“လူငယ်များနဲ့ HIV အန္တရာယ်”

နှစ်စဉ်နှစ်တိုင်း ဒီဇင်ဘာလ (၁)ရက်နေ့ဆိုရင် ကမ္ဘာ့ ခုခံအားကျဆင်းမှုရောဂါ တိုက်ဖျက်ရေးနေ့ (World AIDS Day) ကို ကျင်းပလေ့ ရှိကြပါတယ်။ လူထုကြားထဲမှာ ဒီရောဂါနဲ့ ပတ်သက်ပြီး အသိပညာ ကြွယ်စေဖို့ ရည်ရွယ်ချက်နဲ့ လုပ်ဆောင်ကြတာပါ။ ဒီနှစ်မှာလည်း My Health, My Right ဆိုပြီး လူတစ်ယောက်အတွက် ကျန်းမာရေးဟာ အခြေခံအကျဆုံး လူအခွင့်အရေးတစ်ရပ် ဖြစ်တယ် ဆိုတဲ့အသိကို လူထုကြားထဲ ကျယ်ကျယ်ပြန့်ပြန့် သိသွားအောင်လို့ ဆောင်ပုဒ်သတ်မှတ်ထားပါတယ်။

HIV ပိုးဟာ အရင်နှစ်တွေကဆို တော်တော်လေး လူပြောသူပြောများတယ်။ စိုးရိမ်တကြီး ရှိကြတယ်။ ခုချိန်မှာတော့ ဒီရောဂါကို လူတိုင်းလည်း သိနေပြီ။ ကြားဖူးနေကြပြီ။ ဆိုတော့ ဖြစ်နှုန်းတွေပဲ ကျကုန်တာလား၊ လူတွေအကုန်လုံးဟာ ဒီရောဂါကို ကာကွယ်နိုင်နေကြပြီလား စဉ်းစားမိတယ်။ အချက်အလက်တွေအရတော့ ဒီလိုမဟုတ်ပါဘူး။ ခုချိန်ထိ HIV ပိုးဟာ ကြောက်စရာကောင်းတဲ့ ရောဂါတစ်ခုအဖြစ် ရှိနေပါသေးတယ်။ နောက်ပြီး လူအများစုကလည်း HIV ဆိုတာကို ကြားသာကြားဖူးနေတာပါ။ ဘယ်လိုကာကွယ်ရမယ်၊ ဘာတွေလုပ်သင့်တယ် ဆိုတာတွေနဲ့ ပတ်သက်လို့ ကောင်းကောင်းမသိကြသေးပါဘူး။

ဒီဆောင်းပါးမှာတော့ လူငယ်တွေအတွက် ရည်ရွယ်လို့ ရေးပြချင်ပါတယ်။

၁။ တစ်ခါတည်းနဲ့လည်း ကူးနိုင်ပါတယ်

ခုခေတ်မှာ လူငယ်တွေကြားထဲ လိင်မှုပုံစံတွေက ပြောင်းလဲလာနေပါပြီ။ အရင်လို အိမ်ထောင်ကျမှ အတူနေကြမယ် ဆိုတာမျိုးက သိပ်ရှားနေပြီး ရည်းစားဘ၀မှာကတည်းက အတူနေကြတယ်။ နောက်ပိုင်းမှာဆို One night stand လို့ခေါ်တဲ့ ယဉ်ကျေးမှုတွေတောင် ရှိလာပြီ။ အဲဒါ ဘာလဲဆိုတော့ ရည်းစားလည်းမဟုတ်၊ စေ့စပ်ထားသူလည်းမဟုတ်ဘဲ ကလပ်တွေ၊ ဘားတွေသွားရင်း တစ်ယောက်ကိုတစ်ယောက် သဘောကျမိလို့ ဒီတစ်ညတည်း နှစ်ဦးသဘောတူ အတူနေကြတာမျိုး။ ပြီးရင် သူလည်း သူ့လမ်းသူသွား၊ ကိုယ်လည်း ကိုယ့်လမ်းကိုယ်သွား။ ဒါမျိုးပုံစံ။ မှန်တယ်မှားတယ်ပြောနေတာထက် ဒီလိုပတ်သက်မှုတွေကနေ နောက်ဆက်တွဲအနေနဲ့ ပိုးကူးစက်မခံရအောင်တော့ သတိထားဖို့လိုပါတယ်။

