သွားပိုးစားခြင်းအဖြစ်အများဆုံးသော သွားမျက်နှာပြင်များ

သွားတစ်ချောင်းမှာ မျက်နှာပြင်နေရာ အမျိုးမျိုးရှိတဲ့အနက် တစ်ချို့မျက်နှာပြင်တွေဟာ သွားပိုးစားရောဂါအဖြစ်အများဆုံးနေရာတွေ ဖြစ်ကြပါတယ်။ အမှန်တကယ်တော့ အဆိုပါနေရာတွေဟာ အစားအစာအများဆုံး တွယ်ကပ်နေတတ်ကြတဲ့ မျက်နှာပြင်တွေဖြစ်ပြီး သွားသန့်ရှင်းရေးအားနည်းတဲ့အတွက် အဆိုပါမျက်နှာပြင်တွေမှာ သွားပိုးစားရောဂါတွေအဖြစ်များသွားတာပါ။ ဘယ်နေရာတွေလဲဆိုရင်..

အစားအစာဝါးစားရာမှာ အဓိကအသုံးပြုတဲ့ အံသွားများရဲ့အပေါ်ဘက်မျက်နှာပြင် (Occlusal Surfaces of Molars)

အံသွားတွေနဲ့ရှေ့အံသွားတွေဟာ အစားအစာကိုဝါးစာရာမှာ အဓိကအသုံးပြုတဲ့သွားတွေဖြစ်ပါတယ်။ သူတို့ရဲ့အဓိက လုပ်ဆောင်ချက်က အစားအစာတွေကို အပေါ်မျက်နှာပြင်တွေနဲ့ ကြိတ်ဝါးပေးတာပါ။ အဆိုပါ အပေါ်ဘက်မျက်နှာပြင်တွေမှာ သွားရဲ့သဘာဝ ချိုင့်ကလေးတွေ မြောင်းကလေးတွေရှိပါတယ်။ အဆိုပါချိုင့်ထဲ မြောင်းထဲမှာကျရောက်နေတတ်တဲ့ အစာအကြွင်းအကျန်တွေဟာ ပလုပ်ကျင်းရုံ သွားကိုဖြစ်သလိုတိုက်ရုံနဲ့ မပြောင်တတ်တာမို့ အချိန်ကာလကြာတဲ့အခါ သွားသန့်ရှင်းရေးအားနည်းသူတွေမှာ အဆိုပါမျက်နှာပြင်တွေမှာ သွားပိုးစားရောဂါတွေ ဖြစ်လာကြပါတယ်။ ဒါကြောင့်မို့လို့ သွားတိုက်တံရောက်ရခက်တဲ့ အနောက်ဘက်ရောက်နေတဲ့ မိမိရဲ့အံသွားတွေကို သေချာဂရုတစိုက်သွားတိုက်သန့်ရှင်းပေးပြီး အမည်းစက်အမဲကြောင်းလေးတွေ ပေါ်နေပြီလားဆိုတာကို အမြဲတစေ စစ်ဆေးကြည့်ရှုနေသင့်ပါတယ်။ သွားပိုးစားရောဂါဟာ အလိုအလျောက်ပြန်ကောင်းနိုင်တဲ့ ရောဂါမဟုတ်တာမို့ သွားပိုးစားရောဂါစတင်တဲ့ လက္ခဏာဖြစ်တဲ့ အမည်းစက် အမည်းကြောင်းတွေပေါ်လာပြီဆိုရင် နီးစပ်ရာ သွားဆရာဝန်ထံ အမြန်ဆုံးသွားရောက်ပြီး ကုသမှု ခံယူသင့်ပါတယ်။

သွားပိုးစားရောဂါအဖြစ်များတဲ့ နောက်မျက်နှာပြင်တစ်ခုကတော့ သွားနှစ်ချောင်းကြား (Interproximal surfaces) တွေပါ။ အဆိုပါသွားနှစ်ချောင်းကြားနေရာတွေဟာ အစာတွေ အသားမျှင်တွေညှပ်ရင် နေရခက်လို့ အများစုက ညှပ်တဲ့အစာကို မရရအောင် ထုတ်ပစ်တတ်ကြပါတယ်။ ဒါပေမယ့် တစ်ချို့အစာသေးသေးလေးတွေဟာ သွားကို နေရခက်လောက်အောင် မသိသာစေဘဲ သွားနှစ်ချောင်းကြားမှာ တိတ်တဆိတ် ခိုအောင်းနေတတ်ကြပါတယ်။ သွားနှစ်ချောင်းကြားနေရာဟာ အရှေ့ဘက်သွားတွေကြားဖြစ်ဖြစ် အနောက်ဘက်သွားတွေကြားဖြစ်ဖြစ် သွားတိုက်တံအမျှင်တွေရောက်လွယ်တဲ့နေရာ မဟုတ်လို့ သွားကြားပွတ်ကြိုး (Dental Floss) ကိုအသုံးပြုမှသာ သန့်ရှင်းနိုင်မှာပါ။ ဒါကြောင့်မို့လို့ သွားတိုက်တံနဲ့သွားကို တစ်နေ့နှစ်ကြိမ်သွားတိုက်သန့်ရှင်းရင် သွားကြားပွတ်ကြိုးနဲ့တစ်နေ့တစ်ကြိမ် သွားနှစ်ချောင်းကြားတွေကို ညအိပ်ရာဝင်ခါနီးမှာ သန့်ရှင်းသင့်ပါတယ်။ သွားနှစ်ချောင်းကြားနေရာဟာ သွားပိုးစားရင်တောင်မှ အလွယ်တကူမြင်ရတဲ့နေရာမဟုတ်လို့ အထူးဂရုစိုက်ပြီး ခြောက်လတစ်ကြိမ် သွားဘက်ဆိုင်ရာ ဆရာဝန်ထံမှာ ပြသစစ်ဆေးသင့်ပါတယ်။

Dr.သုဈာန်