ကလေးကိုထမင်းဝါးကျွေးခြင်း

ကလေးကိုထမင်း သို့မဟုတ် တခြားအစားအစာတွေကို ဝါးပြီးကျွေးတာကို Pre-mastication/ Pre-chewing လို့ခေါ်ပါတယ်။ ဒီအပြုအမူကို မိခင် သို့မဟုတ် ဆွေမျိုးများက ကလေးကိုပြုစုစောင့်ရှောက်ရင်း ကလေးအသက်ခြောက်လနောက်ပိုင်း ဖြည့်စွက်စာစားတဲ့ကာလမှာ ပြုလုပ်လေ့ရှိကြပါတယ်။ ဒီအပြုအမူဟာ ကျွန်မတို့ပတ်ဝန်းကျင်မှာ မစိမ်းလှပါဘူး။ မိခင်တော်တော်များများပြုလုပ်လေ့ရှိသလို ကလေးထိန်းပေးတဲ့ အဘွား၊အဒေါ်တွေကလည်း ဝါးပြီးခွံ့တတ်ကြပါတယ်။

ထမင်းဝါးကျွေးတဲ့အခါရနိုင်တဲ့ အကျိုးကျေးဇူးတွေကိုတော့ လေ့လာဆဲဖြစ်ပါတယ်။ ဒီလိုဝါးကျွေးတဲ့သူဟာ ကျန်းမာပြီး ဘာရောဂါမှမရှိရင် ကလေးကို အာဟာရဖြစ်စေပြီး ခုခံအားနဲ့ဆိုင်တဲ့အကျိုးကျေးဇူးတွေရရှိစေတယ်လို့လည်းဆိုပါတယ်။ ဒါပေမယ့်ခုလိုခေတ်မီလာတဲ့အချိန်မှာ ကလေးကို ဝါးမကျွေးဘဲ ကြေညက်အောင်ချက်ပြုတ်ထားတာမျိုး ကျွေးလို့ရပါတယ်။ အသားဆိုရင်လည်း အတုံးအသေးဆုံးဖြစ်အောင်ချေထားတာမျိုးလုပ်ပြီး ဝါးကျွေးခြင်းကိုရှောင်လို့ရပါတယ်။ ဓလေ့ထုံးတမ်းအရတော့ ဒီလိုထမင်းဝါးကျွေးခြင်းဟာ ပျောက်ပျက်ဖို့မလွယ်ကူပါဘူး။

ကလေးကိုထမင်းဝါးကျွေးတဲ့အခါ….

ဘတ်တီးရီးယားကြောင့်ဖြစ်တဲ့ သွားနဲ့ခံတွင်းရောဂါ (Dental Disease) တွေရှိတဲ့လူက ကလေးကိုထမင်းဝါးကျွေးရင် ကလေးကိုပါ ဘတ်တီးရီးယားတွေကူးစက်နိုင်ပါတယ်။ ကလေးကိုပြုစုစောင့်ရှောက်သူရဲ့ ခံတွင်းပိုင်းဆိုင်ရာ ကျန်းမာရေးကောင်းဖို့လိုအပ်ပါတယ်။

တံတွေးကနေကူးစက်တဲ့ရောဂါတွေလည်း ဖြစ်နိုင်ပါတယ်။ အသည်းရောင်အသားဝါ G ၊ ရေယုန်၊ TT Virus၊ အသည်းရောင်အသားဝါ B ပိုး စတာတွေဖြစ်ပါတယ်။ ပါးစပ်ထဲမှာအနာဖြစ်နေတာမျိုးဆိုရင်တော့ ကလေးကို ထမင်းဝါးမကျွေးသင့်ပါဘူး။

ကလေးကိုထမင်းဝါးကျွေးခြင်းဟာ ယဉ်ကျေးမှုအရရော ဓလေ့အရရော ကြုံတွေ့လေ့ရှိတဲ့ကိစ္စတစ်ခုဖြစ်ပါတယ်။ အဓိကကတော့ ပြုစုစောင့်ရှောက်သူရဲ့ဆုံးဖြတ်မှုနဲ့ ထမင်းဝါးကျွေးသူရဲ့ သွားနဲ့ခံတွင်းကျန်းမာရေးနဲ့ တစ်ကိုယ်ရည်ကျန်းမာရေးအခြေအနေတွေအပေါ်မှာမူတည်ပါတယ်လို့ရေးသားလိုက်ရပါတယ်။

အားလုံးကျန်းမာပျော်ရွှင်ကြပါစေ။

မောင်(ဆေး-၁)