HIV ပိုးမှာက ထူးခြားတဲ့သဘာဝ ရှိပါတယ်။ ဘာလဲဆိုတော့ ပိုးဝင်ဝင်ချင်း လက္ခဏာ မပြတတ်ဘူး။ ပိုးဝင်ပြီး နှစ်တွေကြာလာမှ သိတာ။ ဒါကြောင့်မို့ ကြည့်လိုက်ရုံနဲ့ ပိုးရှိမရှိ ဘယ်လိုမှမသိနိုင်ဘူး။ နောက်ပြီး ဒီရောဂါမျိုးက လူရဲ့အဆင့်အတန်းနဲ့လည်း မဆိုင်ဘူး။ ချမ်းသာတဲ့ အသိုင်းအ၀ိုင်းမို့ မရှိလောက်ပါဘူးလို့ ယတိပြတ် ပြောမရပါဘူး။ ဒါကြောင့် ဒါကို သတိထားဖို့လိုပါမယ်။ One night stand လို ခေတ်လွန်ယဉ်ကျေးမှုမျိုးအထိ မဟုတ်တောင် တစ်ကြိမ်တစ်ခါတော့လည်း မှားနိုင်တာပဲ။ လူငယ်ဆိုတာက လက်တည့်စမ်းချင်တာကိုး။ အိမ်ထောင်သည်တွေကိုလည်း အမြဲသစ္စာရှိနေမယ် တွက်ထားလို့ မရပါဘူး။

ဒါကြောင့် သတိထားစေလိုတာက ဘယ်သူနဲ့ပဲဆက်ဆံဆက်ဆံ၊ ဘယ်လိုအခြေအနေမျိုးမှာဖြစ်ဖြစ် ကွန်ဒုံးအမြဲသုံးဖို့ လိုမယ်ဆိုတာပါပဲ။ မိန်းကလေးတွေအနေနဲ့လည်း ကွန်ဒုံးပါမလာဘူးဆို လက်မခံပါနဲ့။ ခုခေတ်မှာ ဒါတွေက လွယ်လွယ်ကူကူလည်း ၀ယ်လို့ရနေပါပြီ။ ရှက်စရာကိစ္စတစ်ခုလို မြင်နေမယ့်အစား ကိုယ့်အတွက် ရောဂါကာကွယ်ပေးမယ့်ပစ္စည်းတစ်ခုလို သဘောထားစေချင်တယ် ကွန်ဒုံးသုံးရင် ခံစားမှုကို လျော့စေတယ်ဆိုတဲ့ အကြောင်းပြချက်နဲ့ မသုံးဘဲနေလိုက်ရင် အကြီးအကျယ် ဒုက္ခဖြစ်သွားနိုင်လို့ပါပဲ။

၂။ မိန်းကလေးတွေ သတိထားဖို့

လေ့လာချက်တွေအရ HIV ပိုး အသစ်ကူးစက်ခံရသူ အိမ်ထောင်သည်အမျိုးသမီးတွေထဲမှာ တော်တော်များများက ကိုယ့်ယောကျာ်းဆီကနေ ကူးစက်ခံရတာ ဖြစ်ပါတယ်။ အဲဒီယောကျာ်းတွေကရော ဘယ်ကနေ ရပါသလဲ။ အပျော်အပါး လိုက်စားခြင်းကနေ အများဆုံးရပါတယ်။ ပြည့်တန်ဆာနဲ့ အကာအကွယ်မဲ့ လိင်ဆက်ဆံတယ်၊ နောက်ပြီး ခုနောက်ပိုင်းမှာဆို အမျိုးသားအချင်းချင်း လိင်ဆက်ဆံတာတွေပါ ရှိလာတယ်။

အမျိုးသားအချင်းချင်း လိင်ဆက်ဆံသူနဲ့ Gay (မိန်းမလျာ)နဲ့ကို မရောထွေးစေလိုပါဘူး။ အမျိုးသားအချင်းချင်း လိင်ဆက်ဆံသူတိုင်းကို Man who have sex with man (MSM) လို့ ခေါ်ပါတယ်။ အဲဒါက မိန်းမလျာလည်း ဖြစ်နိုင်တယ်၊ သူနဲ့ဆက်ဆံဖက်ဟာလည်း MSM ပါပဲ။ ဆိုလိုတာက မိန်းမလိုဝတ်စားထားမှ မဟုတ်ဘူး။ ယောကျာ်းရင့်မာကြီးလည်း ဖြစ်နိုင်တယ်၊ မှုန်နေအောင်ချောတဲ့သူကလည်း MSM ဖြစ်နိုင်တယ်။ ဒါကြောင့် ငါ့ယောကျာ်းက ကျားကျားလျားလျားကြီး၊ ဒါမျိုးမဟုတ်ဘူး လို့ သတ်မှတ်လို့မရဘူး။ ဒါသည် အပြင်ပန်းသဏ္ဍန်နဲ့ မဆိုင်ဘူး။ သူ့ရဲ့ လိင်စိတ်တိမ်းညွှတ်မှု (Sexual orientation) နဲ့ပဲ ဆိုင်တယ်။ အဲဒါကို သဘောပေါက်မထားဘဲ အမှုမဲ့အမှတ်မဲ့နေလိုက်လို့ မရဘူး။

