ရိုးရိုးခေါင်းကိုက်တာလား ဦးနှောက်ထဲက အကြိတ်လား

လူတိုင်းခေါင်းကိုက်ဖူးသလို ခေါင်းကိုက်တိုင်းလည်း ဘာကြောင့်ကိုက်သလဲ ကိုယ့်ဟာကို အဖြေထုတ်လေ့ရှိကြတယ်။ ဘာစားမိလို့လဲ ဘယ်သွားမိလို့လဲ..
အိပ်ရေးပျက်လို့လား..အစားပျက်လို့လား..ပူလို့လား..အေးလို့လား..အာရုံကြောအားနည်းလို့လား..ကျီးပေါင်းတက်လို့လား..ဖျားလို့လား..

ဘာလို့ ခေါင်းကိုက်လဲပေါ့။

မှန်တာလည်းမှန် မှားတာတွေလည်းမှားပေါ့။

တချို့တွေကျတော့လည်း ဦးနှောက် အကျိတ် လို ရောဂါအကြီးကြီးတွေများ ဖြစ်နေတာလားလို့ကိုယ့်ကိုယ်ကို သံသယဝင်ပြီး စိတ်တွေပိုဖိစီးနေတတ်ကြတယ်။
ဒီတော့ ခေါင်းကိုက်က မသက်သာတဲ့ အပြင် ပိုဆိုးလာကြတာပေါ့။ခေါင်းကိုက်တာတစ်ခုတည်းနဲ့တော့ brain tumour ဆိုတဲ့ ဦးနှောက်အကျိတ်လို့ စွပ်စွဲလို့ မရပါဘူး။ လူတစ်ယောက် ခေါင်းကိုက်နိုင်ခြေများသလောက်..ခေါင်းကိုက်စေတဲ့ အကြောင်းတွေများသလောက် ဦးနှောက်အကြိတ်ဖြစ်နိုင်ခြေကတော့ တော်တော်လေးနည်းပါတယ်။

🔺 ဦးနှောက်ထဲက အကျိတ်ဆိုတာဘာလဲ ??

Brain Tumour လို့ခေါ်ပါတယ်။ ကင်ဆာကျိတ် ဖြစ်နိုင်သလို သူ့လောက်အန္တရာယ်မများ ပွားနှုန်းလည်းမမြန်တဲ့ ကင်ဆာမဟုတ်တဲ့ Benign Tumour တွေလည်းဖြစ်နိုင်ပါတယ်။

ကင်ဆာကျိတ်မှာလည်း ဦးနှောက်ကစဖြစ်တဲ့ အကျိတ်ထက် တခြားကင်ဆာတစ်ခုခုကနေ သွေးကြောကတစ်ဆင့် ဦးနှောက်ကိုရောက်လာ အခြေချတဲ့ Secondary အကျိတ်တွေက ဖြစ်နိုင်ခြေပိုများပါတယ်။

🔺အဖြစ်များတဲ့ ခေါင်းကိုက်ရောဂါတွေက ဘာတွေလဲ ??

– စိတ်ဖိစီးလို့ကိုက်တဲ့ Tension headache

– ခေါင်းတစ်ခြမ်းကိုက်တဲ့ Migraine

– အပူဒဏ်ကြောင့်ကိုက်တဲ့ Heat headache

– မျက်ရိုးတွေကိုက် မျက်ရည်နှာရည်တွေပါကျပြီးကိုက်တဲ့ Cluster headache

– ထိပ်ကပ်နာကြောင့်ကိုက်တဲ့ Sinus headache

ဒါတွေက အဖြစ်များတဲ့ ရောဂါတွေပေမဲ့ ဘာကြောင့်မှန်းမသိဘဲလည်း ခေါင်းကိုက်နေနိုင်ပါသေးတယ်။

🔺 ခေါင်းကိုက်ရင် ဘာလုပ်ရမလဲ ??

Paracetamol ပါတဲ့ ခေါင်းကိုက်ပျောက်ဆေးတစ်ခုခုသောက်ပါ။

စိတ်ရောကိုယ်ပါ အနားယူပါ။

အိပ်ရေးဝအောင်အိပ်ပါ။

အစားအချိန်မှန်စားပါ။

ရေများများသောက်ပါ။

🔺 ဘယ်လိုလက္ခဏာတွေပြရင် စိုးရိမ်ရမလဲ ??

– ရုတ်တရက် ထကိုက်မယ်..

– ကိုက်နေကျပုံစံ မဟုတ်တော့ဘဲ သိသိသာသာ ပုံစံပြောင်းလာမယ်..

– ဆိုးဆိုးဝါးဝါး တသမတ်တည်း မခံနိုင်လောက်အောင် ရက်ပေါင်းများစွာ ကိုက်နေမယ်..

– မနက်အိပ်ယာထကတည်းက ကိုက်ကိုက်နေမယ် ဆိုရင်တော့ သတိထားရပါမယ်။

နောက်ထပ်ဒီလိုလက္ခဏာတွေပါ တွဲဖြစ်လာရင်တော့ ပိုသတိထားရပါတော့မယ်။

– လက်..ခြေထောက်တွေ လေးလံထုံကျင်လာရင်

– အမြင်အာရုံပါထိခိုက်လာရင်

– ပျို့ အန်ရင်

– စကားပြောရခက်လာရင် စကားပြောမမှန်ဖြစ်လာရင် စကားလုံးရွေးရခက်လာရင်

– သိသိသာသာ မှတ်ဥာဏ်ချို့ယွင်းလာပြီး သတိခဏခဏမေ့လာရင် ..

ဒါဆိုရင်တော့ ဆရာဝန်အမြန်ပြဖို့ လိုပါမယ်။ လိုအပ်ရင် ဦးနှောက်အာရုံကြောဆရာဝန်နဲ့ပါ ဆွေးနွေးတိုင်ပင်ဖို့လိုပါလိမ့်မယ်။ ကွန်ပျူတာဓာတ်မှန် (CT scan)..
သံလိုက်ဓာတ်မှန်(MRI)စတာတွေနဲ့ စမ်းသပ်အဖြေရှာဖို့ လိုကောင်းလိုနိုင်ပါတယ်။

အားလုံးခေါင်းကိုက်မြန်မြန်ပျောက်ကြပါစေ..

မပျောက်သေးရင်လည်း ရိုးရိုးကိုက်တာပဲ ဖြစ်ကြပါစေ..

Dr ဖြိုးဝေလင်း
(10.5.19)