သွားတိုက်ခြင်းအနုပညာ

အခုတလော အနုပညာတွေ ခေတ်စားနေတော့ ကျွန်တော်ဟာလည်း အနုပညာတစ်ခုခု အကြောင်း ရေးချင်လာမိတယ်။ ဘာရေးရမလဲ စဉ်းစားလိုက်တဲ့အခါမှာ သွားဘက်ဆိုင်ရာဆရာဝန်တစ်ယောက်ပီပီ အခြေခံအကျဆုံးနဲ့ လွဲမှားသိရှိမှုအများဆုံး လိုက်နာမှုအားအနည်းဆုံးဖြစ်တဲ့ သွားတိုက်ခြင်းအကြောင်းကို ရေးဦးမှပါလေလို့ စိတ်ကူးရတဲ့အတွက်…

The must-to-do Art of Tooth Brushing
အနုပညာအလုပ်ဆိုတာ အနုစိတ်အသေးစိတ်အရာတစ်ခုကို စိတ်ပါလက်ပါလုပ်ရတဲ့ ပညာတစ်ခုဖြစ်ပါတယ်။ သွားတိုက်ခြင်းဟာလည်း အနုပညာအလုပ်တစ်ခုဖြစ်တယ်ဆိုရင် လက်ခံချင်မှ လက်ခံကြပါလိမ့်မယ်။ ဒါပေမယ့် အဲ့ဒါဟာ အမှန်တရားတစ်ခုပါပဲ။ လူအတော်များများဟာ မျက်နှာပေါ်မှာ အနုစိတ်အသေးစိတ် စိတ်ပါလက်ပါခြယ်မှုန်းနိုင်ကြသလောက် ပါးစပ်ထဲမှာကျတော့ အနုစိတ်ခြယ်မှုန်းနိုင်မှု မတရားအားနည်းကြပါတယ်။ လုပ်ရိုးလုပ်စဉ်မို့သာ တော်ရိလျော်ရိလုပ်ဆောင်ကြတဲ့ အလုပ်တစ်ခုဖြစ်နေတာကို ၀မ်းနည်းစဖွယ် တွေ့ရပါတယ်။ အဆိုပါအကျိုးဆက်တွေဟာ အသက်ငယ်စဉ်မှာ သိသာချင်မှသိသာမှာ ဖြစ်ပေမယ့် အသက်အရွယ်ကြီးရင့်တဲ့အခါ သွားကျန်းမာရေးပြဿနာတွေကို သေချာပေါက်ခံစားကြရပါတယ်။ တစ်ချို့ဆို ငယ်ရွယ်စဉ်မှာကတည်းက သွားပိုးစားနေတဲ့သွားတွေ၊ သွားချေးကျောက်အထပ်ထပ်နဲ့သွားတွေ၊ ငုတ်တိုဖြစ်နေတဲ့ သွားတွေနဲ့ ခံတွင်းကျန်းမာရေး အင်မတန်ညံ့ဖျင်းကြတာကို တွေ့ရပါတယ်။ သူတို့ကိုမေးလိုက်ရင် သွားမတိုက်တဲ့သူ တစ်ယောက်မှ မရှိပါဘူး။

သူတို့တွေ သွားအမြဲတမ်းတိုက်ရဲ့သားနဲ့ ဘာလို့ သွားတွေစုတ်ပြတ်သတ်နေရပါသလဲ။ အဖြေကတော့ အနုပညာဆန်စွာ သွားမတိုက်လို့ပါပဲ…။ ဒီတော့ သွားကို ဘယ်လို အနုပညာဆန်ဆန်တိုက်ရမလဲ ကြည့်ကြရအောင်။

