ချက်ကလေးကြွေချိန်တန် ပုံမှန်ဂရုစိုက်နိုင်စေဖို့

မွေးကင်းစကလေးများရဲ့ချက်မှာ မိခင်နဲ့ဆက်သွယ်တဲ့ချက်ကြိုးကိုဖြတ်ပြီးတဲ့အခါ ချက်ကြိုးအပိုင်းအစကလေး ကျန်နေခဲ့ပါတယ်။ ဒီချက်ကြိုးအပိုင်းလေးဟာ ပထမတစ်ရက်နှစ်ရက်မှာ စိုတိုတိုလေးဖြစ်နေပြီး တစ်ဖြည်းဖြည်းမည်းခြောက်လာပြီးနောက်ကြွေကျသွားမှာပဲ ဖြစ်ပါတယ်။
အဲ.. ဒီလိုအချိန်မှာ ချက်ကိုသန့်ရှင်းစွာမထားတဲ့အခါမှာ ချက်ကြိုးနေရာမှတစ်ဆင့် ပိုးဝင်ပြီး အသက်အန္တရာယ်စိုးရိမ်ရတဲ့အထိ ဒုက္ခပေးနိုင်ပါတယ်။ ဒါကြောင့် ချက်နှင့်ချက်ကြိုးသန့်ရှင်းရေးကို ရေးသားတင်ပြလိုက်ပါတယ်။

ချက်ကြိုးအပိုင်းကလေးဟာ မွေးဖွားပြီ ၃ရက်မှ နှစ်ပတ် (၁၄ရက်) အတွင်းကြွေကျတတ်ပါတယ်။ ဒီကြားထဲမကြွေခင်အချိန်လေးမှာ ချက်ကိုသန့်ရှင်းအောင် ဂရုစိုက်ဖို့လိုအပ်ပါတယ်။

၁။ ဘာမှ (ဘာမှ) မထည့်ပါနဲ့

ကြားဖူးနားဝအယူအဆအလွဲတွေအကြား မိခင်တို့ဗျာများပြီး နနွင်းသိပ်ခြင်း၊ အရက်ပျံလောင်းခြင်း၊ ဆေးမီးတိုများထည့်ခြင်း ပြုမိမယ်ဆိုရင် ပိုးဝင်ခြင်း၊ အနာကျက်နှေးခြင်းစသည်တို့ဖြစ်ပေါ်လာပြီး အသက်အန္တရာယ်ကိုထိခိုက်နိုင်ပါတယ်။

၂။ ချက်ကြိုးလေးခြောက်သွေ့နေပါစေ

ချက်ကလေးကို စိုစွတ်ခြင်း အညစ်အကြေးပေရေခြင်းရှိပါက ချက်ချင်းသန့်စင်ပေးပါ။ ခြောက်သွေ့ခြင်းဟာ ချက်ကြိုးမြန်မြန်ဆန်ဆန်ကြွေခြင်းကို အားပေးစေမှာပါ။

၃။ ရေပတ်လောက်တိုက်ရင် လုံလောက်ပါပြီ။

အချို့မိဘများဟာ စိတ်လောပြီး ရေမြန်မြန်ချိုးပေးချင်တတ်ကြပါတယ်။ ဒီလိုချက်ကြိုးမကြွေခင်မှာတော့ တော်ရုံရေပတ်တိုက်ခြင်းအပြင်ပို၍မပြုလုပ်သင့်ပါဘူး။

၎။ သန့်ရှင်းသောရေ

ချက်ကြိုးဖုလေးဟာ စိုစွတ်ကပ်စေးနေတဲ့အတွက်သန့်ရှင်းချင်တယ်ဆိုရင် သန့်ရှင်းသောရေ၊ ရေကျက်အေးကဲ့သို့ ပွက်ပွက်ဆူအောင်ကျိုပြီးမှအအေးခံထားသောရေဖြင့်သာ သန့်ရှင်းပေးပါ။

၅။ မိခင်နို့ရည်

မိခင်နို့ရည်ရဲ့ အံ့မခန်း အစွမ်းတွေထဲမှာ ပိုးမွှားများအန္တရာယ်မှကာကွယ်နိုင်စွမ်းလဲရှိတယ်အတွက် ချက်ကလေး စီးကပ်စိုစွတ်နေတဲ့အခါ မိခင်နို့ရည်အနည်းငယ်ညှစ်ချ၍လည်း သန့်စင်ပေးနိုင်ပါတယ်။

အကယ်၍များ ကလေး၍ချက်ဟာ

၁။ နီရဲ ရောင်ရမ်းပြီးပူနေမယ်ဆိုရင်

၂။ ဝါဝါစိမ်းစိမ်း ပြည်တွေရှိနေရင်

၃။ အနံ့ဆိုးဆိုးများထွက်နေရင်

၎။ ကလေးငယ်မှာ အထက်ပါများနှင့်တကွ အဖျားတွဲလျက်ရှိနေမယ်ဆိုရင်တော့ နီးစပ်ရာကျန်းမာရေးဌာနမှာ ပြသပြီး ကုသမှုခံယူသင့်ပါတယ်။

မေတ္တာဖြင့်

စိုင်းမြတ်သူ