🔷 စိတ်ဖိစီးမှုများက ဦးဏှောက်ကို ဖိရာဝယ် 🔷

‘လူတစ်ခု ပူမှုရယ်တဲ့ဆယ်ကုဋေ’ တဲ့။

‘လူဖြစ်ရတဲ့ ဒုက္ခ’ တဲ့။

လူဖြစ်လာရင်တော့ ဖိစီးမှုတွေဆိုတာ မွေးကင်းစကနေ သေတဲ့အထိ ကိုယ်ရော စိတ်ပါ ရှိစမြဲ။ ပေါ်လာလိုက် ပျောက်သွားလိုက်။
နောက်တစ်ခုပေါ်လာလိုက် ပြန်ပျောက်သွားလိုက်။ ဒီလိုနဲ့ပဲ ပိုကြံ့ခိုင် သန်မာလာရတာကိုး။

စိတ်ထောင်းလို့ ကိုယ်ကြေတတ်တယ်။ ဒီလိုပဲ ခန္ဓာကိုယ်ကြီးကြောင့်လည်း စိတ်က ဖိစီးနေရတတ်တယ်။ အပြန်အလှန်ပေါ့။

🎯 Stress လို့ခေါ်တဲ့ ဖိစီးမှုတစ်ခုဟာ ခဏနဲ့ ပျောက်သွားတဲ့ Acute stress ဆိုရင်တော့ တခါတလေ လူကိုအကျိုးပြုနိုင်ပါတယ်။
ဥပမာ အရေးကြီးပြီ နောက်ဆုံးအချိန်ရောက်ပြီဆိုရင် ဘယ်ကရောက်လာမှန်းမသိတဲ့ ခွန်အားတွေနဲ့ တွန်းတွန်းတိုက်တိုက် အလုပ်ပြီးသွားတာမျိုးပေါ့။

🎯 ဒါပေမဲ့ ခဏနဲ့ပျောက်မသွားဘဲ အကြာကြီးတည်မြဲနေတဲ့ chronic stress အခြေအနေမျိုးတွေ..

ဥပမာ…မိသားစုဝင်တစ်ယောက်ယောက်ဆုံးရှုံးတာမျိုး၊ အလုပ်ပြုတ်တာ၊ ရောဂါတစ်ခုခုဖြစ်တာ၊ လုပ်ငန်းခွင်ပြဿနာ၊ အိမ်ထောင်ရေးအဆင်မပြေတာ၊ စီးပွားရေးအခက်အခဲ၊ ကြွေးမြီပြဿနာ၊ ပင်စင်ယူလိုက်တာ ၊ အိမ်ထောင်ကွဲတာ ၊ ကလေးမွေးတာ ၊ စတာမျိုးတွေ ဖြစ်လာရင်တော့ တော်တော်လေး သတိထားရပါမယ်။

အလွယ်ပြောရရင်တော့ ဗေဒင်ဆရာဆီ ပြေးချင်ကြတဲ့ အခြေအနေမျိုးတွေပေါ့။

ဒီအခြေအနေမျိုးမှာ သတိထားဖို့လိုပါတယ်။ ကြောက်ဖို့ကောင်းပါတယ်။ သွေးတိုး၊ ဆီးချို၊ နှလုံးရောဂါ၊ စိတ်ကျရောဂါ၊ အဝလွန်ရောဂါ၊ ဝက်ခြံ၊ နှင်းခူ နဲ့ အမျိုးသမီးတွေမှာ ဓမ္မတာပြဿနာတွေ ဝင်လာတတ်ပါတယ်။

🔺 အချိန်ကြာကြာ စိတ်ဖိစီးလာရင် ဘာလက္ခဏာတွေပြတတ်လဲ?

– ခဏခဏ ခေါင်းကိုက်

– ခဏခဏ ဗိုက်အောင့်

– ခဏခဏ ခန္ဓာကိုယ် နာကျင်ကိုက်ခဲ

– ခဏခဏ ဇက်ကြောတက်..မေးရိုးတွေတောင့်တင်း

– ဝမ်းအရမ်းချုပ် ဒါမှမဟုတ်ရင် ဝမ်းခဏခဏသွား

– အသက်ရှူမဝ မောပန်းလွယ်

– သိသိသာသာ ပိန်လာတာ..ဝလာတာ

– အာရုံစိုက်မရ..သတိမေ့လွယ်

– အိပ်မပျော်..ဒါမှမဟုတ် အရမ်းအိပ်

– လိင်မှုကိစ္စအဆင်မပြေ

– အရက် နဲ့ မူးယစ်ဆေးတွေ ပိုစွဲလာ..ဆေးလိပ်ပိုသောက်ဖြစ်..