ပထမအချက်အနေနဲ့ တစ်နေ့နှစ်ကြိမ်သွားတိုက်ရပါမယ်။ နှစ်ကြိမ်ဟာလည်း မနက်စာစားပြီးအချိန်နဲ့ ညအိပ်ရာမ၀င်ခင် ဖြစ်ရပါမယ်။ အတော်များများက မနက်ထလာရင် သွားတိုက်ကြပါရဲ့။ ညဆို အပျင်းကြီးပြီး သွားမတိုက်ကြတာများပါတယ်။ အမှန်က တစ်နေ့လုံးစားသမျှအစားအစာတွေရဲ့ အကြွင်းအကျန်တွေက ပါးစပ်ထဲခိုအောင်းနေတဲ့အတွက် ညဘက်သွားမတိုက်ဘဲ အိပ်တာဟာ အလွန်မှကို အန္တရာယ်များလှပါတယ်။ ညဘက်ခံတွင်းသန့်ရှင်းစွာနဲ့အိပ်စက်ထားတဲ့အခါ မနက်ရောက်ရင် ပါးလုတ်ကျင်းရုံနဲ့လုံလောက်ပြီး မနက်စာစားပြီးအချိန်မှသာ တစ်ကြိမ်သွားတိုက်သင့်ပါတယ်။ အဲ့လိုဆိုရင် သွားနှင့်ခံတွင်းသန့်ရှင်းနေတဲ့ အာနိသင်ဟာ ညရယ် နောက်တစ်နေ့ နေ့လည်အထိရယ်ပါ တည်ရှိနေမှာ ဖြစ်ပါတယ်။ ပြောရမယ်ဆိုရင် ငယ်ကတည်းကသင်ခဲ့ရတဲ့ စောစောထ သွားတိုက်…blah blah… အစာစား..ဆိုတဲ့ ဆောင်ပုဒ်ဟာ လွဲမှားတဲ့ သွားနှင့်ခံတွင်းကျန်းမာရေး အသိပညာပေးမှုတစ်ခုပါ။ ဆိုလိုတာက မှန်ကန်တဲ့အချိန်မှာ အနုပညာဆန်စွာနဲ့ သွားတိုက်တတ်ကြဖို့ပါ။

ဒုတိယအချက်အနေနဲ့ သွားတစ်ခါတိုက်ရင် အနည်းဆုံးသုံးမိနစ်ထိ စိတ်ပါလက်ပါသွားတိုက်ရမှာ ဖြစ်ပါတယ်။ ဒီနေရာမှာ တကယ့်ကို အနုပညာဆန်ဆန် သွားတွေရဲ့မျက်နှာပြင်အားလုံးကို အသေးစိတ်သွားတိုက်သန့်ရှင်းရပါတော့မယ်။ သွားရဲ့မြင်နေရတဲ့ အရှေ့မျက်နှာပြင်တွေ၊ အံသွားရဲ့ ၀ါးတဲ့ မျက်နှာပြင်တွေ၊ သွားတိုင်းရဲ့ မမြင်ရတဲ့ အတွင်းဘက်ရောက်နေတဲ့ မျက်နှာပြင်တွေ (ဥပမာ-အောက်သွားရဲ့ လျှာနဲ့မျက်နှာခြင်းဆိုင်ရှိနေတဲ့ မျက်နှာပြင်တွေပါ။ အဆိုပါမျက်နှာပြင်ဟာ သွားတိုက်တံရောက်ဖို့ အလွယ်တကူမကြိုးစားကြဘဲ တော်ရိလျော်ရိသွားတိုက်နေကြတဲ့အပြင် လျှာအောက် တံတွေးအကျိတ်နဲ့အရမ်းနီးကပ်တဲ့အတွက် သွားကျောက်အတည်အများဆုံးနေရာလဲဖြစ်ပါတယ်။) ရှိသမျှမျက်နှာပြင်တိုင်းကို သွားတစ်ချောင်းကိုဆယ်ကြိမ်ခန့်စိတ်ပါလက်ပါ ပွတ်ဆွဲသွားတိုက်ကြရမှာ ဖြစ်ပါတယ်။

