ကျွန်တော့်ဆေးခန်းနှင့် ကျွန်တော့်ပတ်ဝန်းကျင်

ကြောက်သင့်တာကို ကြောက်ပါ
“ဆရာ၊ မခွဲဘူးနော် (အဲဒီလောက်ပဲ ရေးလိုက်ရင် ဆရာနဲ့မခွဲနိုင်ဘူးတို့တဲ့အဓိပ္ပါယ်ထွက်နေတယ်နော်) မခွဲဘူး၊ ဘယ်တော့မှ မခွဲဘူး”

“အေးပါ၊ ငါကလည်း မလိုရင် မခွဲပါဘူးဟာ။ (အင်မတန်ရင်းနှီးတဲ့လူနာပါ) နင်ချိုင်းမှာ ပြည်တည်နေ တယ်မဟုတ်လား”

“ဆရာ ဘယ်လိုသိသလဲ၊ ဘာဖြစ်ဖြစ် မခွဲဘူးနော်၊ ကြောက်တယ် နာမှာကြောက်တယ်”

“နာမှာ ကြောက်တယ်သာဆိုတယ်၊ အခုအတော်နာနေပြီမဟုတ်လား။ ခွဲလိုက်ရင် မနာတော့ဘူးပေါ့”

“ဟင့်အင်း ဟင့်အင်း၊ ခွဲရင် နာမှာပိုကြောက်တယ်”

“အဲ့ဒါဆိုရင် မနာအောင်လို့ဆေးရုံမှာခွဲ၊ မေ့ဆေးပေးထားရင် ဘယ်နာတော့မှာလဲ၊ သိတောင်သိမှာ မဟုတ်ဘူး”

“ဆရာကလည်း ဆေးရုံမှာသွားခွဲဖို့ တတ်နိုင်လို့ကတော့ ဆရာ့ဆီ လာတောင်မလာဘူး”

“ဟုတ်တော့လည်း ဟုတ်ပါတယ်။ ကျွန်တော်တို့အရပ်ထဲမှာ သောင်းဂဏန်းလောက်ကို အလွယ်တကူ မထုတ်နိုင်တဲ့သူတွေအတော်များပါတယ်။ သူတို့ရဲ့ မှီခိုရာဖြစ်တဲ့ ကျွန်တော့်ဆေးခန်းလေးကို ဒါနဲ့ပဲ ရပ်တည်နေတာပါ”

“အေး၊ နင် ငါ့ကိုအားကိုးတယ်ဆိုတာကို နားလည်ပါတယ်။ ကဲ …ခုတင်ပေါ်တက်။ ဘယ်လိုဖြစ်တယ်၊ ဘယ်လောက်ဖြစ်နေတယ်ဆိုတာကို ကြည့်ပါရစေဦး။ နင်က ညာဘက်မှာဖြစ်နေလို့ ညာဘက်ကခုတင်ပေါ် တက်”

“ဆရာက ဘယ်လိုသိလို့ ဘယ်၊ ညာ ခွဲပြောနေတာလဲ”

“နင့်ညာဘက်ချိုင်းကို ကပ်မထားဘဲ မြှောက်ပြီး ခါးပေါ်လက်ထောက်လာပြီး နာတယ်လို့အော်နေတာ ပုံမှန်အနေအထားမှ မဟုတ်တာ။ ဒါမျိုးက တို့ကျောင်းသားဘ၀ကတည်းက ခန့်မှန်းပညာသင်ခဲ့ပြီးသား။ ထိုင်ခုံမှာ အတည့်ထိုင်ရင်ဖြစ်ရဲ့သားနဲ့ ဖင်တစ်ခြမ်းစောင်းထိုင်ပြီး တစ်ခြမ်းကို ထိုင်ခုံနဲ့မထိအောင်ထိုင်ထားရင် (အခုခေတ် မော်ဒယ်လ်ထိုင် ထိုင်ရင်) အဲဒါစအိုဝပတ်လည်မှာ တစ်ခုခုရောင်နေလို့ပဲ။ ပြည်တည်တာဖြစ်ရင်ဖြစ်၊ မဖြစ်ရင် စအိုကွဲနာပဲ။ အဲဒါလျှပ်တပြက်ရောဂါအမည်တပ်နည်းပေါ့။ ကဲ …ပြောစမ်းပါဦး၊ နင်ကဒီဘုကို ဒီလောက်ကြီးအောင် ဘာပြုလို့ ထားထားတာလဲ”

