အင်ဇိုင်းချို့တဲ့ခြင်း

G6PD Deficiency ဆိုသည်မှာ glucose 6 phosphate dehydrogenase ဟုခေါ်သော အင်ဇိုင်းချို့တဲ့သော မွေးရာပါရောဂါတစ်မျိုး ဖြစ်ပါသည်။ ထိုအင်ဇိုင်း ချို့တဲ့ခြင်းကြောင့် သွေးကြောတွင်းရှိသွေးနီဥများသည် ခန္တာကိုယ်၏ ဓာတ်တိုးဖြစ်စဉ်များကို ခံနိုင်ရည်မရှိဘဲ ဓာတ်တိုးပစ္စည်းများနှင့်ထိတွေ့သောအခါ သွေးနီဥများ ပေါက်ကွဲပျက်စီးကြပါသည်။ ဤသို့ဖြင့် ဘီလီရူဘင်ခေါ် အ၀ါဓာတ်များတက်လာကာ အသားဝါတတ်ပါသည်။

ထို့ကြောင့် အင်ဇိုင်းချို့တဲ့သော မွေးကင်းစကလေးများတွင် သာမန်ထက်ပို၍ အသားဝါတတ်ကြပါသည်။

ယောက်ျားလေးများတွင် ပို၍ဖြစ်တတ်ပါသည်။

ရောဂါရှိကြောင်းကို သွေးဖောက်စစ်ဆေးကြည့်မှ သိနိုင်ပါသည်။

မွေးကင်းစကလေးများတွင် အ၀ါဓာတ်လွန်စွာမြင့်မားနေလျှင် မီးပြရုံမလုံလောက်ဘဲ သွေးလဲကုသမှုခံယူရတတ်ပါသည်။

ကလေးများတွင် သာမက အင်ဇိုင်းချို့တဲ့သော လူကြီးများတွင်လည်း မတည့်သောအစားအစာ၊ ဆေးများသောက်သုံးမိပါက သွေးနီဥများပေါက်ကာ သွေးအားနည်းခြင်းကို ဆိုးဆိုးရွားရွားခံစားရတတ်ပါသည်။

ဤအင်ဇိုင်းချို့တဲ့သူများသည် မိမိနှင့်မတည့်သောအစားအစာများ သိထားရှောင်ကြဉ်ရုံမက ကျန်းမာရေးပြဿနာတစ်စုံတစ်ခုဖြစ်ပါကလည်း မိမိသဘောဖြင့် ဆေးသောက်သုံးခြင်းမပြုဘဲ ဆရာဝန်နှင့် ကုသမှုခံယူရပါမည်။

G6PD ခေါ် ဂျီစစ်ပီဒီအင်ဇိုင်းချို့တဲ့သောကလေးများ အောက်ဖော်ပြပါ ပစ္စည်းများကို ရှောင်ကြဉ်ရပါမည်။

၁။ ဆေးများ

  • ဆာဖာပါသောဆေးများ(septrin, sulphamethoxazole,sulphonamide)
  • ငှက်ဖျားရောဂါပျောက်ဆေးများ(Primaquine, chloroquine)
  • အဖျားပျောက်ဆေးများ(salicylate, phenacetin)
  • Dapsone
  • Nitrofurantoin
  • Nalidixic acid And quinolones

၂။ အစားအစာ

  • ဒန်းရွက်၊
  • တောင်ကြီးပဲ

၃။ ဓာတ်ပစ္စည်းများ

  • ပရုတ်လုံး
  • Methylene blue ပါသော ပစ္စည်းများ

ထို့ကြောင့် မည်သည့်အကြောင်းကြောင့်ဖြစ်စေ ဤကလေးများနေမကောင်းဖြစ်ပါက ဆရာဝန်တိုင်ပင်ပါ။ ဆရာဝန်ညွှန်ကြားသောဆေးကိုသာ သုံးစွဲပါ။ ဆရာဝန်သို့ ကလေးတွင် အင်ဇိုင်းချို့တဲ့ကြောင်း ပြောရန်လိုအပ်ပါသည်။

မိမိကလေးနှင့် မတည့်သော ဆေးနှင့်ပစ္စည်းများကို သိထားရန် အထူးလိုအပ်ပါသည်။

ဒေါက်တာချို(ဆေး ၁)