‘တစ်သားမွေး တစ်သွေးလှစေဖို့’

အမျိုးသမီးတွေဟာ ကိုယ်ဝန်ဆောင်သားဖွားပြီးချိန်မှာ ခန္ဓာကိုယ်ရဲ့ ပြောင်းလဲမှုတွေကိုကြုံတွေ့ရတတ်ပါတယ်။ အဲဒီပြောင်းလဲမှုတွေကဘယ်လိုအရာတွေလဲ? ဒါတွေကို မေမေတို့ ဘယ်လိုရင်ဆိုင်ကြမလဲ? ဆိုတာကို အချက် (၆)ချက်နဲ့ လေ့လာကြည့်စေချင်ပါတယ်။

(၁)ခန္ဓာကိုယ်အပေါ်ပိုင်းဝဖြိုးလာခြင်း

ကိုယ်ဝန်ဆောင်ချိန်မှာ မိခင်လောင်းတွေဟာ ကိုယ်လက်လေ့ကျင့်ခန်းလုပ်တာ နည်းကြပါတယ်။ ဒါကြောင့် ခန္ဓာကိုယ်အပေါ်ပိုင်းတွေဖြစ်တဲ့ ပုခုံးသားတွေ လက်မောင်းတွေဟာ အဆီစုပြီးဝလာတာတတ်ကြပါတယ်။ ကြွက်သားနည်းလာပြီး လက်မောင်းသားတွေဟာ လျော့ရဲတတ်ပါတယ်။ ဒါ့အပြင်ကိုယ်ဝန်ဆောင်ချိန်မှာ Relaxin ဆိုတဲ့ဟော်မုန်းအများအပြားထွက်ထားတာကြောင့် ကလေးမွေးပြီးချိန်မှာ အဆစ်အမြစ်တွေပါ အားနည်းတတ်ပါတယ်။

ဘယ်လိုဖြေရှင်းမလဲ

အကောင်းဆုံးကတော့ ကိုယ်ဝန်ဆောင်နေစဉ်ကာလအတွင်းမှာကတည်းက့  မိခင်လောင်းတွေနဲ့သင့်တော်တဲ့ လေ့ကျင့်ခန်းတွေကို ပြုလုပ်သင့်ပါတယ်။ ကျွမ်းကျင်သူတွေနဲ့ တိုင်ပင်ပြီး လက်မောင်း ကျောဘက်နဲ့ ပုခုံးကြွက်သားတွေ အဆစ်အမြစ်တွေ သန်မာစေဖို့လေ့ကျင့်ခန်းပြုလုပ်ခြင်းဟာ ကလေးမွေးပြီးချိန်မှာဖြစ်တတ်တဲ့ အရိုးအဆစ်နာကျင်မှုတွေ ကြွက်သားအားနည်းတာတွေကိုကာကွယ်ပေးနိ်ုင်ပါတယ်။ မီးဖွားပြီးမှ လေ့ကျင့်ခန်းပြုလုပ်မယ်ဆိုရင်တော့ မီးဖွားပြီး ရက်သတ္တပတ်ခြောက်ပတ်ကြာမှ စတင်သင့်ပါတယ်။

(၂)ခြေလက်ဖောယောင်ခြင်း

ကိုယ်ဝန်ဆောင်စဉ်ကာလမှာ ခန္ဓာကိုယ်ဟာ သွေးနဲ့ ကိုယ်တွင်းအရည်များစွာကို သာမန်အချိန်ထက် အကြမ်းဖျင်း ငါးဆယ်ရာနှုန်းလောက်ပိုထုတ်ပေးပါတယ်။ဘာကြောင့်လဲဆိုတော့ သန္ဓေသားကြီးထွားဖို့လိုအပ်လို့ပါ။ ကိုယ်ဝန်ဆောင်စဉ်မှာ ဟော်မုန်းအပြောင်းအလဲအတက်အကျများစွာလည်းရှိတဲ့အတွက် မိခင်ဟာ ခြေ၊ လက်၊မျက်နှာ၊လည်ပင်းတို့မှာ ဖောယောင်တာတွေဖြစ်တတ်ပါတယ်။
မီးဖွားပြီးချိန်မှာ အဲလိုဖောယောင်တာတွေ ပြန်ကျဖို့ ရက်သတ္တပတ်အနည်းငယ်ကြာနိုင်ပါတယ်။