“ဘယ်သူက ထားချင်ပါ့မလဲဆရာရယ်၊ ဆရာတို့ဆီလာပြဖို့က ခြသေ့င်္တွေ လိုသေးတယ်လေ။ ဒါကြောင့် ဆေးဆိုင်မှာ ဆေးဝယ်သောက်တာပေါ့။ မပျောက်နိုင်ဘဲ ပိုကြီးလာတော့မှ ဆရာ့ဆီကို မရှိရှိတာ ပေါင်ပြီးလာကုရတာ”

“အေး ဘက်ဂျက်ကြောင့် ထိထိရောက်ရောက်မကုနိုင်တာကိုတော့ ငါလက်ခံပါတယ်ဟာ။ ဒါပေမယ့် အခုလို ဆေးဆိုင်မှာပြောပြီး ဆေးဝယ်သောက်တဲ့ပြဿနာက သေးတာမဟုတ်ဘူး။ ပါရာစီတမောလို၊ ဘာမီတွန်လို အိမ်သုံးဆေးတွေကို အလွယ်တကူရတာ ကောင်းပေမယ့် ဆရာဝန်ပေးမှ သောက်ရမယ့် ဆေးတွေကို ဆရာဝန်ရဲ့ ညွှန်ကြားချက်မရှိဘဲ သုံးနေတာတော့ မကောင်းဘူး”

“ဘာများ မကောင်းတာရှိလို့လဲဆရာ၊ သူတို့ပေးတဲ့ ဆေးလည်း ရောဂါပျောက်တာပဲ မဟုတ်လား”

“သာမန်ရောဂါတွေက ဆေးမသောက်ဘဲတောင် ပျောက်နိုင်တာတွေရှိတယ်။ နောက်ပြီး ဘယ်သူတွေက ဘာဆေးနဲ့မတည့်ဘူးဆိုတာ ဆရာဝန်တွေက မှတ်ထားကြပေမယ့် ဆေးဆိုင်တွေက ဘယ်မှတ်ထားမှာတုံး။ မတည့်တဲ့ဆေးတွေ ပေးမိလို့ အစာအိမ်ပေါက်ထွက်သွားတာတွေ၊ ကျောက်ကပ်ပျက်စီး သွားတာတွေ၊ ရင်ကျပ်ပန်းနာထတာတွေ၊ အဆင်မသင့်တာတွေများတတ်တယ်။ နောက်ပြီး ဆေးသောက်ဖို့ အချိန်တွေ၊ ဆေးအချိန်အဆတွေလည်း အတိအကျသိတာမဟုတ်ဘူး။ ဆိုင်တာမဆိုင်တာလည်း သိတာမဟုတ် ဘူး။ ဒါဆိုရင်ဆေးယဉ်တဲ့ ပြဿနာတွေလည်း အများကြီးဖြစ်လာမှာ။ ခေတ်မီတဲ့နိုင်ငံမှာဆိုရင် ဒီလိုဆေးဆိုင် တွေက ဆရာဝန်လက်မှတ်ထိုးထားတဲ့ ဆေးစာ၊ ရက်စွဲပါတဲ့ဆေးစာနဲ့မှ ဆေးရောင်းတာ။ ရက်စွဲလို့ ပြောတာ ကလည်း ဟိုအရင်ကသောက်ထားတာကို အခုရောဂါနဲ့ဆိုင်၊ မဆိုင်မသိဘဲ ၀ယ်သောက်တာ ဖြစ်မှာစိုးလို့ ဟုတ်ပြီလား။ အခုဆိုရင် ဆေးသောက်တာ မမှန်တာရယ်၊ ရောဂါပိုး ပြင်းတာရယ်ကြောင့် နင်ဆေးသောက် သော်လည်း မပျောက်။ ငွေကုန်၊ အနာခံရတာပေါ့”

“ဆရာ ရှင်းပြတာ မှတ်ထားပါ့မယ်။ ဒါနဲ့ဆရာက ခုတင်နှစ်လုံးတောင် ဘာဖြစ်လို့ထားထားတာလဲ”

