ဆေးယဉ်ပါး ပိုးများ

ပိုးအမျိုးမျိုး ဆေးအထွေထွေ ခေါင်းစဉ်အောက်တွင် ပိုးသတ်ဆေးအမျိုးမျိုးရှိ၍ တတ်ကျွမ်းသူ၏ ညွှန်ကြားချက်မပါဘဲ မသောက်သင့်ကြောင်း ဖော်ပြပြီးဖြစ်ပါသည်။

ပိုးသတ်ဆေးများကို စနစ်တကျမသောက်သုံးသဖြင့်

  • လက်ရှိဖြစ်နေသော ရောဂါကို မပျောက်ကင်းခြင်း
  • ဆေးယဉ်ပါး၍ ဆေးမတိုးခြင်း
  • ပို၍ ဈေးကြီးရုံမက ဘေးထွက်ဆိုးကျိုးများသော ဆေးများကို အသုံးပြုရခြင်းတို့အပြင်
  • မိမိ၏ ဆေးယဉ်ပါးရောဂါ သူတစ်ပါးအား ပြန့်သွားပါက ကုသနတ္ထိ ဆေးမရှိဖြစ်နိုင်ခြင်း စသော မကောင်းကျိုးများကို ခံစားရပေမည်။

ဆေးယဉ်ပါးပိုး ဆိုသည်မှာ အကြောင်းအမျိုးမျိုးကြောင့် ပိုးမွှားများ၏ ပိုးသတ်ဆေးဒဏ်ခံနိုင်ရည် မျိုးဗီဇ ပြောင်းလဲတိုးတက်သွားပြီး သာမန်သောက်သုံးနေသော ပိုးသတ်ဆေးများဖြင့် ကုသ၍ မပျောက်တော့ခြင်းကို ဆိုလိုပါသည်။

ဆေးယဉ်ပါးပိုးများသည် ပိုးသတ်ဆေးများ စနစ်တကျ မသောက်သုံးခြင်းကြောင့် ဖြစ်ပေါ်သည် သာမက အခြားသော အကြောင်းများကြောင့်လည်း ဖြစ်ပေါ်လာနိုင်ပါသေးသည်။ အထူးသဖြင့် မွေးမြူရေးလုပ်သားများသည် ပိုးသတ်ဆေးများကို တိရစ္ဆာန် အစာများတွင် ထည့်ကျွေးကြခြင်းကြောင့် တိရစ္ဆာန်များ၏ အူအတွင်း ဗီဇပြောင်းလဲမှုဖြစ်ပွားကာ ဆေးယဉ်ပါးအဖြစ်ပြောင်းလဲသွားခြင်းများ ဖြစ်တတ်ပါသေးသည်။

ထို့ကြောင့်ဆေးယဉ်ပါး ပိုးကြောင့်ဖြစ်သော ရောဂါများသည်

  • ပိုးသတ်ဆေးများကို မိမိ သဘောအတိုင်း သောက်သုံးခြင်းဗီဇပြောင်းသွား၍ ဖြစ်ပွားသည် သာမက
  • ဆေးယဉ်ပါးရောဂါ သယ်ဆောင်သူမှ တစ်ဆင့် ကူးစက်ခြင်း
  • ဆေးရုံဆေးခန်းများတွင် တက်ရောက်ကုသရာမှ ကူးစက်ခံရခြင်း
  • ဆေးယဉ်ပါးပိုးအောင်းနေသော တိရစ္ဆာန် အသားများစားသုံးခြင်းကြောင့် ကူးစက်ခြင်း
  • ဆေးယဉ်ပါးပိုးရှိနေသော ပတ်ဝန်းကျင် ရေမြေ အသုံးအဆောင်များ ထိတွေ့ရာမှ ကူးစက်ဖြစ်ပွားတတ်ပါသေးသည်။

ဤသို့ ဆေးယဉ်ပါးမှု မဖြစ်ရအောင်

  • ပိုးသတ်ဆေးများကို တတ်ကျွမ်းသူ ဆရာဝန်များ၏ ညွှန်ကြားချက်ဖြင့်သာသောက်သုံးရန်၊
  • တစ်ကိုယ်ရည်နှင့် ပတ်ဝန်းကျင် သန့်ရှင်းမှုကို ဂရုစိုက်ရန်
  • တိရစ္ဆာန်များ ကျန်းမာရေးမကောင်းပါက တိရစ္ဆာန်ဆေးကုဆရာဝန်များနှင့် ပြသ ကုသရန်
  • မလိုအပ်ဘဲ ဆေးရုံတက်ခြင်းကို ရှောင်ကြဉ်ရန်
  • ဆေးရုံသို့ မလိုအပ်ဘဲ လူနာစောင့်များများ မထားရှိရန် ( အထူးသဖြင့် ကလေးများ၊ ခုခံအားမကောင်းသောသူများ ခေါ်မလာရန်)
  • ဆေးရုံသို့ လူနာသတင်းမေးလာရောက်သူများကလည်း ဆေးရုံရှိ စည်းကမ်းများ လိုက်နာရန် လိုအပ်ကြောင်း ထပ်လောင်းတင်ပြလိုက်ရပါသည်။

ရီချို(ဆေး ၁)