ဗီတာမင်စီက ဝိတ်ကျစေသလား

အခုခေတ်မှာ လူတွေဝ၊ဝလာလိုက်ကြတာ ရောဂါတွေလဲစုံလို့။ ဝတာနဲ့ ပတ်သက်တဲ့ ဆီးချို၊နှလုံးသွေးကြောကျဉ်း၊လေဖြတ်လေငန်းစတဲ့ ရောဂါတွေလဲပိုပို များလာတယ်။ အပြိုင်အဆိုင်တွေများပြီး တိုးတက်လာတဲ့ခေတ်ကြီးမှာ သမုဒ္ဒရာဝမ်းတစ်ထွာအတွက်အချိန်မလပ်ရုန်းကန်နေရလို့ မိမိကျန်းမာရေးကိုတောင်ဂရုမစိုက်နိုင်၊အအိပ်အစားတွေမမှန် တွေ့ရာနေရာတွေ့တဲ့အစားအစာဝယ်စားနဲ့ ရှင်သန်နေကြရတာ။

ကိုယ်အလေးချိန်ထိန်းဖို့၊ဝိတ်လျှော့ဖို့အရေးမစဉ်းစားနိုင်ပဲ တစ်ရက်တစ်ရက်စားဝတ်နေရေးအတွက် ရုန်းကန်နေကြရတာ ကျန်းမာရေးတွေထိခိုက်နေရတာ မြင်မကောင်း။ ပိန်ဆေးတွေအဆီကျဆေးတွေအပြည့်နဲ့ဈေးကွက်ထဲမှာ ဈေးကြီးပေးဝယ်သောက်မိပြီး မပိန်တဲ့အပြင်ဆိုးကျိုးပါပေးသွားတဲ့ ပိန်ဆေးတွေကလဲမနည်းမနော။
ဒီတော့ ကျန်းမာရေးနဲ့လဲ ညီညွတ်၊သဘာဝအတိုင်းလဲဖြစ်တဲ့ ဝိတ်ကျခြင်းကိုလဲအထောက်အကူပေးတဲ့ ဗီတာမင်လေးတစ်ခုအကြောင်းပြောကြည့်ရအောင်။

ဝိတ်ကျခြင်းကို သဘာဝအတိုင်းအားပေးတဲ့ ဗီတာမင်က ဘာလဲ…

ကျန်းမာရေးနဲ့ညီညွတ်စွာ ဝိတ်ကျဖို့ကိုအားပေးတဲ့ဗီတာမင်ကတော့ ဗီတာမင်စီ ဖြစ်ပါတယ်။

ဗီတာမင်စီက ဝိတ်ကျဖို့ကို ဘယ်လိုအထောက်အကူဖြစ်စေတာလဲ…

ဗီတာမင်စီဟာ ကိုယ်အလေးချိန်နဲ့ပြောင်းပြန်အချိုးကျလေ့ရှိပါတယ်။ဆိုလိုတာက ဝတဲ့လူတွေမှာ ဗီတာမင်စီဓါတ်နည်းနေတတ်တာကိုတွေ့ရလေ့ရှိပါတယ်။အမေရိကန်အာဟာရကောလိပ်ရဲ့ ၂၀၀၅ခုနှစ်မှာထုတ်တဲ့ ဂျာနယ်မှာ ဗီတာမင်စီ စားသုံးမှုမြင့်မားတဲ့လူတွေဟာ ကိုယ်အလေးချိန်ညွှန်းကိန်း(BMI)လျော့နည်းကြကြောင်းဖော်ပြထားပါတယ်။ဒါ့အပြင် လေ့ကျင့်ခန်းတွေလုပ်တာချင်းအတူတူမှာ ဗီတာမင်စီပြည့်ဝစွာစားသုံးထားတဲ့လူက ဗီတာမင်စီဓါတ်မပြည့်ဝတဲ့လူထက် အဆီကိုချေဖျက်ရာမှာ ၃၀ရာခိုင်နှုန်းလောက်ပိုပြီးချေဖျက်နိုင်တာကိုတွေ့ရပါတယ်။ဒါကြောင့်ဗီတာမင်စီမပြည့်ဝတဲ့လူဟာ အဆီကိုချေဖျက်ခြင်းနဲ့ ဝိတ်လျော့ခြင်းမှာ ပိုမိုခက်ခဲတတ်ပါတယ်။ဗီတာမင်စီလုံလောက်စွာစားသုံးခြင်းက ပြင်းအားအတန်အသင့်(moderate intensity)ရှိ လေ့ကျင့်ခန်းများလုပ်တဲ့အခါမှာ ခန္ဓာကိုယ်အဆီများကိုဓါတ်တိုးချေဖျက်ခြင်းကို များစွာအထောက်အကူပေးနိုင်ကြောင်းတွေ့ရှိရပါတယ်။လေ့ကျင့်ခန်းကိုပြင်းထန်စွာလုပ်သော်လည်း ဗီတာမင်စီဓါတ်နည်းတဲ့အခါမှာ အဆီချေဖျက်မှုဟာထိုက်သင့်သလောက်မဖြစ်နိုင်ပါဘူးတဲ့။ဂျာမန်ဆေးပညာရှင်တွေရဲ့အဆိုအရ ဗီတာမင်စီဟာ ခန္ဓာကိုယ်အတွက်ဥပါဒ်ဖြစ်စေတဲ့ကော်တီဆောလ်ဟော်မုန်း(Cortisol)များမြင့်တက်လာမှုကို ထိန်းသိမ်းပေးနိုင်တယ်ဆိုပါတယ်။Cortisol ဟာ ခန္ဓာကိုယ်အဆီသိုလှောင်မှုကိုများစေပြီး လူကိုဝစေနိုင်ပါတယ်။ဒါ့အပြင် ဗီတာမင်စီဟာ ဇီဝရုပ်ဖြစ်စဉ်(Metabolism)ကို တိုးတက်မြန်ဆန်စေတာကြောင့် ၎င်းနည်းဖြင့်လည်းအဆီလောင်ကျွမ်းခြင်းကို အားပေးပြန်ပါတယ်။အိန္ဒိယနိုင်ငံမှာပြုလုပ်တဲ့ သုသေတနစာတမ်းအရ ဗီတာမင်စီ တစ်ရက်(၁၀၀၀ မီလီဂရမ်)ကို ခြောက်ပတ်မျှသောက်သုံးပါက ဆီးချိုရောဂါရှင်တွေမှာ သွေးတွင်းကိုလက်စထရော၊Triglycerides နဲ့ သကြားဓါတ်ကိုပါလျှော့ချပေးဖို့ အထောက်အကူဖြစ်စေတယ်လို့ဆိုပါတယ်။

