” စိတ်ကူးထဲက ကိုယ်ဝန်ဆောင် “

ထီဆုကြီးပေါက်ပြီးကာမှ ထိုးထားတဲ့ထီလက်မှတ်ကအတုဖြစ်နေသလိုမျိုး…….

ကိုယ်ဝန်ဆောင်တစ်ယောက်….၉လလွယ်ပြီး ၁၀လပြည့်လို့ မီးဖွားမည်ဆိုကာမှ…ဗိုက်ထဲမှာ သန္ဓေသားမရှိခဲ့လျှင်???

ကလေးအရမ်းလိုချင်နေတဲ့ အမျိုးသမီးတစ်ဦးမှာ ဒီလိုအခြေအနေမျိုးနဲ့ ကြုံတွေ့လာရမည်ဆိုပါက ဒါသည် အလွန်တုန်လှုပ်ဖွယ်ရာ လက်မခံနိုင်စရာကိစ္စတစ်ခု ဖြစ်လာနိုင်ပြီး…..အချို့ဆို စိတ်ဓာတ်အကျလွန်ပြီး မိမိကိုယ်ကို သတ်သေသည့်ဖြစ်ရပ်များပင် ရှိဖူးကြောင်းတွေ့ရသည်။

ဆေးပညာအခေါ်အဝေါ်အရ ကိုယ်ဝန်တု (သို့)စိတ်ကူးယဉ်ကိုယ်ဝန်ဟု ခေါ်ဝေါ်ကြသည်။အပေါ်မှာပြောခဲ့သလိုမျိုး ကလေးအရမ်းလိုချင်နေတဲ့ အမျိုးသမီးတွေမှာတွေ့ရတတ်သလို၊ လက်မထပ်ခင်အတူနေကြပြီး ကိုယ်ဝန်ရသွားမှာ အရမ်းကြောက်နေတဲ့ မိန်းကလေးတွေမှာလည်း တွေ့ရနိုင်တယ်။ကိုယ်ဝန်ခဏခဏပျက်ကျဖူးသူ၊ကလေးဆုံးရှုံးဖူးသူ၊ကလေးမရနိုင်သူများမှာလည်း တွေ့ရသည်။

ဖြစ်ရတဲ့အကြောင်းရင်းကိုတော့ တိတိကျကျမပြောနိုင်သေးသော်ငြား မိမိကိုယ်တိုင်ရဲ့စိတ်အခြေအနေကြောင့် ဖြစ်ရကြောင်း လေ့လာတွေ့ရှိရတယ်။စိတ်ကူးယဉ်ကိုယ်ဝန်နဲ့ တကယ့်ကိုယ်ဝန်ရဲ့ လက္ခဏာတွေက လုံးလုံးလျားလျားနီးပါး ထပ်တူကျတတ်တယ်။ကိုယ်ဝန်ရှိချိန်မှာဖြစ်သလိုမျိုးပဲ ရာသီသွေးမပေါ်၊ပါးစပ်ပျက်၊အစားမစားချင်၊မူးဝေ၊ပျို့အန်၊ရင်သားတွေနာ၊နုံး…. စတာတွေဖြစ်မယ်။ကိုယ်အလေးချိန်တက်မယ်။လရင့်လာတာနဲ့အမျှဗိုက်ထွက်လာမယ်။ကလေးလှုပ်တာမျိးု ခံစားရမယ်။ခါးနာမယ်။ဆီးခဏခဏသွားမယ်။တကယ့်ကို လက္ခဏာအားလုံး ချွတ်စွပ်နီးပါးတူပြီး….မတူတာဆိုလို့ ဆီးစစ်တဲ့အခါ တစ်ကြောင်းပဲပေါ် (ကိုယ်ဝန်မရှိ)ပြီး၊ အာထရာဆောင်းရိုက်ရင်လည်း သားအိမ်ထဲသန္ဓေသားမတွေ့ရ….သည်စစ်ဆေးမှုနှစ်ခုလုံးဖြင့်သာ ကိုယ်ဝန်အတုအစစ် ခွဲခြားသည်။

ကလေးလိုချင်နေသူများအတွက် အလွန်အမင်း စိတ်ထိခိုက်ဖွယ်အခြေအနေဖြစ်တာကြောင့် အိမ်ထောက်ဖက်နှင့် မိသားစုဝင်များ၏ အားပေးနှစ်သိမ့်မှု အထူးလိုအပ်ပြီး ၊ စိတ်ရောဂါအထူးကုဆရာဝန်ရဲ့ အကူအညီလည်း လိုအပ်နိုင်ပါသည်။

ပိုင်နီမောင်