ဖခင်လောင်းတစ်ဦးရဲ့အခန်းကဏ္ဍ

အမျိုးသမီးတစ်ဦးကိုယ်ဝန်ဆောင်တဲ့အခါမှာ ခင်ပွန်းဖြစ်သူရဲ့ ဂရုစိုက်မှု၊ အလေးပေးမှု၊နားလည်အားပေးမှုတွေဟာ အထူးလိုအပ်ပါတယ်။ အချို့သောဖခင်လောင်းများဟာ လုပ်ပေးချင်တဲ့စေတနာရှိပါလျက်နဲ့ ဘာလုပ်ပေးရမယ်မှန်းမသိတာမျိုးတွေ ရှိပါတယ်။ ဒါကြောင့် ကိုယ့်ရဲ့ ကိုယ်ဝန်ဆောင်ဇနီးအပေါ်ကိုဘယ်လိုစောင့်ရှောက်ပေးသင့်တယ်ဆိုတာကို ရေးသားဖော်ပြလိုက်ရပါတယ်။

(၁)ဖတ်မှတ်လေ့လာခြင်း

ပထမဆုံးအချက်ကတော့ ဗဟုသုတရှာမှီးရမှာဖြစ်ပါတယ်။ အမျိုးသမီးတွေကိုယ်ဝန်ဆောင်စဉ်မှာဖြစ်တတ်တဲ့ ပြောင်းလဲမှုတွေကို သိရှိနေသင့်ပါတယ်။ အမျိုးသမီးရဲ့ အစားအသောက်အနေအထိုင်ပြောင်းလဲတတ်ပုံတွေကနေ မွေးဖွားခါနီး၊မွေးဖွားစဉ်ဖြစ်တတ်တဲ့ အရာတွေကို ဖတ်မှတ်ထားရင် ဇနီးသည်ကို စောင့်ရှောက်တဲ့နေရာမှာအင်မတန်အသုံးဝင်ပါတယ်။

(၂)ဇနီးသည်၏ မနက်ပိုင်းတွင် ပျို့အန်သောဝေဒနာကို သိရှိနားလည်ထားခြင်း

Morning sickness လို့ခေါ်တဲ့ မနက်ပိုင်းမှာ အလွန်ပျို့ချင်အန်ချင်ဖြစ်တဲ့ ဝေဒနာဟာ ကိုယ်ဝန်ဆောင်တွေကို အလွန်ဒုက္ခပေးပါတယ်။ ကိုယ်ဝန်သည်ဟာ ပင်ပန်းနွမ်းနယ်တတ်ပါတယ်။ အဲလိုအချိန်မျိုးမှာ ခင်ပွန်းဟာ ဇနီးဖြစ်သူအနားမှာနေပြီး အားပေးရပါမယ်။ ပြုစုစောင့်ရှောက်ရပါမယ်။

(၃)အားပေးမှု

ကိုယ်ဝန်ဆောင်စဉ်မှာ အမျိုးသမီးဟာ ပျော်ရွှင်မှုနဲ့ စိတ်လှုပ်ရှားမှုကို တစ်ပြိုင်တည်းခံစားရပါတယ်။ ဒါ့အပြင် ကြောက်ရွံ့စိတ်တွေ၊ မသေချာမှုတွေနဲ့ ရုပ်ပိုင်းဆိုင်ရာပြောင်းလဲမှုများစွာလည်း ကြုံတွေ့ရပါတယ်။ ကိုယ်ဝန်ဆောင်စဉ်ကာလတစ်လျှောက်လုံးမှာ ခင်ပွန်းသည်ရဲ့ အားပေးမှုကလိုအပ်ပါတယ်။ ဇနီးရဲ့အနားမှာရှိနေကြောင်းပြောပြီး စိုးရိမ်စရာဘာမှမရှိကြောင်းအားပေးနေဖို့လိုအပ်ပါတယ်။

(၄)အိမ်မှုကိစ္စများကိုကူညီပေးခြင်း

ဇနီးဖြစ်သူကိုယ်ဝန်ဆောင်စဉ်မှာ ချက်ပြုတ်ခြင်း၊အိမ်မှုကိစ္စပြုလုပ်ခြင်းများကို ကူညီပေးသင့်ပါတယ်။ ဇနီးဖြစ်သူဟာ အင်မတန်ကျေနပ်နှစ်သိမ့်မှာဖြစ်ပါတယ်။ဇနီးရဲ့တာဝန်တွေကိုခွဲယူရာလည်းရောက်ပါတယ်။

(၅)AN Care များတွင် လိုက်ပါပေးခြင်း

ကိုယ်ဝန်ရှိတာနဲ့ သားဖွားမီးယပ်ဆရာဝန်ဆီမှာ Antenatal Care ယူရပါတယ်။ အဲလိုသွားရောက်ပြသတဲ့အခါတွေမှာ တတ်နိုင်သမျှအချိန်ပေးသင့်ပါတယ်။ဘယ်နေ့ဘယ်ရက် သွားရမယ်ဆိုတာကို ဇနီးနဲ့အတူ လိုက်မှတ်သားသင့်ပါတယ်။

(၆)ကြိုတင်ပြင်ဆင်ခြင်း

ကလေးမီးဖွားဖို့အတွက် ကြိုတင်ပြင်ဆင်ရာမှာ အမျိုးသမီးတွေသာ တာဝန်ရှိတာမဟုတ်ပါဘူး။ကလေးမွေးဖို့ပြင်ဆင်တာ စောင့်ဆိုင်းရတာဟာ အမျိုးသမီးအတွက် စိတ်ဖိစီးစေပါတယ်။ ဒီအချိန်မှာ စိတ်တည်ငြိမ်အောင် ဘေးကနေကူညီရပါမယ်။ အားလုံးပြင်ဆင်ထားပြီးဖြစ်တဲ့အတွက် ဘာမှစိုးရိမ်စရာမရှိတော့ကြောင်း ပြောပြတတ်ရပါမယ်။

ကိုယ်ဝန်ဆောင်အမျိုးသမီးတစ်ဦးအတွက် ရုပ်ပိုင်းဆိုင်ရာကျန်းမာမှုလိုပဲ စိတ်ပိုင်းဆိုင်ရာလုံခြုံမှုကလည်းအရေးကြီးပါတယ်။ အနားမှာ အနီးကပ်ဆုံးဖြစ်တဲ့ ခင်ပွန်းသည်ဟာ ဒီအချက်ကို ဖြည့်ဆည်းပေးရမှာဖြစ်ပါတယ်။

အားလုံးကျန်းမာပျော်ရွှင်ကြပါစေ။

မောင်(ဆေး-၁)