တစ်ခါတုန်းက ကျွန်တော့်ဆီကို အိမ်ထောင်သည်စုံတွဲတစ်တွဲ ဆေးခန်းလာပြပါတယ်။ တကယ်တော့ သူတို့နှစ်ယောက်က သွေးစစ်ဆေးပြီးသားပါ။ နှစ်ယောက်လုံးမှာ HIV ပိုးရှိနေပါတယ်။ အဲဒါကို ဘာဆက်လုပ်သင့်သလဲလို့ လာတိုင်ပင်တာပါ။ ဘယ်က ဘယ်လိုကူးတာလဲဆိုတော့ သူတို့ပြောပုံအရ အမျိုးသားဖြစ်သူက သူငယ်ချင်းတွေနဲ့ ဆုံကြတုန်း တစ်နေရာမှာ မိန်းမလျာတွေကို တွေ့တော့ တစ်ခါတစ်လေ စမ်းကြည့်ကြမယ်ဆိုပြီး လိင်ဆက်ဆံလိုက်တယ်။ ပြီးတော့ ဒီအတိုင်းပဲ အမှုမဲ့အမှတ်မဲ့ နေလိုက်တာပေါ့။ အဲဒီမှာတင် သူ့ဆီကူးသွားတဲ့ ပိုးက သူ့မိန်းမဆီကိုလည်း ထပ်ကူးတယ်။ မိန်းမက အစပိုင်းတော့ သွေးပျက်သွားပေမယ့် နောက်တော့ တစ်ခါတစ်လေ မှားသွားတဲ့ သူ့ယောကျာ်းကို ခွင့်လွှတ်လိုက်တယ်။ တစ်ခါတစ်လေ ဆိုပေမယ့်လည်း ဘယ်လိုပဲဖြစ်ဖြစ် နှစ်ယောက်လုံးမှာတော့ ဒီပိုးဟာ ကူးစက်ခံလိုက်ရပြီ။

ဒါကြောင့်မို့ အမျိုးသားတွေအနေနဲ့ ကိုယ့်ရဲ့လိင်မှုကိစ္စကို ဆင်ခြင်နိုင်ကြဖို့ လိုတယ်။ မဆင်ခြင်နိုင်လည်း အကာအကွယ်သုံးဖို့ လိုပါတယ်။ မတော်တဆများ အကာအကွယ်မဲ့ ဆက်ဆံမိခဲ့ရင်လည်း ရိုးရိုးသားသား ဖွင့်ပြောပါ။ သွေးစစ်ဆေးပါ။ ကိုယ့်ဆီကနေ ကိုယ့်မိန်းကလေး၊ ကိုယ့်အိမ်ထောင်ဖက်ဆီ မကူးအောင် တာဝန်ယူပေးပါ။

မိန်းကလေးတွေအနေနဲ့လည်း ဒါဟာ တစ်ကြိမ်တစ်ခါတည်းနဲ့ ကူးစက်သွားနိုင်တဲ့ ရောဂါမို့ မမျှော်လင့်ဘဲ ကိုယ့်ချစ်သူဆီမှာ ဒီပိုးက ရှိနေနိုင်တယ်လို့ သတိရှိပေးပါ။ လက်မထပ်ခင် သွေးစစ်ဆေးကြည့်ပါ။ ဒါဟာ တစ်ယောက်ကိုတစ်ယောက် မယုံကြည်လို့မဟုတ်ဘဲ ကျန်းမာရေးအတွက် လုပ်သင့်လုပ်ထိုက်တဲ့အလုပ်တစ်ခု အဖြစ် မြင်ပေးပါ။ သစ္စာရှိပါတယ်ဆိုပေမယ့်လည်း တစ်ကြိမ်တစ်ခါလောက် မှားသွားတယ်ဆိုတာမျိုးက ရှိနိုင်တာမို့ ဒါဟာ ယုံကြည်ခြင်း၊ မယုံကြည်ခြင်းနဲ့ မသက်ဆိုင်ဘဲ ကိုယ့်မိသားစုနောင်ရေး၊ ကိုယ့်ဆီရောက်လာမယ့် သားသမီးတွေနောင်ရေးအတွက် အရေးကြီးတဲ့ကိစ္စ တစ်ခုဖြစ်ပါတယ်။ နောက်ပြီး အရေးကြီးဆုံးကတော့ ကိုယ်နဲ့ ကိုယ့်အိမ်ထောင်ဖက်ကြား လိင်မှုကိစ္စတွေ၊ ဒီလိုကူးစက်ရောဂါတွေနဲ့ ပတ်သက်ပြီး ပွင့်ပွင့်လင်းလင်း ဆွေးနွေးပြောဆိုနိုင်ကြဖို့ပါပဲ။

ဒေါက်တာဖြိုးသီဟ