ကိုယ်ဝန်ဆောင် နှင့် အသည်းရောင်အသားဝါ ဘီ

ကိုယ်ဝန်ဆောင် အမျိုးသမီးများ အသည်းရောင်အသားဝါ ဘီပိုးစစ်သင့်ပါသလား။
စစ်ဆေးသင့်ပါသည်။ ကိုယ်ဝန်အပ်သည့် အချိန်တွင် အသည်းရောင်အသားဝါဘီပိုး သာမက အိတ်ခ်ျအိုင်ဗွီ၊ အသည်းရောင်အသားဝါ စီပိုး၊ ကာလသားရောဂါပိုး ရှိမရှိပါစစ်ဆေးသင့်ပါသည်။ အဘယ်ကြောင့် ဆိုသော် ထိုရောဂါပိုးများသည် မိခင်မှတစ်ဆင့် ကလေးဆီသို့ ကူးစက်နိုင်သောကြောင့်ဖြစ်ပါသည်။ သို့သော် ကြိုတင်သိရှိပါက ကိုယ်ဝန်ဆောင်စဉ်၊ ကလေးမွေးစဉ်အချိန်များတွင် မကူးစက်အောင် နည်းလမ်းကောင်းများ ရွေးချယ် အသုံးပြု ကာကွယ်နိုင်သည့်အတွက် စစ်ဆေးသိရှိထားရန် လိုအပ်ပါသည်။

ကလေးကို မကူးစက်အောင် မည်သို့ ကာကွယ်နိုင်ပါသနည်း။
ရောဂါပိုးရှိသူ မိခင်မှ ကလေးဆီသို့ ကလေးမွေးဖွားသည့် အချိန်များတွင် အကူးစက်တတ်ဆုံးဖြစ်ပါသည်။ ထို့ကြောင့် မွေးဖွားလာသောကလေးကို လိုအပ်သော ကာကွယ်မှုရရှိစေရန်
• ကာကွယ်ဆေးအပြည့်အစုံအပြင် HBIG ဟုခေါ်သော ဘီပိုး အဆိပ်ဖြေဆေးကိုပါ ထိုးပေးရပါမည်။
• မွေးပြီး ၁၂ နာရီအတွင်း ဘီပိုးကာကွယ်ဆေးနှင့် ဘီပိုး အဆိပ်ဖြေဆေး ၂ မျိုးကို ၁ကြိမ် ထိုးပေးရမည်။ ထို့နောက် ကာကွယ်ဆေးကို ၁လအကြာနှင့် ၆လ အကြာတွင် ၂ကြိမ် ထပ်မံထိုးပေးရမည်။
• အကောင်းဆုံးမှာ ကလေး၏ဆရာဝန်နှင့် ညွှန်ကြားချက်ကို အတိအကျ လိုက်နာရန် ဖြစ်ပါသည်။
• မိခင် ဘီပိုးမစစ်ထားပါက ကလေးကို မွေးပြီး ၁၂ နာရီ အတွင်း ကာကွယ်ဆေးထိုးပေးရန် လိုအပ်ပါသည်။ ထို့နောက် မိခင်ကို ဘီပိုးစစ်ဆေး၍ ရှိပါက ဘီပိုး တုံ့ပြန်ဆေး (အဆိပ်ဖြေဆေး) ကို လျင်မြန်စွာထိုးပေးရန် လိုအပ်ပါသည်။

ကလေးတွင် ဘီပိုး ကူးစက်မှုရှိမရှိ မည်သို့သိနိုင်ပါသနည်း။
ကာကွယ်ဆေး အပြည့်အစုံထိုးထားပြီး နောက် ၁-၂လ အကြာ သို့ ကလေးအသက် ၉-၁၂ လ တွင် ဘီပိုး ပဋိပစ္စည်းများ (antibodies)နှင့် Ag ကို ပြန်လည်စစ်ဆေးခြင်းဖြင့် သိနိုင်ပါသည်။

ကလေးကို ကူးစက်သွားပါက မည်သည်တို့ဖြစ်တတ်ပါသနည်း။
ကူးစက်ခံရသောကလေးသည် ကူးစက်ခံရစဉ် ရောဂါလက္ခဏာ မပြတတ်သော်လည်း ၉၀ ရာခိုင်နှုန်းသော ကလေးများတွင် နာတာရှည် အသည်းရောင် အသားဝါဘီ ရောဂါဖြစ်တတ်ပြီး အသည်းပျက်စီးခြင်း၊ အသည်းကင်ဆာများနှင့် သေဆုံးသည်အထိဖြစ်တတ်ပါသည်။

ကလေးတိုင်း အသည်းရောင်အသားဝါ ဘီကာကွယ်ဆေး ထိုးသင့်ပါသလား။
အသည်းရောင် အသားဝါဘီပိုးသည် ဘီပိုးရှိသောမိခင်မှသာမက ဘီပိုးရှိသောသူများဆီမှ ကြီးငယ်မရွေး ကူးစက်နိုင်သော ရောဂါဖြစ်၍ ကလေးတိုင်း ဘီပိုးကာကွယ်ဆေး ထိုးထားသင့်ပါသည်။ ယခုအခါ ဆေးရုံများတွင် မွေးဖွားသောကလေးများအား ဆေးရုံမဆင်းမီ ဘီပိုးကာကွယ်ဆေး ထိုးပေးသည်သာမက မွေးဖွားစဉ်ကာကွယ်ဆေး မထိုးလိုက်ရသောကလေးများအတွက်လည်း ပုံမှန်ကာကွယ်ဆေးထိုး အစီအစဉ်များတွင် ထည့်သွင်းထိုးပေးလျက်ရှိသဖြင့် မိခင်များအနေဖြင့် မိမိကလေးကျန်းမာရေးအတွက် မပျက်မကွက် သွားရောက်ထိုးပေးရန်လိုအပ်ပါသည်။
ရီချို(ဆေး ၁)