အပေါ်သွားဆိုရင် သွားတိုက်တံအမျှင်ကို သွားဖုံးသားပေါ်တင်ပြီး အောက်ကိုဆွဲချတိုက်ရမှာ ဖြစ်ပြီး အောက်သွားဆိုရင်လဲ သွားတိုက်တံအမျှင်ကို သွားဖုံးသားပေါ်တင်ပြီး အောက်ကနေအပေါ်ကို ဆွဲတင်တိုက်ရမှာ ဖြစ်ပါတယ်။ ဒါမှသာ သွားဖုံးသားကိုလဲ တစ်ခါတည်းနှိပ်နယ်ပေးပြီးသားဖြစ်ပြီး သွားဖုံးသား သွေးလည်ပတ်မှု ကောင်းစေမှာပါ။ တစ်ခုရှိတာက လုံးဝကန့်လန့်ဖြတ်သွားမတိုက်ကြဖို့ပါ။ ကန့်လန့်ဖြစ်သွားတိုက်တဲ့အခါ အချိန်ကြာလာရင် သွားအခြေမှာ တိုက်စားပွန်းပဲ့ကုန်ပြီး ကျင်လာတတ်ပါတယ်။ မကုသဘဲထားရင် သွားတွေ ခါးပြတ်ပြီး ကျိုးပဲ့သွားနိုင်ပါတယ်။ နောက်တစ်ခုက လျှာမျက်နှာပြင်ရော တိုက်ပေးဖို့ပါ။ လျှာမှာလည်း မမြင်ရတဲ့ စားကြွင်းစားကျန်နဲ့ ပိုးမွှားလေးတွေ ကပ်ငြိနေတတ်တာမို့ သွားတိုက်ရင် လျှာကိုပါ တစ်ပါတည်း တိုက်ပေးပြီး သန့်ရှင်းပေးသင့်ပါတယ်။

တကယ်တမ်းသာ သွားကို စိတ်ပါလက်ပါ အနုပညာဆန်စွာနဲ့ ဖော်ပြခဲ့သလို စနစ်မှန်သွားတိုက်နည်းနဲ့ တစ်ချောင်းချင်းသေချာ သန့်ရှင်းရေးလုပ်ပေးမယ်ဆိုရင် သုံးမိနစ်ဟာ အချိန်ကုန်မှန်းမသိကုန်သွားမှာပါ။ မျက်နှာမှာ မိတ်ကပ်တွေကို တစ်နာရီလောက်မပျင်းမရိခြယ်သနေသလို၊ ခေါင်းပေါ်မှာ Gel တွေကို နာရီဝက်လောက် စိတ်ပါလက်ပါ လိမ်းပြီးသနေသလို သွားကိုသာ မနက်သုံးမိနစ် ညသုံးမိနစ်လောက်ပဲ သေချာသန့်ရှင်းရေးလုပ်ပေးမယ်ဆိုရင် သွားနှင့်ခံတွင်းကျန်းမာရေးပြဿနာတွေကနေ ကင်းဝေးနေမှာပါ။ မဟုတ်ရင်တော့ သွားကိုက် သွားနာ သွားကျောက်တည်ပြီး ခံတွင်းအနံ့ဆိုး သွားဖုံးသွေးထွက်တာတွေနဲ့ မိတ်ဆွေဖွဲ့နေကြရမှာပါ။

မျက်နှာဘယ်လောက်ပဲလှပပါစေ ခံတွင်းထဲစုတ်ပြတ်သတ်နေရင် အထင်သေးကြတာ ဒီနိုင်ငံမှာ သွားဆရာဝန်တွေနဲ့ လူအနည်းစုပဲရှိပေမယ့် နိုင်ငံရပ်ခြားမှာတော့ အကုန်လုံးနီးပါး နှာခေါင်းရှုံ့ကြပါတယ်။ ဆိုတော့ ရုပ်လှတာထက် စိတ်လှဖို့က ပိုအရေးကြီးတယ် ပြောကြသလို သွားနှင့်ခံတွင်း လှပသန့်ရှင်းဖို့ကလည်း ထပ်တူအရေးကြီးပါကြောင်း။

သုဈာန်