မီးယပ်ချမ်းထတယ်ဆိုတာ

အမျိုးသမီးများ မီးဖွားပြီးနောက်မှာ ချမ်းတုန်ပြီးဖျားတဲ့အဖျားကို အရပ်အခေါ်အနေနဲ့ မီးယပ်ချမ်းလို့ခေါ်ကြပါတယ်။ ဒီ Puerperal Pyrexia ဟာ ဘာကြောင့်ဖြစ်ရသလဲ ဘယ်လိုကုသပြီး ဘယ်လိုကာကွယ်မလဲဆိုတာတွေ သိရှိစေနိုင်ဖို့ ရေးသားလိုက်ပါတယ်။

ဖြစ်ရတဲ့အကြောင်းအရင်းများကတော့

-ဆီးလမ်းကြောင်းပိုးဝင်ခြင်း

-လိင်အင်္ဂါမှတစ်ဆင့်ပိုးဝင်ခြင်း

-Staphylococcus ပိုးကြောင့် ရင်သားနီရဲရောင်ရမ်းခြင်း ပြည်တည်ခြင်း

-ဗိုက်ခွဲမွေးခြင်း (LSCS) ၏နောက်တွင် အနာကောင်းစွာမကျက်ခြင်း၊ ဆီးလမ်းကြောင်းပိုးဝင်ခြင်းနှင့် ဖျားခြင်း

-Venous Thromboembolism (သွေးခဲပိတ်ခြင်း) စသည့်အချက်များကြောင့်ပဲဖြစ်ပါတယ်။

အရေးပေါ်လက္ခဏာများကတော့ အမျိုးသမီးတစ်ဦးဟာ

-38’C နှင့်အထက် ကိုယ်အပူချိန်ရှိနေခြင်း

-နှလုံးခုန်မြန်ခြင်း

-မောခြင်း

-ရင်ဘတ်အောင့်ခြင်း ၊ ဗိုက်အောင်ြ့ခင်း

-ဝမ်းလျှောခြင်း၊ အန်ခြင်း

-သားအိမ်ရှိသည့် ဆီးခုံတစ်ဝိုက်နေရာ ၊ ကျောက်ကပ်ရှိသည့် ခါးတစ်ဝိုက်နေရာမှာ ထိုးအောင့်နာကျင်ခြင်း

-အင်မတန်နုံးခွေခြင်း သို့မဟုတ် ဂဏာမငြိမ်ခြင်း စတဲ့လက္ခဏာတွေပြနေရင်တော့ ဆေးရုံ၊ဆေးခန်းကို အလျင်အမြန်ပြသသင့်ပါတယ်။

နောက်ဆက်တွဲဆိုးကျိုးများကတော့

လိင်အင်္ဂါနဲ့ဆီးလမ်းကြောင်းကနေ ပိုးဝင်တာကို မကုသဘဲထားမယ်ဆိုရင် နောက်ဆက်တွဲဆိုးကျိုးအနေနဲ့

-ကျောက်ကပ်ပိုးဝင်ပြီးရောင်ရမ်းခြင်း

-ပြည်တည်နာဖြစ်ခြင်း

-သွေးဆင်းခြင်း

-Peritonitis ခေါ် အူတွင်းကလီစာများရောင်ခြင်း

-နောက်ပိုင်းတွင် သန္ဓေမအောင်တော့ဘဲ မြုံသွားခြင်း စသည်တို့အထိဖြစ်တတ်ပါတယ်။

ရင်သားရောင်ရမ်းခြင်း(Mastitis)ကတော့ ပြည်တည်နာအထိဖြစ်စေနိုင်ပါတယ်။

ဒီရောဂါကို ကာကွယ်ဖို့အတွက်နည်းလမ်းတွေကတော့ ကိုယ်ဝန်ဆောင်ချိန်နဲ့ မီးဖွားပြီးကာလမှာ အထူးဂရုစိုက်ရမှာဖြစ်ပါတယ်။

-တစ်ကိုယ်ရည်သန့်ရှင်းရေးကို ဂရုစိုက်ရပါမယ်။

-ကိုယ်ဝန်ရှိနေချိန်မှာ မည်သည့်ပိုးမှမဝင်နေအောင် တစ်ခုခုကို စမ်းသပ်မှုတွေ ဆေးစစ်ချက်တွေကနေ တွေ့ရှိတာနဲ့ ပျောက်ကင်းအောင် ကုသရပါမယ်။

-ဆီးပိုက်ထည့်ခြင်းကို တတ်နိုင်သလောက်ရှောင်ရပါမယ်။

-မိန်းမကိုယ်မှာ ချုပ်ထားတဲ့ အနာတွေရှိခဲ့ရင် သေချာသန့်စင်ပေးရပါမယ်။

ပြီးတော့ ဟော်မုန်းအပြောင်းအလဲနဲ့ စိတ်ပိုင်းဆိုင်ရာပြောင်းလဲမှုတွေကလည်း အမျိုးသမီးတွေကို ဝေဒနာခံစားရမှုပိုစေတတ်ပါတယ်။ ဒါကြောင့် အမျိုးသမီးတွေကို Emotional Support ပေးဖို့ကလည်း အရေးကြီးပါတယ်။

ဒါ့အပြင် နို့တိုက်မိခင်တွေကို ကလေးကိုကောင်းစွာ နို့တိုက်နိုင်ဖို့ နည်းလမ်းအမှန်ကိုသင်ပေးဖို့ လိုအပ်ပါတယ်။ ဒါမှသာ Mastitis ကိုကာကွယ်နိုင်မှာဖြစ်ပါတယ်။

ချမ်းတုန်ဖျားခြင်းဟာ ရောဂါတစ်ခုခုရဲ့ လက္ခဏာဖြစ်လို့ မပေါ့ဆဘဲ ဖြစ်တိုင်းမှာ ဆရာဝန်နဲ့အမြန်ဆုံးပြသပြီး ရောဂါကိုရှာဖွေကုသသင့်ပါတယ်လို့ ရေးသားဖော်ပြလိုက်ရပါတယ်။

အားလုံးကျန်းမာပျော်ရွှင်ကြပါစေ။

မောင်(ဆေး-၁)