“ငါ့ဆေးခန်းက နင်အခုဖြစ်သလို အနာတွေ၊ ပြည်တည်နာတွေ အများချည်း လာတတ်တယ်။ နောက်ပြီး အနာကိုင်ပြီးရင်ဖြစ်ဖြစ်၊ ဆေးထိုးပြီးရင်ဖြစ်ဖြစ် လူနာတွေက ချက်ချင်းထသွားဖို့ မကောင်းဘူး။ ခဏတော့ လှဲနေဖို့ကောင်းတယ်။ နို့မဟုတ်ရင် အပြင်ထွက်ပြီးမှ မူးလဲတတ်တဲ့ လူတွေများတယ်။ အဲဒီတော့ ခုတင်နှစ်လုံးရှိရင် လူနာလည်း ချက်ချင်းမဆင်းရတော့ဘူး။ ဟိုဘက်ခုတင်မှာ နောက်လူနာကို စစ်ဆေးပေးလို့ရ တယ်။ အလယ်မှာခန်းဆီးကာထားတော့ တစ်ယောက်ကို တစ်ယောက်မမြင်ရပါဘူး။ တစ်ဘက်က မေးနေသံ ကိုတော့ ကြားနိုင်တယ်ပေါ့။ ဒါပေမယ့် မကြားစေချင်တာရှိရင်တော့ ဟိုဘက်ကလူနာ ထွက်သွားပြီးမှပဲ ဒီဘက်က လူနာကို မေးမြန်းတာလုပ်ပါတယ်။ နင်တို့အကြောင်းတွေ သူများမသိစေရပါဘူး၊ ဟုတ်ပြီလား”

“မခွဲဘူးနော်၊ ကြောက်တယ်”

“အေးပါ၊ နင့်ပြည်ဘုက မှည့်တောင် မှည့်နေပြီ။ ကဲ … အန်တီရေ၊ သွေးမြင်ရင် လန့်တတ်သလား၊ မူးလဲတတ်သလား။ မူးတတ်ရင်တော့ အပြင်ကပဲစောင့်နော်။ ဆရာမ ရှိတယ်၊ သူ ကူညီပေးလိမ့်မယ်။ စိတ်ချ၊ ဘာမှ မဖြစ်စေရဘူး။ တော်တော်ကြာ ဘေးကလူ မူးလဲရင် ကျွန်တော့မှာ လူနာကို ဆက်ကြည့်ရမှာလား၊ မူးလဲတဲ့လူကို ကြည့်ရမှာလားဖြစ်နေဦးမယ်။ နောက်ပြီး မူးလဲသွားရင် ခေါင်းကွဲ၊ ဘာညာနဲ့ဆို နောက်ထပ်လူနာ တိုး လာရင် အန်တီတို့အတွက် မကောင်းဘူးလေ၊ ကဲ … ငါရေဆေးကြည့်မယ်နော်၊ ရေနွေးနဲ့ပါ”

“ပူလိုက်တာ”

“မပူပါဘူး၊ ငါတောင်လက်နဲ့ ကိုင်လို့ရတာပဲ”

“ဒီမှာ ရောင်နေတော့ ပူတာပေါ့”

“နည်းနည်းပါ၊ ကဲ … ငါ့ဆေးခန်းခေါင်မိုးကို ကြည့်လိုက်စမ်း၊ ဘာနဲ့မိုးထားသလဲ”

“သွပ်မိုးထားတာ မြင်သားပဲ။ ဆရာကလည်း ဘာတွေမေးနေပြန်ပြီလဲ။ ဒီမှာ နာနေရတဲ့ကြားထဲ”

“အေးလေ၊ သွပ်မိုးမှန်းတော့ သိတာပေါ့။ ဘယ်နှဂိတ်လဲ နင်သိသလား” (မင်းသိလား ဆိုတဲ့ သီချင်း ဆိုပြတာတော့ မဟုတ်ပါ)

“ဆရာကလည်း ဘယ်နှဂိတ်လဲဆိုတာ ဘာကိုပြောတာလဲ”

“အေး … နင်တို့ ကျောင်းစာရယ်၊ အင်တာနက်ချက်နေတာနဲ့ပဲ ဂျမခါနာ ဟောလစ်တွေနည်းကုန်ကြပြီ”

“ဘာလဲ ၊ဂျမခါနာ ဟောလစ်ဆိုတာ”

“ဂျမခါနာဆိုတာ အခုဗဟိုအမျိုးသမီးဆေးရုံကိုခေါ်တာ။ အခု ငါပြောတာက လူရွှင်တော်ပြက်လုံးမှာပါ တယ်။ ဂျင်နရယ်နောလိပ်၊ အထွေထွေ ဗဟုသုတကိုပြောတာ”

“အား”