ဗီတာမင်စီဟာ အံ့အားသင့်ဖွယ် ပိန်ဆေး(ဝိတ်ကျဆေး)လား…

မဟုတ်ပါဘူးလို့ပဲ ငြင်းရပါလိမ့်မယ်။ဗီတာမင်စီဟာ ဝိတ်ကျခြင်းကိုများစွာအထောက်အကူပေးနိုင်ပေမယ့် ၎င်းကိုပိန်ဆေး(ဝိတ်ကျဆေး)အနေနဲ့ သူချည်းသက်သက်သုံးလို့ကား မရနိုင်ပါ။တစ်နေ့တာအတွက်လုံလောက်တဲ့ ကယ်လိုရီကိုသာစားသုံးခြင်းနဲ့ လေ့ကျင့်ခန်းပုံမှန်လုပ်ခြင်း၊တက်ကြွလှုပ်ရှားတဲ့နေထိုင်မှုစနစ်နဲ့ ကျန်းမာရေးနဲ့လျော်ညီတဲ့စားသောက်မှုပုံစံကသာ ဝိတ်ကျဖို့အတွက်အကောင်းဆုံးဆေးပါ။ဗီတာမင်စီကိုတော့ ဝိတ်ကျဖို့အတွက်အထောက်အကူ ဖြည့်စွက်စာအနေနဲ့သာ သုံးစွဲနိုင်မှာဖြစ်ပါတယ်။

ဗီတာမင်စီကို တစ်ရက်ဘယ်လောက် သောက်သုံးလို့ရသလဲ…

ဗီတာမင်စီဟာ အမျိုးသားတွေအတွက်တော့ တစ်ရက်ကိုအနည်းဆုံး(၉၀မီလီဂရမ်)လိုအပ်ပြီး အမျိုးသမီးတွေအတွက်မှာ(၇၅မီလီဂရမ်)အနည်းဆုံးလိုအပ်ပါတယ်။အများဆုံးအနေနဲ့တစ်ရက်ကို (၂၀၀၀ မီလီဂရမ်)ထက် ပိုပြီးမသောက်သင့်ပါဘူး။ဘာဖြစ်လို့လဲဆိုရင် ၎င်းပမာဏထက်ကျော်လွန်လာတဲ့အခါမှာ ရင်ပူ၊ပျို့အန်ခြင်း၊ဗိုက်ရစ်ခြင်း၊ဝမ်းပျက်ခြင်း၊အိပ်မပျော် ခေါင်းကိုက်ခြင်းများ ဖြစ်ပေါ်စေနိုင်တာကြောင့်ပါ။ထို့အပြင် ပိုစားမိတဲ့ဗီတာမင်စီတွေကိုလဲခန္ဓာကိုယ်ကအသုံးမပြုတာကြောင့် ငွေပိုကုန် လူပိုပင်ပန်းရုံပဲရှိမှာ ဖြစ်ပါတယ်။

ကဲ ဒီလောက်ဆိုရင် ဗီတာမင်စီနဲ့ ဝိတ်ကျခြင်းဆက်စပ်ပုံကိုအကြမ်းဖျဉ်းသိလောက်ပြီထင်ပါတယ်။

အားလုံးပဲ ကျန်းမာချမ်းသာနိုင်ကြပါစေ။

dr.ye’lwin mm