‘ညှင်း’ တဲ့
ပုံမှန်အရေပြားအရောင်မဟုတ်တဲ့ အကွက်အကွက်ကလေးတွေနဲ့ အရေပြားမှိုရောဂါတစ်မျိုး။ ဖြစ်တဲ့နေရာမှာသိသာထင်ရှားပြီး လူမြင်မတင့်တယ်သောရောဂါ။ပွေးလိုအရမ်းယားပြီးဒုက္ခမပေးပေမယ့် ဒီဟာကကျ လူမြင်လွယ်တဲ့နေရာတွေမှာအဖြစ်များလို့ လူကြားထဲသွားလာတော့ကျ ဒုက္ခရောက်ရတယ်။ မနာကျင်၊မကူးစက်နိုင်ပေမယ့် ခန္ဓာကိုယ်ရဲ့ပေါ်လွင်ထင်ရှားတဲ့နေရာတွေမှာဖြစ်လေ့ရှိတာကြောင့် လူကြားထဲသွားလာရမှာမလုံမခြုံဖြစ်ပြီး စိတ်ပိုင်းဆိုင်ရာကိုထိခိုက်စေနိုင်ပါတယ်။
ညှင်းကိုနိုင်တဲ့ဆေးဝါးတွေသုံးစွဲတာတောင်မှ အရေပြားအရောင်ဟာပုံမှန်ပြန်ဖြစ်ဖို့လပေါင်းများစွာကြာနေလေ့ရှိပါတယ်။
ဒီ’ညှင်း’ဟာ လူခန္ဓာကိုယ်ရဲ့ဘယ်လိုနေရာတွေမှာအဖြစ်များတတ်လဲဆိုတာ ဒီနေ့ပြောပြပါမယ်။
ညှင်း ဘယ်နေရာတွေမှာအပေါက်များလဲ???
ညှင်းဟာ ဆယ်ကျော်သက်တွေနဲ့လူငယ်တွေမှာအဖြစ်များပါတယ်။ အနည်းငယ်ယားနိုင်ပြီး အလွယ်တကူမကူးစက်နိုင်သော အရေပြားမှိုရောဂါဖြစ်ပါတယ်။ နေရောင်ခြည်ဟာ ညှင်းကိုပိုမိုသိသာထင်ရှားစေပါတယ်။ ပူနွေးစွတ်စိုတဲ့ ရာသီတွေမှာမကြာခဏပြန်ဖြစ်လေ့ရှိပါတယ်။ အဆီပြန်တတ်တဲ့အသားအရေပိုင်ရှင်များ၊ဟော်မုန်းအပြောင်းအလဲနှင့် ကိုယ်ခံစွမ်းအားကျနေသူများမှာလဲ မကြာမကြာဖြစ်နိုင်ပါတယ်။
ခန္ဓာကိုယ်ရဲ့ အောက်ပါနေရာတွေမှာအပေါက်များလေ့ရှိပါတယ်…
၁)ပခုံး
၂)ကျောပြင်
၃)ရင်ဘတ်
၄)လည်ပင်းနဲ့
၅)လက်မောင်းအပေါ်ပိုင်းတွေမှာ အတွေ့များပါတယ်။
အဆိုပါနေရာတွေဟာ နေရောင်ခြည်အထိများတဲ့နေရာတွေလဲဖြစ်ပါတယ်။ ပုံမှန်အသားအရေထက်ပိုမိုဖျော့သော(သို့)ပိုမိုရင့်သော အကွက်ကလေးတွေအနေနဲ့တွေ့ရမှာဖြစ်ပါတယ်။ အရေပြားကွာခြင်း၊အနည်းငယ်ယားယံခြင်းများလဲရှိနိုင်ပါတယ်။
အထက်ပါနေရာတွေကတော့ ညှင်းအပေါက်များတဲ့နေရာတွေပဲဖြစ်ပါတယ်။ အားလုံးပဲ ပွေး၊ဝဲ၊ညှင်း ကင်းစင်၍ လှပကျော့ရှင်းသောအရေပြားလှလှလေးများ ပိုင်ဆိုင်နိုင်ကြပါစေကြောင်း။
dr.ye’lwin mm