အမျိုးသားများနှင့် ဒူလာရောဂါ

ယောက်ျားဒူလာ မိန်းမမီးယပ်ဆိုတဲ့စကားကို ကြားဖူးကြမှာပါ။ ဒူလာဆိုတာ အမျိုးသားတွေအဖြစ်များတဲ့ ဂေါက် (Gout)ရောဂါကို ခေါ်တဲ့ အရပ်အခေါ်ဖြစ်ပါတယ်။ဒီဂေါက်ရောဂါရဲ့ ဖြစ်ရတဲ့အကြောင်းအရင်း၊ ရောဂါလက္ခဏာတွေနဲ့ ကုသပုံတွေအကြောင်းကို ဒီဆောင်းပါးမှာ ရေးသားဖော်ပြပေးမှာဖြစ်ပါတယ်။

ရောဂါဘာကြောင့်ဖြစ်ရသလဲ?

အရိုးအဆစ်လေးတွေမှာ ယူရစ်အက်ဆစ် (Uric Acid Crystal) တွေစုပုံလာလို့ အရိုးအဆစ်တွေရောင်ရမ်းတဲ့ရောဂါဖြစ်ပါတယ်။ Uric Acid ဟာ ကျွန်မတို့နေ့စဉ်စားနေတတ်တဲ့ အစားအစာတွေမှာပါတဲ့ Purine ဆိုတဲ့ဓာတ်ကနေ ပြိုကွဲပြီးထွက်လာတာပါ။ ခန္ဓာကိုယ်ကနေ Uric Acid ကို စွန့်ထုတ်တဲ့ဖြစ်စဉ်တွေပုံမှန်မဟုတ်ဘဲ လွဲချော်လာတဲ့အခါမှာ ခန္ဓာကိုယ်ရဲ့ အဆစ်အမြစ်တွေမှာ Uric Acid စုပုံလာပါတော့တယ်။ အဲလိုဖြစ်ရင် အဆစ်တွေအလွန်နာကျင်ပါတယ်။ ကျောက်ကပ်မှာ ကျောက်တည်တတ်ပါတယ်။ နောက်ပိုင်းမှာ ကျောက်ကပ်ပျက်စီးတဲ့အထိ ရောဂါတွေထိဖြစ်နိုင်ပါတယ်။

ရောဂါလက္ခဏာတွေကတော့

*အဆစ်အမြစ်တစ်ခုဟာ ရုတ်တရက်အလွန်အမင်းနာကျင်လာမယ်။ ညဘက် သို့မဟုတ် မနက်အစောမှာဖြစ်တတ်တာများပါတယ်။

*အဆစ်ကိုထိရင် နာကျင်တတ်ပါတယ်။ ကိုင်ကြည့်ရင် နွေးနေပြီး နီရဲရောင်ရမ်းနေတတ်ပါတယ်။

*အဆစ်အမြစ်ဟာ တင်းတောင့်နေပါမယ်။

ခြေမအဆစ်လေးတွေကအဖြစ်အများဆုံးဖြစ်ပါတယ်။ ဒါပေမယ့် နောက်ပိုင်းမှာ ဒူးခေါင်း၊ ခြေကျင်းဝတ်၊ ခြေထောက်၊ လက်ကောက်ဝတ်တွေအထိ ဝေဒနာခံစားရပါလိမ့်မယ်။

img

ဒီဂေါက်ရောဂါကို မကုသဘဲထားရင် စုပုံနေတဲ့ Uric Acid Crystal တွေဟာ အဆစ်ရဲ့အနီး အရေပြားအောက်မှာ စုပြီးအလုံးဖြစ်သွားပါတယ်။ဒါကို Tophi လို့ခေါ်ပါတယ်။ ဒီလိုအစိုင်အခဲလေးတွေ ဆီးလမ်းကြောင်းမှာစုရင် ကျောက်ကပ်မှာကျောက်တည်တတ်ပါတယ်။

ဘယ်လိုကာကွယ်ကြမလဲ?

ရေများများသောက်ခြင်းဟာ ဂေါက်ရောဂါရုတ်တရက်ထဖောက်ခြင်း ( Acute attack ) ကိုကာကွယ်ပေးပြီး ရောဂါရှိနှင့်နေပြီးသားလူတွေမှာ ကျောက်ကပ်မှာကျောက်တည်တာကို ကာကွယ်ပေးပါတယ်။ အရက်သောက်ခြင်းဟာ သွေးတွင်းယူရစ်အက်ဆစ်ကိုတက်စေပြီး ဂေါက်ရောဂါကို ပိုဆိုးစေတဲ့အတွက် အရက်ကို ရှောင်ကြဉ်ရပါမယ်။

ဘယ်လိုကုသကြမလဲ?

ရောဂါအတိမ်အနက်ကိုမူတည်ပြီး အကိုက်အခဲပျောက်ဆေးကအစပြုလို့ Uric Acid ကိုကျဆင်းစေတဲ့ဆေး၊ Uric Acid စုပုံမှုကို တားပေးတဲ့ဆေးတွေကို ဆရာဝန်ကညွှန်ကြားမှာဖြစ်ပါတယ်။
ဂေါက်ရောဂါဖြစ်လာရင် နာကျင်ကိုက်ခဲမှုဟာ အလွန်ဆိုးဝါးတတ်တာဖြစ်ပြီး နောက်ဆက်တွဲဆိုးကျိုးများတဲ့အတွက် မဖြစ်ခင်တည်းက ကြိုတင်ပြီးကာကွယ်တာကောင်းပါတယ်။ အစာအာဟာရကို အသားပဲစားတာမျိုးမလုပ်ဘဲ အာဟာရညီညွတ်မျှတအောင်စားပြီး အရက်သေစာရှောင်ကြဉ်သင့်ပါတယ်။ ရေများများသောက်သင့်ပါတယ်။

အချုပ်အနေနဲ့ အမျိုးသားများမှာ အဖြစ်များတဲ့ ဒူလာလို့ခေါ်တဲ့ Gout ရောဂါအကြောင်း အထက်ပါအတိုင်း ရေးသားဖော်ပြလိုက်ရပါတယ်။

အားလုံးကျန်းမာပျော်ရွှင်ကြပါစေ။

မောင်(ဆေး-၁)