ဘယ်လိုဖြေရှင်းမလဲ

ပိုတက်စီယမ်ကြွယ်ဝတဲ့ ဟင်းသီးဟင်းရွက်နဲ့ အသီးအနှံတွေ စားပေးရပါမယ်။ပိုတက်စီယမ်ဓာတ်ဟာ ဖောယောင်မှုဖြစ်စေတဲ့ ဆိုဒီယမ်ကို ဆန့်ကျင်ဘက်အားနဲ့ချေဖျက်ပေးပါတယ်။ ပြီးတော့ တစ်နေ့ကို ရေရှစ်ခွက်လောက်အနည်းဆုံးသောက်သုံးပေးသင့်ပါတယ်။

(၃)ရင်သားများလျော့တွဲလာခြင်း

မီးဖွားပြီးခါစမှာ မိခင်တွေရဲ့ ရင်သားဟာ နို့ရည်ကြည်တွေနဲ့ပြည့်လာတာကြောင့် အရွယ်အစားကြီးလာပါတယ်။ ကိုယ်ဝန်ဆောင်ချိန်မှာ ဇီဝရုပ်ဖြစ်စဉ်ပြောင်းလဲတာကြောင့်ရော မီးဖွားပြီးချိန်မှာ နို့ချိုတိုက်ကျွေးမှုကြောင့်ရော ရင်သားတွေဟာ အရွယ်အစားကြီးမားလာပြီး လျော့ရဲလာပါတယ်။ တင်းရင်းမှုနည်းလာတတ်ပြီး အကြောပြတ်ရာများလည်းပေါ်လာတတ်ပါတယ်။

ဘယ်လိုဖြေရှင်းမလဲ

အမျိုးသမီးအများစုဟာ မိမိရဲ့အလှအပလျော့ကျသွားမှုအပေါ် မိခင်စိတ်တစ်ခုတည်းနဲ့ အနိုင်ယူနိုင်ကြပါတယ်။ ဒါပေမယ့်လည်း ရင်ဘတ်ကြွက်သားတွေ ပြန်လည်မြှင့်တင်ဖို့ ရင်သားတွေပြန်လည်တင်းရင်းဖို့အတွက် လေ့ကျင့်ခန်းတွေပြန်လည်ပြုလုပ်လို့ရပါတယ်။ အကြောပြတ်ရာတွေကိုသက်သာစေနိုင်တဲ့ အရည်အသွေးကောင်းတဲ့ အလှကုန်ဆေးဝါးတွေကို ဆရာဝန်နဲ့တိုင်ပင်ပြီး သုံးစွဲနိုင်ပါတယ်။

(၄)ဗိုက်သား

ကိုယ်ဝန်ဆောင်ချိန်မှာ အသိသာဆုံးပြောင်းလဲတဲ့နေရာကတော့ အားလုံးသိကြတဲ့အတိုင်း ဗိုက်ပဲဖြစ်ပါတယ်။ မိခင်ရဲ့ အသက်၊ မျိုးရိုးဗီဇ နဲ့ ကိုယ်ဝန်ဆောင်ချိန်တိုးလာတဲ့ ကိုယ်အလေးချိန်ပေါ်မူတည်ပြီး မီးဖွားပြီးချိန်မှာ အကြောပြတ်ရာတွေ လျော့ရဲမှုတွေနဲ့ ဗိုက်ကလေးဟာ ပူပြီးကျန်ခဲ့တတ်ပါတယ်။

