ကိုယ့်ကိုခြင်တွေကိုက်ချင်လာအောင် ဆွဲဆောင်မိသလိုမဖြစ်စေဖို့

မိုးရာသီရောက်လာတာနဲ့အမျှ ခြင်အန္တရာယ်ဟာ ပိုပိုတိုးလို့စိတ်ပူစရာဖြစ်လာပါပြီ။ ဒါ့ကြောင့်ခြင်ကိုက်မခံရအောင် ခြင်တွေနှစ်သက်တဲ့ နေထိုင်မှုပုံစံနဲ့ ခြင်တွေမကြိုက်သောအသုံးအဆောင်များအကြောင်းကိုတင်ပြလိုက်ရပါတယ်။

(၁) ပန်ကာ

ပန်ကာမှထွက်တဲ့လေအရှိန်ဟာ ခြင်တွေအဖို့ပြင်းထန်လွန်းတဲ့အတွက် ပန်ကာဖွင့်ထားတဲ့အနားကိုရှောင်တတ်ကြပါတယ်။ အကယ်၍ ကိုယ်က ပန်ကာလေအေးဒဏ်ကို မခံနိုင်ရင် လူရှေ့ကိုတိုက်ရိုက်မဖွင့်ဘဲ ကိုယ့်ရဲ့ဘေးဝန်းကျင်မှာပန်ကာဖွင့်ထားမယ်ဆိုရင်ခြင်ကိုက်သက်သာနိုင်ပါတယ်။

(၂) အကျီပွပွဝတ်ဆင်ခြင်း

ခြင်ကိုက်မခံရအောင်ဆိုပြီး ကိုယ်ခန္ဓာအစိတ်အပိုင်းတိုင်းကိုလုံနေအောင်ဖုံးမထားနိုင်ပါဘူး။ ဒါ့အပြင်အဝတ်အစားဝတ်ထားပေမယ့် ခပ်ကြပ်ကြပ်ဝတ်ထားမယ်ဆိုရင် အကျီအကြပ်၊ ပုဆိုးထမီအကြပ်ကိုဖောက်ပြီး အဝတ်ပေါ်ကနေခြင်ကိုက်နိုင်ပါတယ်။ ဒါ့ကြောင့်ခပ်ပွပွအဝတ်များကိုဝတ်ဆင်တဲ့အခါ အဝတ်ပေါ်ကဖောက်ပြီးခြင်ကိုက်ခံရခြင်းကိုသက်သာစေနိုင်ပါတယ်။

(၃) သုရာမေရယ မဇ္ဇပ္ပမာဒဌာနာ

အရက်သေစာသောက်သုံးသူတွေဟာ အရက်ဘီယာလုံးဝမသောက်သူတွေထက် ခြင်ကိုက်ပိုခံရနိုင်ပါသတဲ့။ ဒါဟာ အရက်ဘီယာသောက်ပြီးတဲ့အခါ လူ့ခန္ဓာကိုယ်ကထွက်တဲ့အနံ့ သို့မဟုတ်အပူချိန်ပြောင်းလဲမှုကြောင့် ခြင်တွေကိုပိုပြီးစွဲဆောင်စေတယ်လို့လဲ ပြောကြပါတယ်။

(၄) အရောင်ဖျော့ဖျော့အဝတ်လေးတွေ

ခြင်ဟာ အမှောင်ကိုကြိုက်တဲ့ အင်းဆက်ဖြစ်တဲ့အတွက် အရောင်ဖျော့ဖျော့၊ လင်းလင်းခြင်းခြင်းရှိတဲ့အဝတ်အစားတွေကိုဝတ်ထားသူထက် အနက်ရောင်၊ အပြာရင့်ရောင် အစရှိတဲ့အဝတ်တွေဝတ်ထားသူတွေကိုပိုကိုက်တာကိုတွေ့ရပါတယ်။

(၅) မီးခိုးငွေ့

ခြင်ဆေးခွေငွေ့၊ နနွင်းမှိုင်းငွေ့ဟာခြင်ကိုပြေးစေပါတယ်။ ဒါပေမယ့်ဒါဟာ ကလေးငယ်များနဲ့ ရင်ကြပ်ရှိသူ၊ အဆုတ်ရောဂါရှိသူတွေအတွက် အန္တရာယ်ရှိစေနိုင်တာကိုတော့သတိပြုရပါမယ်။

မေတ္တာဖြင့်
စိုင်းမြတ်သူ