ကလေး ပေါင်မပြည့်ခြင်း

စိတ်ညစ်ရသော လူနာများတွင် ပေါင်မပြည့်သော မွေးကင်းစကလေးများလည်း ပါဝင်ပါသည်။ အကြောင်းမှာ ပေါင်မပြည့်သော ကလေးများသည် ပိုးတုံးလုံးလေးများနှင့် တူကြသည်။ ပိုးမွေးသလို မွေးနိုင်မှ ကျန်းကျန်းမာမာ ဖြစ်လာသောကြောင့် ရင်တမမ မွေးမြူရသော ကလေးများပါပေ။

ဘယ်အခါ ပေါင်မပြည့်ဘူး ခေါ်မလဲ။ ၅ပေါင် ၈အောင်စအောက် လျော့သော ကလေးများကို ပေါင်မပြည့်သော ကလေးများအဖြစ် သတ်မှတ်ထားပါသည်။ ၃ပေါင် ၄အောင်စအောက် ကလေးများကို ပြင်းထန်အဆင့် သတ်မှတ်ပြီး ၊ ၂ပေါင် ၃အောင်စ အောက်သည် သာလွန်ပြင်းထန်အဆင့် ဖြစ်ပါသည်။

ပိုးမွေးသလို ပြုစုရသည် ဆိုသည်မှာ…
၁။ အပူချိန် ထိန်းခြင်း
ပေါင်မပြည့်သော မွေးကင်းစကလေးများသည် ခန္ဓာကိုယ်တွင် လိုအပ်သော အဆီပမာဏ သာမန်ထက် နည်းပါးသောကြောင့် အပူချိန် ထိုးကျကာ အသက်ဆုံးရှုံးတတ်ပါသည်။ ထို့ကြောင့် ဖန်ပေါင်းချောင်အတွင်း ထားရှိကာ အပူချိန် ထိန်းပေးရပါသည်။

၂။ အာဟာရ စောင့်ရှောက်မှု
ပေါင်မပြည့် မွေးကင်းစများအတွက် အာဟာရကို ကိုယ်အလေးချိန်အလိုက် တွက်ချက်ကာ နာရီပိုင်းအလိုက် နာရီခြား၂နာရီခြား ၃နာရီခြား စသည်ဖြင့် တိုက်ကျွေးရပါသည်။ ထို့အပြင် ဗီတာမင်ကေ ထိုးနှံခြင်း၊ အားဆေးတိုက်ခြင်းများကိုလည်း ကလေးအခြေအနေအလိုက် ပြုလုပ်ကြရပါသည်။

၃။ ဓာတ်ဆားဖြည့်တင်းခြင်း
နေ့စဉ် ထွက်သော ဆီးပမာဏနှင့် တိုးလာသော ကိုယ်အလေးချိန်အားလျော်စွာ ဓာတ်ဆားဖြည့်တင်းပေးရပါသည်။

၎။ သွေးအားနည်းသော်

သွေးအားနည်းလျှင် လိုအပ်ပါက သွေးသွင်းရခြင်း၊ အသားဝါပါက မီးချောင်းပြခြင်းများ ဆောင်ရွက်ကြရပါသည်။

၅။ ပိုးမဝင်စေရန်
ဤအချက်မှာ အရေးအကြီးဆုံး ဖြစ်ပါသည်။ ပေါင်မပြည့်သောမွေးကင်းစများသည် ရောဂါပိုးများဒဏ်ကို မခံနိုင်သဖြင့် အထူးသတိထား ဆောင်ရွက်ကြရပါသည်။ ကလေးတစ်ယောက်မှ တစ်ယောက် အပြောင်းတွင် လက်ဆေးခြင်း၊ လူထူထပ်မှု မလိုလားသဖြင့် လူနာစောင့် မဝင်ရခြင်း၊ အချိန်ပြည့် သန့်ရှင်းရေး လုပ်ရခြင်း၊ အာဟာဖြည့်တင်းပေးရခြင်းတို့ဖြင့် ရောဂါမဖြစ်ပွားအောင် ဂရုစိုက်ကြရပါသည်။

ဤသို့သော အကြောင်းများကြောင့် ပိုးမွေးသလို မွေးရသည်ဆိုလျှင် ဆိုမိသူ လွန်အံ့ မထင်ပါလေ။

ဒေါက်တာယမင်း (ဆေး ၁)