အာထရာဆောင်းမရိုက်ခင် ဘာကြောင့်ဆီးအိမ်တင်းနေသင့်သလဲ

အမျိုးသမီးကျန်းမာရေးမှာ အရေးအကြီးဆုံးကဏ္ဌအဖြစ် ကိုယ်ဝန်ဆောင်ခြင်းနဲ့ မီးယပ်ဆိုင်ရာကျန်းမာရေးဟာ ထိပ်ဆုံးကနေဦးဆောင်နေပါတယ်။ ဒီလိုကိစ္စရပ်တွေမှာ မဖြစ်မနေပါဝင်ရတတ်တဲ့ စမ်းသပ်စစ်ဆေးမှုတစ်မျိုးကတော့ အာထရာဆောင်းပဲဖြစ်ပါတယ်။
အမျိုးသမီးများ သားဖွားနှင့်မီးယပ်ဆိုင်ရာ အာထရာဆောင်းရိုက်ရတယ်ဆိုတာဟာ သားအိမ်နဲ့ အမျိုးသမီးအင်္ဂါလမ်းတစ်လျှောက်မှာ ဖြစ်ပေါ်နေတဲ့အခြေအနေများကိုသိချင်တဲ့အတွက်ပဲဖြစ်ပါတယ်။ အထူးသဖြင့် ကိုယ်ဝန်ဆောင်များဟာဆိုရင် သားအိမ်ထဲမှာ သန္ဓေတွယ်နေတဲ့ သားသားမီးမီးအလောင်းလျာလေးတွေရဲ့ဖွံ့ဖြိုးမှုကိုသိရှိဖို့အတွက် အာထရာဆောင်းရိုက်ရပါတယ်။

အာထရာဆောင်းရိုက်တော့မယ်ဆိုရင် မရိုက်ခင်မှာ တစ်နာရီခန့်ကြိုတင်ပြီး ရေသောက်ထားရပါတယ်။ ရေသောက်တဲ့အခါမှာလည်း ရေကိုအနည်းဆုံး ဖန်ခွက်နှစ်ခွက်မှ တစ်လီတာတစ်ဘူး ကုန်တဲ့အထိ ကြိုသောက်ရပါတယ်။ ပြီးမှသာ အာထရာဆောင်းရိုက်မယ့်အခန်းကိုဝင်၊ သားအိမ်ရှိမယ့်အပေါ်ဘက်ဝမ်းဗိုက်ကို ဂျယ်လီတစ်မျိုးသုတ်လိမ်းပြီး စမ်းသပ်ကာ စစ်ဆေးရပါတယ်။

အာထရာဆောင်းရိုက်တဲ့အခါ ရေကိုတစ်ဝကြီးအရင်သောက်ခိုင်းရတဲ့အကြောင်းအရင်းရှိပါတယ်။ ပုံမှန်အနေအထားမှာဆိုရင် ဝမ်းဗိုက်ထဲက အူတွေဟာ ဗိုက်တစ်ခုလုံးနေရာယူကာ ဆီးခုံအောက်မှာရှိတဲ့ ဆီးအိမ်၊ သားအိမ်နဲ့သားဥပြွန်များကို ရံကာရှိနေတတ်ပါတယ်။ ဒီအခြေအနေမှာအာထရာဆောင်းရိုက်မယ်ဆိုရင် အူတွေဖုံးနေတဲ့အတွက် သားအိမ်နဲ့အထဲက သန္ဓေသားလေးကိုကောင်းကောင်းမမြင်ရတော့ပါဘူး။ ရေတစ်ဝသောက်လိုက်နဲ့အခါမှာတော့ ဆီးအိမ်တင်းသွားပြီး အူများကို ဘေးကိုတွန်းထုတ်လိုက်သလိုဖြစ်သွားတဲ့အတွက် သားအိမ်နဲ့သန္ဓေသားကို ကောင်းကောင်းစစ်ဆေးခွင့်ရသွားပါတော့တယ်။ ဒီအခါမှသာ သားဖွားမီးယပ်ဆိုင်ရာ လက္ခဏာများကို ကောင်းစွာဆုံးဖြတ်ချက်ချနိုင်ပါတော့တယ်။ ဒါကြောင့် အာထရာဆောင်းမရိုက်ခင် ရေသောက်ထားလို့ ဆီးအိမ်အောင့်တဲ့အတွက် စိတ်အနှောင့်အယှက်ဖြစ်နေမယ်ဆိုရင် ကိုယ့်ရဲ့ကျန်းမာရေး၊ သန္ဓေသားလေးရဲ့ကျန်းမာရေးအတွက် ခဏလေး သည်းခံပြီး စစ်ဆေးချက်အမှန်များရရှိဖို့ နားလည်ပေးကြနိုင်စေရန် တင်ပြလိုက်ပါတယ်။

မေတ္တာဖြင့်
စိုင်းမြတ်သူ