မွေးလာမယ့် ကလေးငယ်အတွက် ဘာတွေကြိုတင်ပြင်ဆင်ထားသင့်သလဲ

ကလေးမွေးတယ်ဆိုတာ စိတ်လှုပ်ရှားရင်ခုန်ဖို့ကောင်းပါတယ်..။ လောကကြီးထဲကို ကိုယ့်ရဲ့ကိုယ်ပွားလေးရောက်လာတော့မယ်ဆိုတဲ့အသိနဲ့ ပီတိဖြစ်ဖို့လည်းကောင်းတဲ့ကာလပါ..။ ဒါပေမယ့် တစ်ဖက်မှာလည်း သင့်ရင်သွေးလေး အဆင်ပြေပြေချောချောမွေ့မွေ့နဲ့ မွေးဖွားရှင်သန်နိုင်ဖို့ ကြိုပြင်ဆင်ထားသင့်တာတွေလည်းရှိပါတယ်..။

(၁) ကလေးအတွက် အထုပ်ပြင်ထားပါ

ကလေးအနှီး(အဖြူရောင်ပဲ ဖြစ်ရပါမယ်).. သေးခံ… ခေါင်းစွပ်.. ခြေအိတ်.. လက်အိတ်… နောက်ကွဲအကျီ… အိပ်ရာ… ခြင်ထောင်… သန့်ရှင်းရေးသုံးပစ္စည်းတွေဖြစ်တဲ့ ဂွမ်းခြောက်… wet tissue…စောင်… ခွခေါင်းအုံးအသေး…baby oil… ကလေးခေါင်းလျှော်ရည်.. ကိုယ်တိုက်ဆပ်ပြာ…ကလေးအ၀တ်လျှော်ဆပ်ပြာ..ကလေးလက်သည်းညှပ်…စသဖြင့် ဒီအိတ်ထဲမှာ စုံစုံလင်လင်ပါနေသင့်ပါတယ်..။

(၂)ကလေးဝတ်မယ့်အ၀တ်တွေအနှီးတွေကို ကြိုတင်လျှော်ဖွပ်ထားပါ

ကလေးတွေရဲ့ အသားအရေဟာ နူးညံ့ပြီး အထိခိုက်မခံပါဘူး..။ မမြင်နိုင်တဲ့ရောဂါပိုးတွေကို ခံနိုင်ရည်စွမ်းလည်းနည်းပါတယ်..။ ဓာတ်မတည့်တာမျိူးလည်းဖြစ်နိုင်တာမို့ မွေးကင်းစကလေးငယ် ၀တ်မယ့်အ၀တ်အစားတွေကို ကြိုတင်လျှော်ဖွပ်ထားတာအကောင်းဆုံးပါပဲ..။ ပျော့ပျောင်းတဲ့ ချည်သားလိုအထည်မျိူးကိုပဲ ပေးဝတ်သင့်ပါတယ်..။

(၃) မွေးကင်းစကလေးပြုစုစောင့်ရှောက်ရေးသင်တန်းတွေ ဖြစ်နိုင်ရင်ကြိုတက်ထားပါ

ပုံစံတကျနို့တိုက်နည်း.. အဟာဟာရပြည့်အောင် စားသုံးနည်း… ကလေးပြုစုစောင့်ရှောက်နည်း..ရောဂသင်တန်း …စသဖြင့် သင်တန်းတွေတက်ခြင်းဟာ မိခင်ရော ကလေးအတွက်ပါ အကျိူးရှိနိုင်ပါလိမ့်မယ်..။

(၄) ရေမလိုတဲ့ လက်ဆေးဆပ်ပြာရည် hand gel ဆောင်ထားပါ

ကလေးကို မကြာခဏ ထိတွေ့ကိုင်တွယ်မယ့် မိသားစုဝင်တွေအတွက် ကလေးကိုကိုင်တွယ်ခါနီးတိုင်း ဆပ်ပြာနဲ့လက်ဆေးတာလုပ်သင့်ပါတယ်..။ သုံးရလွယ်ကူမြန်ဆန်တဲ့ hand gel တစ်ဘူးဝယ်ထားတာကလည်း အကျိူးထူးစေပါလိမ့်မယ်..။

(၅) မွေးမယ့်နေရာကို ကြိုတင်စဉ်းစားထားပါ

ကိုယ်နေတဲ့အိမ်နဲ့ သိပ်မလှမ်းတဲ့ဆေးရုံ ဆေးခနိးမျိူးကို ကြိုတင်ရွေးချယ်ထားပါ..။ လိုအပ်ရင် ကြိုတင်ဘွတ်ကင်လုပ်ထားပါ..။

(၆) သင့်တော်မှန်ကန်တဲ့ ကိုယ်ဝန်စောင့်ရှောက်မှူခံယူပါ

ကိုယ်ဝန်လရင့်မှ ကလေးလှူပ်မှ ကိုယ်ဝန်အပ်ရတယ်ဆိုတာ အင်မတန်မှားယွင်းတဲ့ အယူအဆပါ..။ ကိုယ်ဝန်ရှိတယ်လို့ သိတာနဲ့ တတ်ကျွမ်းနားလည်တဲ့ ဆရာဝန် ဆရာမဆီမှာ ကိုယ်ဝန်ဆောင်စောင့်ရှောက်မှူခံယူပါ..။ ကာကွယ်ဆေးတွေ အကြိမ်ပြည့်ထိုးပါ..။

(၇) အာဟာရပြည့်ဝအောင်စားပါ

ကဖင်းဓာတ်ပါတဲ့ အစားအစာတွေ… မလတ်ဆတ်တဲ့ သားငါးတွေ… သေချာမချက်ပြုတ်ထားတဲ့အရာတွေကလွဲရင် အစားစုံစားသင့်ပါတယ်..။ မွေးလာမယ့်ရင်သွေးဟာ မိခင်စားသုံးတဲ့ အစားအသောက်တွေက တဆင့်အာဟာရကို ရတာမို့ မိခင်အစားရှောင်တဲ့အခါ မလိုလားအပ်တဲ့ နောက်ဆက်တွဲဆိုးကျိူးတွေရှိလာနိုင်ပါတယ်..။

(၈) မိခင်ကနေ ကလေးကို ကူးနိုင်တဲ့ရောဂါပိုးတွေရှိမရှိစစ်ဆေးထားပါ

ဘီပိုး စီပိုး HIV ပိုးနဲ့ ကာလသားရောဂါတွေရှိမရှိ ကြိုတင်စစ်ဆေးထားသင့်ပါတယ်..။ မိခင်မှာ ရောဂါပိုးတစ်ခုခုရှိရင် ကလေးငယ်ကို ကူးစက်နှုန်းလျော့နည်းသွားအောင်ပေးရတဲ့ ဆေးတွေရှိပါတယ်..။

မေတ္တာဖြင့်
ဒေါက်တာ စိမ်းမိုးစက်