သန္ဓေသားကိုကိုးလမှာဆယ်လတိုင် လွယ်ခဲ့ရတဲ့ သားအိမ်ဟာ သားဖွားပြီးချိန်မှာ မူလအရွယ်အစားကိုပြန်ရောက်ဖို့ အချိန်ခြောက်ပတ်လိုအပ်ပါတယ်။ သားအိမ်ဟာ မူလအရွယ်အစားကိုပြန်ရောက်တဲ့အခါ ဗိုက်သားတွေဟာ လျော့ရဲသွားပါတယ်။ ဘာနဲ့တူသလဲဆိုရင် ကြုံ့နိုင်ဆန့်နိုင်တဲ့ သားရေအိတ်ထဲကို ပစ္စည်းအပြည့်အသိပ် အကြာကြီးထည့်ပြီးမှ အဲဒီပစ္စည်းတွေကိုပြန်ထုတ်လိုက်တဲ့အခါ သားရေအိတ်ဟာလျော့ရဲကျန်ခဲ့တဲ့ပုံစံနဲ့ အလားသဏ္ဏာန်တူပါတယ်။

ဘယ်လိုဖြေရှင်းမလဲ

ဒီဗိုက်သားလျော့ရဲမှုပြသနာဟာလည်း ခန္ဓာကိုယ်အပေါ်ပိုင်းကြွက်သားတွေ ဝဖြိုးလာတာ အားနည်းလာတာကိုဖြေရှင်းရမယ့်နည်းလမ်းနဲ့ ဆင်တူပါတယ်။ အပျိုဘဝနဲ့ ကိုယ်ဝန်ဆောင်ချိန်မှာတည်းက နောက်ကျောနဲ့ ဝမ်းဗိုက်ကြွက်သားအားကောင်းစေမယ့် လေ့ကျင့်ခန်းတွေကို ပြုလုပ်ပေးသင့်ပါတယ်။ အဲလိုပြုလုပ်ထားတဲ့လူဆိုရင် မိမိလိုချင်တဲ့ခန္ဓာကိုယ်ကို ပြန်ရနိင်ဖို့ပိုလွယ်ကူပါလိမ့်မယ်။

(၅) ပေါင်နဲ့တင်သားအဆီတိုးလာမှု

ကိုယ်ဝန်ဆောင်ချိန်မှာ ကိုယ်အလေးချိန်တိုးလာတာ သဘာဝပါ။ အဆီပိုတွေဟာ များသောအားဖြင့် အမျိုးသမီးတွေရဲ့ တင်သား၊ ပေါင်နဲ့ ပေါင်ဘေးဘက်တွေမှာ စုလာပါတယ်။

ဘယ်လိုဖြေရှင်းမလဲ

မီးဖွားပြီးချိန်မှာ သင့်တင့်မျှတတဲ့အစာအာဟာရစားသုံးပြီး လေ့ကျင့်ခန်းပုံမှန်လုပ်ခြင်းဟာ တက်ထားတဲ့ကိုယ်အလေးချိန်ကိုပြန်လည်လျော့ကျစေပါတယ်။ တစ်ခါတစ်ရံမှာ အမျိုးသမီးတစ်ယောက်ဟာ သားဖွားပြီးချိန်ကျန်ခဲ့တဲ့ ကိုယ်အလေးချိန်ကနေ မူလကိုယ်အလေးချိန်ကိုရောက်ဖို့ လများစွာကြာတတ်ပါတယ်။ ဒါပေမယ့် အမျှင်ဓာတ်ပါတဲ့အသီးအနှံတွေများများ စားပေးတာ၊ အဆီလျှော့စားတာ ၊ ကိုယ်လက်လှုပ်ရှားမှုလေ့ကျင့်ခန်းတွေ သေချာလုပ်ပေးမယ်ဆိုရင်တော့ ပိုပြီးမြန်မြန်ဆန်ဆန် အလေးချိန်ကျနိုင်ပါတယ်။

