မီးဖွားပြီးနောက်ဖြူဖျော့ပြီး အမောဖောက်ခြင်း

မီးဖွားပြီးနောက်ဖြူဖျော့ပြီး အမောဖောက်ခြင်း

သားသားမီးမီးလေးတွေမွေးပြီဆိုတာနဲ့ မေမေတို့ခမျာ တစ်နေ့နေ့ဒီကလေးနဲ့ပဲ ချာလည်တွေရိုက်၊ကိုယ့်ကိုယ်ကိုကျ ဂရုမစိုက်ဖြစ်နဲ့။အဲ့လိုမိမိကိုယ်ကိုဂရုမစိုက်ဖြစ်တော့ မဖြစ်သင့်တဲ့ဝေဒနာတွေ၊နာမကျန်းမှုတွေဖြစ်ပြီး လူပင်ပန်းရတတ်ပါတယ်။ဒီအထဲကမှ အဖြစ်များလေ့ရှိတဲ့ မီးဖွားပြီးသွေးအားနည်းတတ်တဲ့အကြောင်းလေးကိုသတိထားရအောင်ပြောပြချင်ပါတယ်။

မီးဖွားပြီးနောက်ပိုင်း ဖြူဖျော့အားနည်းပြီးအမောဖောက်တာဘာကြောင့်လဲ???

မီးဖွားပြီးနောက်သွေးအားနည်းရောဂါခံစားရတဲ့အခါမှာ ဖြူဖျော့အားနည်းတတ်ပါတယ်။ဒီအခြေအနေကနေမှ ပိုဆိုးလာခဲ့မယ်ဆိုရင်တော့ နှလုံးအားနည်း၍အမောဖောက်ခြင်းကိုခံစားရနိုင်ပါတယ်။ရောဂါပြင်းထန်လွန်းပါက အသက်သေဆုံးသည်အထိဖြစ်ပေါ်နိုင်ပါတယ်။

ဘာကြောင့်ဒီလိုဖြစ်ရသလဲ???

အောက်ပါအကြောင်းတွေကြောင့်ဖြစ်ပါတယ်-

၁)သံဓါတ်ပြည့်ဝစွာ စားသုံးမှုမရှိခြင်း။

-ကိုယ်ဝန်မရှိစဉ်အချိန်နဲ့ကိုယ်ဝန်ဆောင်စဉ်အချိန်မှာ သံဓါတ်ကိုပြည့်ဝစွာမစားသုံးပါက မီးဖွားပြီးတဲ့အခါမှာသွေးအားနည်းရောဂါကိုခံစားရနိုင်ပါတယ်။

-ကိုယ်ဝန်ဆောင်ချိန်တွင် တစ်ရက်ကို သံဓါတ်၄.၄မီလီဂရမ်လိုအပ်ပါတယ်။

-ဒါကြောင့်မို့ကိုယ်ဝန်ဆောင်စဉ်မှာ သံဓါတ်အားဆေးကိုမဖြစ်မနေသောက်ပေးရတာဖြစ်ပါတယ်။

-အနောက်နိုင်ငံတွေမှာဆိုရင် ကလေးယူတော့မယ်ဆိုတာနဲ့ သံဓါတ်အားဆေးကိုစတင်သောက်သုံးကြပါတယ်။

၂)ကလေးမွေးဖွားစဉ်သွေးဆုံးရှုံးမှုများခြင်းကြောင့်သွေးအားနည်းရခြင်း။

-မီးဖွားစဉ်အချိန်မှာ ပျမ်းမျှအနေနဲ့သွေး ၅ဝဝမီလီလီတာလောက်ဆုံးရှုံးရလေ့ရှိပါတယ်။

-ဒီဆုံးရှုံးသွားတဲ့ဟာကို သံဓါတ်အားဆေး၊အစာအာဟာရနဲ့ပြန်လည်ဖြည့်တင်းပေးဖို့လိုအပ်ပါတယ်။

၃)အခြားအူလမ်းကြောင်းဆိုင်ရာရောဂါများ။

-သံဓါတ်စုပ်ယူမှုကိုအနှောင့်အယှက်ဖြစ်စေနိုင်သော အစာအိမ်အူလမ်းကြောင်းဆိုင်ရာရောဂါများရှိနေခြင်းကလဲ သွေးအားနည်းခြင်းကိုဖြစ်ပေါ်စေနိုင်ပါတယ်။

မီးဖွားပြီးနောက် ဖြူဖျော့အမောဖောက်ခြင်းမဖြစ်အောင်ဘယ်လိုလုပ်ရမလဲ???

ကလေးမွေးဖွားပြီး သွေးအားနည်းခြင်း၊အမောဖောက်ခြင်းမဖြစ်ရလေအောင် ကိုယ်ဝန်မဆောင်ခင်၊ဆောင်နေစဉ်နဲ့မီးဖွားပြီးအချိန်တွေမှာပါ သံဓါတ်ပေါကြွယ်ဝသောအစားအစာများစားသုံးခြင်း၊သံဓါတ်အားဖြည့်ဆေးများသောက်သုံးခြင်းကိုပြုလုပ်ပေးရပါမယ်။ကိ်ုယ်ဝန်ဆောင်ပြီဆိုတာနဲ့ သံဓါတ်အားဆေး တစ်ရက်တစ်ပြား(၅မီလီဂရမ်)ကို မဖြစ်မနေသောက်သုံးပေးရမှာဖြစ်ပြီး ကလေးမီးဖွားပြီးပါကလဲဆရာဝန်ညွှန်ကြားထားတဲ့အချိန်အထိ ဆက်လက်သောက်သုံးပေးရမှာဖြစ်ပါတယ်။

ဒီစာလေးကိုဖတ်ပြီး မီးဖွားပြီးနောက်သွေးအားနည်းရောဂါမဖြစ်စေပဲ မိခင်ရောကလေးပါကျန်းမာအောင် ဂရုစိုက်နေထိုင်ရမယ့်အချက်ကလေးတွေကို သတိမူလိုက်နာကြဖို့လိုအပ်ကြောင်းသိကြပြီဖြစ်ပါတယ်။

ကျန်းမာပျော်ရွှင်သော မိခင်ဘဝကိုပိုင်ဆိုင်နိုင်ကြပါစေ။

dr.ye’lwin mm