အိမ်ထောင်ဖက်ကိုကူးစက်နိုင်သည့် လိင်မှတစ်ဆင့် ကူးစက်သောရောဂါများ

လိင်မှတစ်ဆင့်ကူးဆက်တဲ့ရောဂါတွေ ရောဂါရာဇ၀င်အမျိုးမျိုး၊ ရောဂါလက္ခဏာအမျိုးမျိုးနဲ့ ကူးစက်လေ့ရှိပါတယ်။ လူနာအများစုဖြစ်တဲ့ ရောဂါလက္ခဏာများကတော့

အမျိုးသားများတွင်

  • ဆီးကျင်ခြင်း
  • လိင်တံမှ သဘာဝအတိုင်းမဟုတ်သော အရည်များထွက်ခြင်း
  • လိင်တံတစ်ဝိုက်တွင် အရေပြားအနာဖြစ်ခြင်း
  • ကပ္ပယ်အိတ်ရောင်ခြင်း ၊ နာခြင်း
  • စအိုနှင့်တစ်ဝိုက်တွင် အနာဖြစ်ခြင်း

အမျိုးသမီးများတွင်

  • အဖြူဆင်းခြင်း
  • ဗိုက်အောင့်ခြင်း
  • ဆီးစပ်ကိုက်ခြင်း
  • လိင်အင်္ဂါတစ်ဝိုက်တွင် အရေပြားအနာဖြစ်ခြင်း
  • လိင်ဆက်ဆံလျှင် အလွန်အမင်းနာကျင်ခြင်း
  • ရာသီမဟုတ်ဘဲသွေးဆင်းခြင်း စသည်တို့ဖြစ်ပါတယ်။

လိင်မှတစ်ဆင့်ကူးစက်တဲ့ရောဂါတွေအများကြီးရှိတဲ့အနက် မိမိရဲ့အိမ်ထောင်ဖက်ကိုပါ ဆက်ကူးစက်နိုင်တဲ့ရောဂါတွေကတော့ HIV / AIDS ရောဂါ Chlomydia trachomatis , Neisseria gonorrhoea နဲ့ Non-gonococcal urethritis နဲ့ Trichomonas vaginalis အစရှိတဲ့ ရောဂါတွေပဲ ဖြစ်ပါတယ်။

Chlomydia trachomatis

ရောဂါလက္ခဏာများအနေနဲ့ အမျိုးသမီးများဟာ လိင်ဆက်ဆံရင် အလွန်အမင်းနာကျင်ခြင်းနဲ့ ဆီးပူ၊ဆီးကျင်ခြင်း ၊ ရာသီမဟုတ်ဘဲသွေးဆင်းခြင်း ၊ လိင်ဆက်ဆံပြီးချိန်မှာ သွေးဆင်းခြင်း ၊ အဖြူဆင်းခြင်းတို့ဖြစ်တတ်ပါတယ်။ အမျိုးသားများ ကတော့ ဆီးပူ၊ဆီးကျင်ခြင်း နဲ့ သဘာဝမဟုတ်သော အရည်များ ထွက်ခြင်းတို့ဖြစ်တတ်ပါတယ်။

Neisseria gonorrhaeae ( ဂနိုရောဂါ )

ဒီရောဂါကတော့ အမျိုးသမီး ၅၀ % မှာ ရောဂါလက္ခဏာ မပြတတ်ပါဘူး။ လက္ခဏာ ပြမယ်ဆိုရင်တော့ ဆီးပူတာ ၊ အဖြူဆင်းတာ ဖြစ်နိုင်ပါတယ်။ ဒီဂနိုရောဂါနဲ့ Chlamydia trachomatis ရောဂါနှစ်ခုလုံးမှာ ဆေးကုသမှု (ဆေးထိုး ဆေးသောက်ခြင်း) အစအဆုံးမပြီးမချင်း လိင်ဆက်ဆံမှုကို ရှောင်ကြဉ်ရမှာပါ။

Non-gonococcal urethritis

ဆီးသွားတဲ့လမ်းကြောင်းကနေ အဖြူဖတ်တွေ ထွက်တတ်ပါတယ်။ ဆီးအောင့်ပြီး ဆီးသွားရင် နာကျင်မှုခံစားရတတ်ပါတယ်။ ဒီလိုလက္ခဏာတွေ ရှိရင်တော့ အိမ်ထောင်ဖက်ရော လူနာရော ကုသမှုခံယူရမှာဖြစ်ပါတယ်။

Trichomonas vaginalis

အမျိုးသမီးများမှာ အဖြစ်များပါတယ်။ မိန်းမကိုယ်ကနေ အဖြူဆင်းခြင်း၊ ယားယံခြင်းတွေ ခံစားရတတ်ပါတယ်။ ဒီရောဂါဖြစ်ရင် ကိုယ်ဝန်ရှိတဲ့ အမျိုးသမီးဆိုရင် လမစေ့ဘဲ ကလေးမွေးနိုင်ခြေ ပိုများပါတယ်။ ကလေးကပေါင်မပြည့်ဘဲလည်းမွေးတတ်ပါတယ်။ ဒီရောဂါဖြစ်ရင် အိမ်ထောင်ဖက်ကိုပါ ဆေးကုသမှုခံယူရပါမယ်။ ဆေးကုသမှု မပြီးမချင်း လိင်ဆက်ဆံခြင်းကိုရှောင်ကြဉ်ရပါမယ်။

တစ်ကိုယ်ရည် သန့်ရှင်းရေးဂရုစိုက်ခြင်း၊ လိင်မှုကိစ္စ အပျော်အပါး ရှောင်ကြဉ်ခြင်း၊ မရှောင်ကြဉ်နိုင်လျှင် အကာအကွယ်သုံးခြင်းတို့ကလည်း လိင်မှတစ်ဆင်ကူးစက်တဲ့ရောဂါတွေ ဖြစ်ပွားမှူကို လျှော့ချပေးနိုင်ပါလိမ့်မယ်။ မလွှဲသာလို့ ရောဂါဖြစ်လာရင်တော့ စနစ်တကျဆေးကုသမှုခံယူသင့်ပါတယ်။

အားလုံးကျန်းမာပျော်ရွှင်ကြပါစေ..။

မောင်(ဆေး-၁)