ဆောင်းဝင်ခါစ အသားပတ်တာတွေကို ဘယ်လိုဖြေရှင်းကြမလဲ….

ရာသီဥတုက ဆောင်းဝင်နေပြီဆိုတော့ မနက်ခင်းစောစောတွေ၊ ညပိုင်းတွေကို အေးစပြုနေပါပြီ။ အသားခြောက်တာ အသားပတ်တာတွေများလာပြီး လက်တွေ၊ ခြေထောက်တွေမှာ အရေခွံကွာလာတာတွေပါဖြစ်လာကြပါတယ်။
ဒီလိုဆောင်းဝင်ခါစ အသားပတ်တာတွေကို ဘယ်လိုဖြေရှင်းလို့ရနိုင်မလဲဆိုရင်….

ပထမဆုံးအနေနဲ့က ရေပူနဲ့ရေချိုးတာမျိုးကိုရှောင်ပါ။ အရမ်းချမ်းတယ်ဆိုပြီး လူတွေက
ရေပူနဲ့ရေချိုးကြတာ၊ ရေနွေးနဲ့စပ်ပြီး ရေချိုးကြတာမျိုးတွေရှိပါတယ်။ ရေပူနဲ့ရေချိုးတာဟာ သင့်ခန္တာကိုယ်က သဘာဝအတိုင်းရှိနေတဲ့အဆီတွေကိုပါ ဖယ်ရှားလိုက်သလိုဖြစ်စေတဲ့အတွက်အသားခြောက်တာ၊ အသားပတ်တာတွေကို ပိုဆိုးစေပါတယ်။ ရေချိုးတဲ့အခါမှာလည်း ခပ်သွက်သွက်မြန်မြန်ချိုးပြီး အချိန်အကြာကြီးဇိမ်နဲ့ မချိုးမိအောင် သတိထားရပါမယ်။ နောက်သတိထားရမှာက ရေချိုးစဥ်အသုံးပြုတဲ့ဆပ်ပြာပါပဲ။ လူတော်တော်များများသုံးတဲ့ ပိုးသတ်ဆပ်ပြာတွေ၊ အနံ့အသက်ပျောက်စေတဲ့ဆပ်ပြာတွေက ခန္တာကိုယ်ကလိုအပ်တဲ့အဆီတွေကို သာမန်ဆပ်ပြာတွေထက်ပိုဖယ်ရှားနိုင်လို့ အသားပတ်တာ ကိုပိုဖြစ်စေပါတယ်။ ဒါပေမယ့် အခုလိုCovid crisis ဖြစ်နေတဲ့အချိန်မျိုးမှာတော့ ပိုးသတ်ဆပ်ပြာကိုပဲအသုံးပြုပြီး တခြားနည်းလမ်းတွေနဲ့ အသားပတ်တာ သက်သာအောင် ပြုလုပ်ဖို့အကြံပေးချင်ပါတယ်။

ရေချိုးပြီးတဲ့အခါ အသားအရေကို အစိုဓာတ်ထိန်းနိုင်အောင် Moisturizer /Lotion နဲ့
အသားအရေထိန်းအဆီတွေလိမ်းပေးပါ။ နောက်သတိထားရမှာတစ်ခုက အသားခြောက်နေတဲ့အချိန်မှာ Shaving လုပ်တာမျိုးတွေပါပဲ။ ဘာမှအသားအရေပေါ်မှာ ရိတ်ရတာလွယ်ကူအောင်အသုံးပြုထားတာမျိုးမရှိပဲ ဒီတိုင်းတန်းရိတ်တာဟာ အသားအရေခြောက်တာတွေ ပတ်တာတွေကိုပိုဆိုးစေရုံမက အရေပြားကျန်းမာရေး အတွက်ပါမကောင်းစေပါဘူး။ အဲ့တာကြောင့်Shaving cream ဖြစ်ဖြစ်အသုံးပြုပြီးမှ ရိတ်ပေးပါ။

နေရောင်ခြည်နဲ့ထိတွေ့မှုများတဲ့အခါ အသားအရေမှာအရေးအကြောင်းတွေပေါ်လာတာမျိုး၊ အသားခြောက် အသားပတ်တာမျိုးတွေပိုဖြစ်လာစေပါတယ်။ အဲ့တာကြောင့် နေပူထဲထွက်တဲ့အခါ SPF 30(သို့)50 လောက်ပါတဲ့Sunscreen မျိုးကိုအသုံး ပြုပေးဖို့လိုပါလိမ့်မယ်။ နောက်ဆုံးတစ်ခုကတော့ နှုတ်ခမ်းကိုလျှာနဲ့သပ်တတ်တဲ့အကျင့်ပါပဲ။ နှုတ်ခမ်းမှာက အဆီဂလင်းတွေမရှိတဲ့အတွက် ဒီလိုလျှာနဲ့သပ်သပ် နေတာမျိုးဟာနှုတ်ခမ်းခြောက်တာ အက်ကွဲတာမျိုးတွေပိုဖြစ်စေပါတယ်။ ဒါတွေ သက်သာအောင် နှုတ်ခမ်းထိန်းသိမ်းအဆီ၊ Lip balm လေးတွေအသုံးပြုပေး လို့ရနိုင်ပါတယ်။

ဒါတွေကတော့ ဆောင်းဝင်ခါစ လိုက်လုပ်ဆောင်သင့်တဲ့ အသားပတ်တာသက်သာ နည်းလေး တွေပါပဲ။

ဒေါက်တာလွမ်းရိပ်