ကိုယ်ဝန်ဖျက်ချပြီးပိုးဝင်ခြင်း ( Septic Abortion ) နှင့် နောက်ဆက်တွဲအတွေးများ

အားလုံးသိကြတဲ့အတိုင်း၊ မြန်မာနိုင်ငံမှာ ကိုယ်ဝန်ဖျက်ချခြင်းဟာ တရားမဝင်ပါဘူး။ ဒါပေမယ့် အကြောင်းအမျိုးမျိုးကြောင့် ကိုယ်ဝန်ရှိလာတဲ့အခါ၊ ရှိလာတဲ့ ကိုယ်ဝန်ကလည်း မလိုချင်တဲ့ကိုယ်ဝန်ဖြစ်တဲ့ အခါကိုယ်ဝန်ဖျက်ချဖို့ဆိုတာဖြစ်လာကြပါတယ်။ ဒီနေရာမှာ ကိုယ်ဝန်ဆောင်သူကလဲ မျိုးဆက်ပွားကျန်းမာရေးနှင့်ပတ်သက်ပြီးဗဟုသုတ မပြည့်စုံ၊ တရားမဝင် ဖျက်ချ ပေးတဲ့သူကလဲ မကျွမ်းကျင်၊ အသုံးပြုတဲ့ ပစ္စည်းကိရိယာကလဲ မသန့်ရှင်းဆိုရင် အန္တရာယ် တော်တော်ကြီးပါတယ်။

ကိုယ်ဝန်ဖျက်ချပြီး ပိုးဝင်တဲ့အခါ အောက်ပါရောဂါဝေဒနာတွေ ခံစားရပါတယ်။

သားအိမ်နံရံရောင်ရမ်းခြင်း

သားဥအိမ် (ovaries )နှင့် သားဥပြွန် (fallopian tubes) များရောင်ရမ်းခြင်း

ဝမ်းခေါင်းအတွင်းပြည်တည်ခြင်း

ဝမ်းခေါင်းတွင်းအမြှေးပါးရောင်ရမ်းခြင်း

သွေးဆိပ်တက်ခြင်း

မေးခိုင်ပိုးဝင်ခြင်း

အမှန်တကယ်သားသမီးလိုချင်သည့်အခါ ရရှိရန်ခက်ခဲခြင်း

သားအိမ်အပြင်ဘက်တွင် ပဋိသန္ဓေတည်ခြင်း (Ectopic Pregnancy)

အန္တရာယ်အရှိုဆုံးအခြေအနေကတော့ သွေးကြောထဲ အထိ ရောဂါပိုး ပြန့်ပြီး သွေးပေါင်ချိန်အလွန်အမင်းကျဆင့်းခြင်း ( Septic shock )ပါ။ အချိန်မီကုသမှု မရဘူးဆိုရင် အရေးကြီးတဲ့ခန္ဓာကိုယ်အစိတ်အပိုင်းတွေ ပျက်စီးပြီး အသက်ဆုံးရှူံးနိုင်လို့ပါ။

တရားမဝင်ကိုယ်ဝန်ဖျက်ချမိပြီးပိုးဝင်တဲ့လက္ခဏာတွေရှိရင် ဆေးရုံကိုအမြန်ဆုံးသွားပြီးကုသမှုခံယူပါ။ ဒါမှလည်းအန္တရာယ်ကင်းမှာဖြစ်ပါတယ်။ တိတ်တိတ်ပုန်းပြီး ဆေးမြီးတို/ စပ်ဆေး စသည်တို့နှင့်ကုနေရင်တော့ အသက်အန္တရာယ်ရှိနိုင်ပါတယ်။

ယခုအခါမှာ ကောင်းမွန်မှန်ကန်တဲ့ ပဋိသန္ဓေတားနည်း (contraception methods) များနှင့် သားဆက်ခြားနည်းလမ်းတွေရှိ နေပါပြီ။ မလိုလားအပ်တဲ့ ကိုယ်ဝန်မရရှိစေဖို့ ယောက်ျားလေးများရော၊ မိန်းကလေးများပါ ကလေးဘဝ (childhood), မြီးကောင်ပေါက် ဆယ်ကျော်သက်အရွယ် ( teenage)±, လူငယ်ဘဝ (adolescent) နှင့် အရွယ်ရောက်ပြီး (adulthood) တို့အားလုံးမှာ အရွယ်နှင့် သင့်တော်တဲ့ မျိုးဆက်ပွားကျန်းမာရေးအသိရှိဖို့ အလွန်အရေးကြီးပါတယ်။ မိမိသိရှိလိုတဲ့ မျိုးဆက်ပွားကျန်းမာရေးဆိုင်ရာ ဗဟုသုတ တွေကို ကျွမ်းကျင်တဲ့ ဆရာဝန်၊သူနာပြုအစရှိတဲ့ ပညာရှင်များနှင့် စနစ်တကျ တိုင်ပင်ဆွေးနွေးနိုင်ပါတယ်။ ဒီလိုနည်းလန်းတွေနှင့် တရားမဝင်ကိုယ်ဝန်ဖျက်ချတဲ့နှုန်းကိုသိသိသာသာလျော့ချနိုင်ပါတယ်။

အမျိုးသမီးများအားလုံးသာယာလှပပြီးကျန်းမာတဲ့မိသားစုဘဝတွေကိုပိုင်ဆိုင်နိုင်ကြပါစေ။

Dr.ANK