(၆)မျိုးပွားအင်္ဂါ

နောက်ဆုံးပြောချင်တဲ့အချက်ကတော့ သဘာဝနည်းအတိုင်းမွေးဖွားတဲ့ မိခင်တွေအတွက်ပါ။ မိခင်တွေဟာ မီးဖွားစဉ်မှာ မိန်းမကိုယ်လမ်းကြောင်းကို ကလေးမွေးရလွယ်ကူအောင် ညှပ်ပြီးချဲ့ပေးရခြင်းကို ပြုလုပ်ရပါတယ်။ ကလေးမွေးစဉ်မှာ ညှစ်အားကြောင့် အခန့်မသင့်ဘဲ မိန်းမကိုယ်နဲ့ စအိုကြားက perineum လို့ခေါ်တဲ့နေရာ စုတ်ပြဲတတ်ပါတယ်။ အဲလိုနေရာတွေကို ပြန်လည်ချုပ်ပြီးတဲ့အခါ အနာကျက်ဖို့ အနည်းဆုံး ခြောက်ပတ်လိုအပ်ပါတယ်။

အဲဒါအပြင် ဆီးမထိန်းနိုင်မှုတွေလည်း ဖြစ်တတ်ပါတယ်။ အချို့အမျိုးသမီးတွေကတော့ မီးဖွားပြီးနောက်ပိုင်းမှာ လိင်ဆက်ဆံစဉ်အလွန်အမင်းနာကျင်မှုကိုခံစားရတတ်ပါတယ်။ အဲဒါဟာဘာကြောင့်လဲဆိုတော့ ဆီးအိမ်၊ သားအိမ်နဲ့ အစာဟောင်းအိမ်တို့ဟာ ကလေးမွေးစဉ်မှာ အနေအထားမမှန်မှုတွေဖြစ်သွားရာကနေ မိန်းမကိုယ်ရဲ့ ကြွက်သားတွေကိုဆွဲညှစ်ထားသလိုဖြစ်ပြီး နာကျင်မှုရစေတာဖြစ်ပါတယ်။

ဘယ်လိုဖြေရှင်းမလဲ

မိန်းမကိုယ်မှာရှိတဲ့ကြွက်သားတွေ ပုံမှန်အနေအထားပြန်ဖြစ်ဖို့ Kegels လေ့ကျင့်ခန်းလုပ်သင့်ပါတယ်။ အဲဒီလေ့ကျင့်ခန်းဟာ မိန်းမကိုယ်ပတ်လည်က ကြွက်သားတွေကို ကျုံ့နိုင်သလောက်ကျုံ့ပေးထားပြီး ပြန်လည်ဖြေလျှော့လိုက် ပြန်ကျုံ့လိုက် လုပ်ရတဲ့လေ့ကျင့်ခန်းမျိုးဖြစ်ပါတယ်။ လွယ်ကူပြီး ထိရောက်တဲ့လေ့ကျင့်ခန်းတစ်ခုလည်းဖြစ်ပါတယ်။

လိင်ဆက်ဆံချိန်နာကျင်မှုကို ဖြေရှင်းဖို့နည်းလမ်းတစ်ခုကတော့ ဖြေလျှော့ခြင်းနည်းလမ်းပဲဖြစ်ပါတယ်။ စိတ်ကိုဖြေလျှော့ထားဖို့ရယ်နဲ့ ခန္ဓာကိုယ်ကြွက်သားတွေကိုလည်း တင်းမထားဘဲ လျှော့ထားဖို့ရယ်ဖြစ်ပါတယ်။

အထက်ပါအကြောင်းအရာတွေဟာ မီးဖွားပြီးကာစ မိခင်တို့ရင်ဆိုင်တွေ့ကြုံရမယ့်အရာတွေဖြစ်ပါတယ်။ မိခင်များဟာ ရုပ်ပိုင်းဆိုင်ရာရော စိတ်ပိုင်းဆိုင်ရာပါ ရင်သွေးအတွက်ပေးဆပ်ရတာတွေများပြားလှပါတယ်။ ဒီအချက်လေးတွေကိုသိရှိပြီး ဆင်ခြင်လိုက်နာရင်းနဲ့ ကျွန်မတို့ပတ်ဝန်းကျင်မှာပြောလေ့ရှိကြတဲ့ တစ်သားမွေး တစ်သွေးလှဆိုတဲ့စကားနဲ့ ကိုက်ညီအောင် နေထိုင်နိုင်ပါတယ်ဆိုတာကို ဝေမျှလိုက်ရပါတယ်။

မောင် (ဆေး ၁)