“ဟော …ပြည်တွေ ထွက်သွားပြီ၊ နည်းနည်းနာမယ်။ ဆေးထည့်နေပြီ။ ငါ့မှာလေ နင်စိတ်ပြောင်းအောင် လို့ ပြောနေရတာ။ ငါတို့ပြင်ပဆေးခန်းတွေက ဆေးရုံတွေလို မေ့ဆေးလည်းပေးလို့မရ၊ လူနာတွေကိုလည်း သက်သာစေချင်တော့ စိတ်ပြောင်းအောင် လှည့်စားပြီး ဒီလိုအမြန်လုပ်တဲ့နည်းကိုသုံးရတယ်။ နိုင်ငံခြားမှာဆိုရင် တော့ တရားစွဲခံရကိန်းပေါ့။ ဒါပေမယ့် သူတို့ဆီမှာက ဘာလုပ်လုပ် လူနာတွေက နင့်ခနဲနေအောင်ပေးရတာ။ ဆရာဝန်ကလည်း မြက်မြက်ကလေးရတော့ အားလုံးလုပ်ပေးနိုင်အောင် ပြင်ဆင်ထားနိုင်တယ်။ တို့ဆီမှာက လိုအပ်တာတွေရဖို့လည်း အခက်အခဲရှိနေချိန်၊ နင်တို့ကလည်း သိပ်အကုန်အကျမခံနိုင်ဆိုတော့ နှစ်ဦးနှစ်ဖက် ပြေလည်စေ၊ အလုပ်လည်းဖြစ်စေ၊ အန္တရာယ်လည်းကင်းစေဆိုတဲ့ နည်းလမ်းတွေရှာရတယ်။ အန္တရာယ်မကင်း ရင်တော့ ဘယ်လုပ်ပါ့မလဲ။ ဘာဖြစ်ဖြစ် ဆေးရုံသာသွားဆိုရင်လည်း ဆေးရုံမှာလူတွေ ပိတ်ကျပ်နေပြီး ဘာမှ လုပ်လို့ရတော့မှာ မဟုတ်တော့ဘူးလေ။ အခုလိုဆိုတော့ ဆရာ့ဆရာကြီးတွေကတော့ ဘာပြောမလဲမသိဘူး။ လူနာနဲ့ ဆရာဝန်နဲ့တော့ အဆင်ကိုပြေနေတာပဲ မဟုတ်လား”

“မနာတော့ဘူး ဆရာ၊ အတော်သက်သာသွားပြီ”

“အေး၊ ချိုင်းကို ကပ်ထား။ ဒါမှ အကြွင်းအကျန်တွေကို ညှစ်ထုတ်လိုက်သလို ဖြစ်သွားမှာ။ အနာခြောက် သွားရင် ခဏလေးနဲ့ကျက်တယ်။ ဆေးခန်းမှာဆိုတော့ ဆေးရုံမှာလိုအကြီးကြီးခွဲလို့ မဖြစ်ဘူးလေ။ ဖောက်ထုတ်ရုံလောက်ပဲလုပ်တာဆိုတော့ လက်ကျန်တွေထွက်ဖို့ လူနာကိုပြန်အားကိုးရတယ်။ ဆေးရုံမှာဆိုတော့ မေ့ဆေးပေးပြီးလုပ်ရင် အကုန်အစင်ထုတ်ရလွယ်တယ်လေ။ ငါဟိုဘက်ခုတင်က လူနာ သွားကြည့်လိုက်ဦးမယ်။ အန်တီရေ၊ ဆေးကောင်တာမှာ သောက်ဆေးသွားယူလိုက်တော့နော်။ နင်လည်း မှတ်ထား။ ကြောက်တတ်တယ်။ နာမှာ ကြောက်တယ်ဆိုရင် ထိထိရောက်ရောက်ကုမှဖြစ်မယ် ဆိုတာရယ်၊ တတ်နိုင်သမျှ စောစောကုဖို့လိုမယ် ဆိုတာရယ်၊ ကြောက်ရမယ့်အရာကို မကြောက်ဘဲ မကြောက်သင့်တာ မကြောက်ဖို့ လိုတယ်ဆိုတာပဲ။ ကြောက်ရမှာက ဆေးကို အလွယ်တကူမသောက်ဖို့။ ဆရာဝန်ကို မပြဘဲ ဆေးသောက်တာတွေ ကြောက်ရမယ်။ ဆေးယဉ်သွားမှာကို ကြောက်ရမယ်။ မကြောက်သင့်တာက လိုအပ်လို့ ဆေးသောက်ရတာ၊ ဆေးထိုးရတာ၊ ခွဲစိတ်ရတာကိုပဲ၊ မှတ်ထားနော်”

ခိုင်စိုးဝင်း (ထွေ-ကု)