စတဲ့ လက္ခဏာမျိုးတွေ သတိထားမိလာရင် ဆရာဝန်ကို ကိုယ့်ရဲ့ စိတ်ဖိစီးမှုအကြောင်း သေချာ ပြောပြဖို့လိုပါတယ်။

🎯 စိတ်ဖိစီးမှုကို ဘယ်လိုဖြေရှင်းမလဲ?

– ဆေးလိပ် အရက် နှင့် ကဖင်းဓာတ် ရှောင်ပါ။ သကြားလျှော့ပါ။ Herbal Tea နဲ့ သစ်သီးဖျော်ရည်တွေ သောက်ပါ။ ရေများများသောက်ပါ။ ရေဓာတ်ပြည့်ဝနေပါစေ။

– ကိုယ်လက်လှုပ်ရှားမှုပိုလုပ်ပါ။

စိတ်တည်ငြိမ်ဖို့အတွက် စိတ်ဖိစီးမှုကြောင့် ပိုလျှံနေတဲ့ adrenaline နဲ့ cortisol ဟော်မုန်းတွေကို ပြန်အသုံးချပေးဖို့လိုပါတယ်။ ကောင်းကောင်းအိပ်ပျော်စေလို့ ပိုအကျိုးရှိပါမယ်။

စိတ်ညစ်ရင် လမ်းလျှောက်ပါ။

– စိတ်တည်ငြိမ်မဲ့ နည်းလမ်းတွေရှာပါ။

တရားထိုင်တာ၊ ဝင်လေထွက်လေ မှတ်တာ၊ တူရိယာ တစ်ခုခုတီးတာ၊ ဘာသာရပ်အသစ်တစ်ခုခုလေ့လာတာမျိုးတွေက စိတ်ကိုတည်ငြိမ်စေပါတယ်။

– တစ်ယောက်ယောက်ဆီမှာ ရင်ဖွင့်ပါ။

ကိုယ့်ကိုနားလည်ပေးနိုင်မဲ့ လူမျိုးတော့ ဖြစ်ဖို့လိုပါတယ်။ စိတ်ကျန်းမာရေးဆရာဝန်တစ်ယောက် ဒါမှမဟုတ် ကျွမ်းကျင်တဲ့ ဆွေးနွေးတိုင်ပင်သူတစ်ယောက် ဒါမှမဟုတ်ရင်လည်း မိသားစုဝင် သို့မဟုတ် သူငယ်ချင်းတစ်ယောက်ယောက်ပေါ့။ ကြိတ်မြုံထားတဲ့ ခံစားချက်တွေက သိပ်အန္တရာယ်များပါတယ်။

– အိပ်ရေးဝအောင် အိပ်ပါ။

အိပ်ရေးမဝလေ ဦးဏှောက်မှာ ဖိစီးမှုပိုများလေ မှန်မှန်ကန်ကန် တည်တည်ငြိမ်ငြိမ် တွေးတောဆုံးဖြတ်နိုင်စွမ်း မရှိလေ ဖြစ်ပါတယ်။

– Stress Diary လုပ်ပါ။

စိတ်ညစ်စရာကြုံတိုင်း စိတ်ဖိစီးတိုင်း အချိန်၊နေ့စွဲ၊ပတ်ဝန်းကျင်အခြေအနေ အသေးစိတ်နဲ့တကွ မှတ်တမ်းတင်ထားပါ။ ကိုယ့်ကို ဘာတွေက ဖိစီးစေပြီး ဘာတွေက သက်သာစေလဲ ကိုယ့်ကိုယ်ကို လေ့လာပါ။

– မနိုင်ဝန် မထမ်းပါနှင့်။

တချို့အခြေအနေတွေနဲ့ တာဝန်တွေကို ‘ဟင့်အင်း’ပြောတတ်တဲ့ အကျင့်မွေးပါ။

– နေမကောင်းချိန်တိုင်း အပြည့်အဝ အနားယူပါ။

ကိုယ့်ကိုယ်ကို ညှာတာပါ။ အနားမယူဘဲ အလုပ်လုပ်နေလို့ ပိုအလုပ်ဖြစ်မဖြစ်မသေချာပေမဲ့ အနားယူလိုက်ရင်တော့ ပိုမြန်မြန်နေကောင်းပြီး ပိုကောင်းအောင်လုပ်နိုင်မှာ သေချာပါတယ်။

ကဲ…အားလုံး..Stress တွေနဲ့ ဝေးကြပါစေ။

နီးခဲ့ရင်လည်း မြန်မြန်ပျောက်ကြပါစေ။

မြန်မြန်မပျောက်ခဲ့ရင်လည်း ကောင်းကောင်းရင်ဆိုင်ကျော်ဖြတ် အနိုင်ယူနိုင်ကြပါစေ။

Dr ဖြိုးဝေလင်း
(16.4.19)