ကလေးရဖို့ အဆင့်မြင့်နည်းလမ်းသစ်များ

တစ်ခါတစ်ခါ ကလေးဆိုသည်မယ် မလိုချင်သူများတွင် ဟောတစ်ယောက်…. ဟာတစ်ယောက် ရတတ်သော်လည်း၊ တကယ်လိုချင်သူများထံတွင် မျှော်သာမျှော် ပေါ်မလာဖြစ်တတ်၏။ သားသမီးမရသေးသူများအဖို့ ကံကောင်းသည့် တစ်ချက်ကတော့ ယခုလိုခေတ်မှီတိုးတက်နေသော ခေတ်တွင် လူဖြစ်လာရခြင်းဟုပင် ဆိုရပေမည်။
အရင့်အရင်ခေတ်များမှာ ကလေးမရလျှင် ထိုင်စောင့်ရုံ လည်ပင်းရှည်အောင်မျှော်ရုံမှတစ်ပါး အခြားမတတ်နိုင်။ ယခုခေတ်မယ်တော့ ကလေးရလိုသူများအနေဖြင့် အောက်ဖော်ပြပါကဲ့သို့ အဆင်မြင့်နည်းလမ်းများ အသုံးပြု၍ ကလေးရဖို့ ကြိုးစားနိုင်နေပြီဖြစ်သည် :

(၁) ဖန်ပြွန်သန္ဓေနည်းလမ်း (IVF) (In-Vitro Fertilization)

လုပ်ဆောင်ပုံ – ဆေးဝါးများ အသုံးပြု၍ အမျိုးသမီးဖြစ်သူ၏သားဥအိမ်မှ အရည်အသွေးပြည့်မှီသော မမျိုးဥများ ထုတ်နိုင်ရန် အသာအယာလှုံ့ဆော်ပေးသည်။အမျိုးသမီးဖြစ်သူရဲ့ မမျိုးဥကိုထုတ်ယူ၊အမျိုးသားဖြစ်သူရဲ့ သုတ်ပိုးကိုထုတ်ယူ…..ထို့နောက် ထို မမျိုးဥနဲ့သုတ်ပိုးကို ဖန်ပြွန်သန္ဓေနည်းဖြင့် ဓာတ်ခွဲခန်းထဲမှာ ပေါင်းစပ်ပြီး သန္ဓေအောင်စေမယ်။သန္ဓေအောင်သွားပြီး သန္ဓေသားရလာတဲ့အခါ အမျိုးသမီးရဲ့ သားအိမ်ထဲထည့်ပေးပြီး ကိုယ်ဝန်ဆောင်စေမယ်။

ပြုလုပ်သင့်တဲ့ အခြေအနေများ – သားဥပြွန်ပိတ်ဆို့ခြင်း၊သားဥပြွန်ပျက်စီးခြင်း စတဲ့ မမျိုးဥနဲ့ သုတ်ပိုး တွေ့ဆုံခြင်းကို အတားအဆီးဖြစ်စေသည့်အခြေအနေရှိသူများ၊ အကြောင်းရင်းရှာမရဘဲ ကလေးမရသူများ…..စသဖြင့်။

(၂) သုတ်ပိုးကို မမျိုးဥထဲ တိုက်ရိုက်ထည့်ခြင်း(ICSI) (IntraCytoplasmic Sperm Injection)

လုပ်ဆောင်ပုံ – အမျိုးသားဖြစ်သူထံမှ ထုတ်ယူထားတဲ့သုတ်ပိုးတွေထဲကမှ အရည်အသွေးအကောင်းဆုံးသုတ်ပိုးကို ရွေးချယ်ပြီး မမျိုးဥထဲထိ တိုက်ရိုက်ထည့်ပြီးသန္ဓေအောင်စေမယ်။သန္ဓေအောင်သွားပြီး သန္ဓေသားရလာတဲ့အခါ အမျိုးသမီးရဲ့ သားအိမ်ထဲထည့်ပေးပြီး ကိုယ်ဝန်ဆောင်စေမယ်။

ပြုလုပ်သင့်တဲ့ အခြေအနေများ – သုတ်ပိုးကောင်ရေနည်းပါးခြင်း၊ သုတ်ပိုးလှုပ်ရှားမှုနည်းခြင်း၊သုတ်ပိုးများစွာ DNA ပျက်စီးမှုများနေခြင်း စသော အမျိုးသားဘက်မှ မျိုးအောင်ရန်ခက်ခဲနေသူများတွင် သုံးသည်။

(၃) သုတ်ပိုးကို သားအိမ်ထဲထည့်ပေးခြင်း (IUI) (IntraUterine Insemination)

လုပ်ဆောင်ပုံ – အမျိုးသမီးဖြစ်သူ သားဥကြွေချိန်တွင် သားအိမ်အတွင်းသို့ အမျိုးသားဖြစ်သူရဲ့ သုတ်ပိုးကို ထည့်ပေးခြင်းဖြစ်သည်။ မမျိုးဥနှင့် သုတ်ပိုးတွေ့ပြီး သဘာဝအလျောက် သန္ဓေအောင်သည်ကို စောင့်ပြီး ကလေးရစေသည့် နည်းလမ်းဖြစ်သည်။(အမျိုးသမီးဖြစ်သုထံတွင် သားဥကြွေခြင်းပုံမမှန်မှုများရှိပါက သားဥကြွေဆေး အသုံးပြုရန် လိုအပ်ကောင်းလိုအပ်ပေမည်။)

ပြုလုပ်သင့်တဲ့ အခြေအနေများ -သုတ်ပိုးအလှူရှင်ဖြင့် ကလေးရယူသူများတွင် အသုံးများသည့်နည်းလမ်းတစ်ခုဖြစ်သည်။

ပိုင်နီမေ
Ref :
https://www.manchesterfertility.com/blog/item/what-is-ivf-icsi-and-iui-and-which-is-best-for-you/?fbclid=IwAR0h6f1D3Dy7u-_lHyTYmZyqz3N-jkJK1mi7VBQK2pwhrzf03zCtgdIrMD0