ရာသီမဟုတ်ဘဲသွေးဆင်းတဲ့အခါ

အမျိုးသမီးတွေမှာ ရာသီလာချိန်မဟုတ်ဘဲ သွေးဆင်းခြင်းကို Disfunctional Uterine Bleeding(DUB)လို့ခေါ်ပါတယ်။ အဓိကအားဖြင့် ရာသီချိန်မဟုတ်ဘဲသွေးဆင်းတာဖြစ်ပေမယ့် ရာသီလာနေစဉ်ကာလမှာလည်း ပုံမှန်မဟုတ်ဘဲသွေးဆင်းတာကဖြစ်နိုင်ပါသေးတယ်။ သံသယဖြစ်စရာ သွေးဆင်းပုံတွေကတော့ ရာသီလာတာများခြင်း၊ သွေးဆင်းတဲ့အခါမှာ သွေးခဲခပ်ကြီးကြီးများပါလာခြင်း၊ ခုနစ်ရက်ထက်ကျော်၍သွေးဆင်းခြင်း၊ နောက်ဆုံးရာသီလာပြီး နှစ်ဆယ့်တစ်ရက်တောင်မတိုင်ခင်မှာ နောက်တစ်ခါရာသီပြန်လာခြင်း၊ ရာသီတစ်ခုနဲ့တစ်ခုကြားမှာ သွေးစများဆင်းခြင်း စတာတွေပဲဖြစ်ပါတယ်။

တခြားလက္ခဏာတွေကတော့

-ရင်သားများနာကျင်ခြင်း

-ဗိုက်ထဲတွင်လေပွပြီးမအီမသာခံစားရခြင်း

-ဆီးစပ်နာကျင်ကိုက်ခဲခြင်း စတာတွေဖြစ်ပါတယ်။

တကယ်လို့အောက်ပါဝေဒနာတွေကို ခံစားနေရရင်တော့ အမြန်ဆုံးဆေးရုံ၊ဆေးခန်းသွားပြသင့်ပါတယ်။အဲဒီအချက်တွေကတော့

-မူးဝေခြင်း

-သတိလစ်ခြင်း

-အားနည်းခြင်း

-သွေးပေါင်ကျခြင်း

-နှလုံးခုန်မြန်ခြင်း

-အသားအရေများဖျော့တော့လာခြင်း

-နာကျင်ခြင်း

-သွေးတုံးသွေးခဲများဆင်းခြင်း

-တစ်နာရီတစ်ခါ pad လဲနေရခြင်း စသည့်အချက်များပဲဖြစ်ပါတယ်။

DUB ဖြစ်ရတဲ့ အကြောင်းရင်းတွေကတော့ အမျိုးမျိုးရှိပါတယ်။

(၁) PCOS လို့ခေါ်တဲ့ Polycystic Ovary Syndrome မှာလည်း သွေးဆင်းနိုင်ပါတယ်။ အဲဒီရောဂါဟာ ဟော်မုန်းမညီမျှဘဲ sex hormones ပိုထွက်တဲ့ရောဂါပါ။ အဲဒီအခြေအနေမှာ estrogen နဲ့ progesterone ဟော်မုန်းတွေမညီမျှခြင်းဖြစ်ပြီးတော့ ရာသီလာတာတွေ ပုံမှန်မဟုတ်ဖြစ်တတ်ပါတယ်။

(၂) သားအိမ်ရဲ့နံရံတစ်ရှူးတွေဟာ သားအိမ်ပြင်ပနေရာတွေမှာ သွားပြီးဖွံ့ဖြိုးတဲ့ Endometriosis ဆိုတဲ့ရောဂါကြောင့်လည်း DUB ဖြစ်နိုင်ပါတယ်။

(၃)သားအိမ်တွင်းတွင် အသားစ၊အလုံးများရှိခြင်း(Uterine Polyps/Uterine Fibroid) ကြောင့်လည်း DUB ရနိုင်ပါတယ်။

(၄)နောက်တစ်ချက်ကတော့ လိင်မှတစ်ဆင့်ကူးစက်တဲ့ရောဂါတွေကြောင့်ပါ။ Gonorrhoea (ဂနို)နဲ့ Chlamydia လိုလိင်ကနေတစ်ဆင့်ကူးစက်တဲ့ရောဂါတွေမှာ ရာသီမဟုတ်ဘဲ သွေးဆင်းစေပါတယ်။

ဒီရောဂါဖြစ်တဲ့အခါမှာ များသောအားဖြင့် Combined Oral Contraceptive လို့ခေါ်တဲ့နေ့စဉ်သောက်တားဆေးကိုသုံးပြီး ကုသကြပါတယ်။ ဒါပေမယ့် တစ်ဦးနဲ့တစ်ဦးဖြစ်ရတဲ့ ရောဂါအခြေခံပေါ်မူတည်ပြီး ကုသမှုနည်းလမ်းတွေမတူညီနိုင်ပါဘူး။ ဒါကြောင့် ရောဂါလက္ခဏာတွေပြသလာပြီဆိုရင်တော့ ဆရာဝန်နဲ့အမြန်ဆုံးပြပြီး ရောဂါကိုစမ်းသပ်စစ်ဆေးပြီးမှသာ ဆေးကုသမှုခံယူသင့်ပါကြောင်း ရေးသားဖော်ပြလိုက်ရပါတယ်။

အားလုံးကျန်းမာပျော်ရွှင်ကြပါစေ။

မောင်(ဆေး-၁)