း ၂မျိုးပေါင်းပြီး သားဥကြွေခြင်းကိုအဓိကတားပါတယ်။ပါဝင်တဲ့ဟော်မုန်းများကတော့ အီစထရိုဂျင်(oestrogen)နဲ့ ပရိုဂျက်စတင်(progestin)ပါ။ဟော်မုန်း၂နှစ်မျိုးပေါင်းထားတဲ့ဆေးကဒ်ဖြစ်တာကြောင့် COC (Combined Oral Contraceptive) လို့ခေါ်ပါတယ် (Combined = ပေါင်းစပ်ထားသော Oral =ပါးစပ်ဖြင့်သောက်ရသည့် Contraceptive =ကိုယ်ဝန်တားဆေး)။
ဒီဆေးဟာ ကိုယ်ဝန်တားခြင်းအတွက်သုံးနိုင်တဲ့အပြင် ရာသီလာလျှင်အလွန်အမင်းကိုက်ခဲတတ်သူများ၊ရာသီသွေးအလွန်များသူများမှာလည်း သုံးနိုင်ပါတယ်။ဟော်မုန်းမညီမျှလို့ ဝက်ခြံထွက်သူတွေမှာလည်း အသုံးဝင်ပါတယ်။နောက်ပြီး သူက သားဥအိမ်ကင်ဆာ၊သားအိမ်ကင်ဆာတို့ကို ကာကွယ်ပေးနိုင်ကြောင်း လေ့လာချက်များမှတစ်ဆင့် သိရပါတယ်။
အကယ်၍ သင်ဟာ ဒီဆေးမှာပါဝင်တဲ့ အီစထရိုဂျင်(oestrogen)ဟော်မုန်းနဲ့ ဓာတ်မတည့်လျင်သော်လည်းကောင်း၊
– oestrogen ရဲ့ဘေးထွက်ဆိုးကျိုးတွေဖြစ်တဲ့ ပျို့တက်ခြင်း၊ရင်သားများနာကျင်ခြင်း စတာတွေကို မခံမရပ်နိုင်အောင် ခံစားရလျှင်သော်လည်းကောင်း၊
– သင့်မှာ သွေးတိုး၊ခေါင်းတစ်ခြမ်းကိုက် စတဲ့ရောဂါဝေဒနာများ ရှိနေလျှင်သော်လည်းကောင်း၊
– သင်ဟာ ဆေးလိပ်သောက်သူတစ်ယောက်ဖြစ်လျှင်သော်လည်းကောင်း၊
– သင့်အသက် ၃၅နှစ်ကျော်လျှင်သော်လည်းကောင်း …ခုပြောတဲ့ COC (ခေါ်) ဟော်မုန်း၂မျိုးပေါင်းဆေးကဒ်ကို သောက်သုံးရန်မသင့်တော်ပါဘူး။
– ကလေးနို့တိုက်နေတဲ့မိခင်တွေမှာ နို့ထွက်အနည်းငယ်နည်းသွားနိုင်လို့ နို့တိုက်နေစဉ် ဒီနည်းသုံးဖို့ အဆင်မပြေပြန်ဘူး။
ဒီလိုအခြေအနေမျိုးတွေမှာဆို သင့်အနေနဲ့အခြားသော သန္ဓေတားနည်းတစ်မျိုးမျိုး (သို့မဟုတ်) ခုဆက်လက်ဖော်ပြမယ့် ဟော်မုန်း ၁မျိုးတည်းပါဆေးကဒ် (POP) ကို ရွေးချယ်သုံးစွဲနိုင်ပါတယ်။
ကဲ နံပါတ် (၂)အကြောင်း ဆက်ပြောကြဦးစို့။သူကတော့ ပရိုဂျက်စတင်(Progestin)ဟော်မုန်းတစ်မျိုးသာပါတဲ့ ကိုယ်ဝန်တားဆေးပါ။POP (Progestin-Only Pill) လို့ခေါ်ပါတယ်(Progestin = ပရိုဂျက်စတင် Only = တစ်ခုသာပါသော Pill = ဆေးလုံး)။
သူကတော့ အဓိကအားဖြင့် သားအိမ်ခေါင်းအချွဲကို ပိုပျစ်စေ၊သားအိမ်အနားသတ်တွေကို ပါးစေခြင်းဖြင့် ကိုယ်ဝန်ရရှိခြင်းမှ ကာကွယ်ပေးတယ်။သင်သိထားရမယ့် တစ်ချက်ကတော့ ဒီဆေးကြောင့် ရာသီစက်ဝန်းအနည်းနဲ့အများ ပုံမမှန်မှုလေးတွေ ရှိနိုင်ပါတယ်။
ဘယ်လိုအခြေအနေမျိုးမှာ ဒီဆေးကိုရွေးချယ်နိုင်သလဲဆိုရင်…..
– သင့်အနေနဲ့ ကလေးကိုမိခင်နို့တိုက်နေလျှင်သော်လည်းကောင်း၊
– အထက်မှပြောထားခဲ့သလို…..အီစထရိုဂျင်(oestrogen)ဟော်မုန်းနဲ့ ဓာတ်မတည့်လျှင်သော်လည်းကောင်း၊
– oestrogen ရဲ့ဘေးထွက်ဆိုးကျိုးတွေဖြစ်တဲ့ ပျို့တက်ခြင်း၊ရင်သားများနာကျင်ခြင်း စတာတွေကို မခံမရပ်နိုင်အောင် ခံစားရလျှင်သော်လည်းကောင်း၊
– သင့်မှာ သွေးတိုး၊ခေါင်းတစ်ခြမ်းကိုက် စတဲ့ရောဂါဝေဒနာများ ရှိနေလျှင်သော်လည်းကောင်း၊
– သင်ဟာ ဆေးလိပ်သောက်သူတစ်ယောက်ဖြစ်လျှင်သော်လည်းကောင်း
– သင့်အသက် ၃၅နှစ်ကျော်လျှင်သော်လည်းကောင်း …ခုပြောတဲ့ ဟော်မုန်း ၁မျိုးတည်းပါဆေးကဒ် (POP) ကို ရွေးချယ်သုံးစွဲနိုင်ပါတယ်။
ခုပြောသွားတဲ့ နေ့စဉ်သောက်ဆေးကဒ် (၂) မျိုးစလုံးက …..သင့်အနေနဲ့ စနစ်တကျ အချိန်မှန် အသုံးပြုမယ်ဆိုပါက ၉၉ရာခိုင်နှုန်းအထိ ကိုယ်ဝန်တားနိုင်စွမ်းမြင့်မားတာမို့ ရွေးချယ်သင့်တဲ့ စိတ်ချရသော နည်းလမ်းများဖြစ်ပါကြောင်း…….
ပိုင်နီမောင်