သားသားလေးရဲ့ရွှေပန်းညှာ ၊ တစ်လွှာလှန်သင့်မလှန်သင့်

ငွေရောင်တစ်လက်လက်တောက်ပြောင်နေသောကတ်ကြေးလေးသည် ငိုနေသောလသားအရွယ်ကလေးငယ်လေး၏ အရေပြားတစ်နေရာတွင်ပြေးလွှားနေသည်။ ဤမြင်ကွင်း၏အထက်မှာတော့ ကလေးငယ်ကိုမိုး၍ကြည့်နေသော မျက်နှာဖုံးစွပ်နှင့်လူနှစ်ယောက်။ ထိုလူနှစ်ယောက်၏မလှမ်းမကမ်းတွင်တော့ စိတ်ပူနေသောမျက်နှာနှင့်ကလေးငယ်၏ဖခင်။ ဤသို့ ကလေးငယ်အား ရက်ရက်စက်စက်ပြုမူနေသောလူနှစ်ဦးမှာမည်သူတွေနည်း။

“ကဲ ကလေးအဖေ။ ကျွန်တော်တို့လုပ်စရာရှိတာတော့ပြီးပြီ။ ကလေးဆိုတော့ နည်းနည်းတော့ငိုတာပေါ့။ သွေးလဲအများကြီးမထွက်ပါဘူး စိတ်ချပါ။”

“ဟုတ်ကဲ့ ကျေးဇူးတင်ပါတယ်ဆရာ။ မနက်ဖြန်မှပတ်တီးလဲဖို့ပြန်လာခဲ့ပါ့မယ်။ ခွင့်ပြုပါဦး။”

ဒေါက်တာနှင်းငွေနှင့် သူ၏လက်ထောက် ဒေါက်တာနိုင်လင်းတို့ လက်အိတ်နှင့်မျက်နှာဖုံးများကို ကိုယ်စီချွတ်လိုက်ကြသည်။ သည်နေ့အတွက် ကလေးငယ်၏ရွှေပန်းထိပ်မှ အရေပြားကိုဖြတ်တောက်ခြင်းကိစ္စပြီးလေပြီ။ လက်ဆေးရန်နေရာသို့ နှစ်ယောက်တူတူထွက်လာစဉ် ဒေါက်တာနိုင်လင်းက

” အကို အဲ့ဒီ့အရွယ်ကလေးလေးတွေကို Circumcisionလုပ်ဖို့ (ရွှေပန်းထိပ်အရေပြားဖြတ်တောက်ခြင်း) က လိုလို့လား။ သူတို့ကဘာသာရေးအရလုပ်တာလားအကို။”

“အေး ညီလေးလတစ်ချို့ကျတော့လဲ ကိုးကွယ်တဲ့ဘာသာရေးအရလုပ်ကြတာရှိတယ်။ လိုတယ်မလိုဘူးဆိုတာထက် ကောင်းကျိုး၊ဆိုးကျိုးတွေကို အကိုရှင်းပြမယ်လေ။ ပြီးရင်တော့ ညီလေးဆုံးဖြတ်ပေါ့။”

ဒေါက်တာနိုင်လင်းသည် ဒေါက်တာနှင်းငွေနှင့်ညီအကိုသဖွယ်ခင်မင်ကြသော ဆရာဝန်လေးဖြစ်သည်။ ဆေးကုသခွင့်လက်မှတ်ရပြီးသည်နှင့် ဒေါက်တာနှင်းငွေ၏သင်ပြမှုကို အမြဲလိုက်လံခံယူနေသူဖြစ်သည်။

“Circumcision လို့ခေါ်တဲ့ ရွှေပန်းထိပ်ကအရေပြားကိုဖြတ်တယ်ဆိုတာ ထိပ်ဖူးလေးပေါ်မှာအုပ်နေတဲ့အရေပြားကို လှီးဖြတ်လိုက်တာပေါ့။ တို့တွေမမီလိုက်တဲ့ ၁၉၆၀နှစ်ဦးပိုင်းတွေမှာတော့ Circumcision လုပ်တာဟာ အကျိုးမရှိဘူး။ အခန့်မသင့်ရင် သွေးလွန်ပြီးအသက်အန္တရာယ်ရှိနိုင်တယ်လို့ စာတမ်းတွေထွက်ခဲ့ကြတယ်။ ဒါပေမယ့် အခုနောက်ဆုံးလေ့လာချက်တွေမှာတော့ကောင်းကျိုးက ဆိုးကျိုးထက်အလေးသာတယ်လို့ ပြောကြတယ် ညီလေးရ။ အမေရိကန်နိုင်ငံမှာဆို ၅၈ရာခိုင်နှုန်းသောယောက်ျားလေးဦးရေမှာ Circumcisionလုပ်ထားကြတယ်လို့ဆိုတယ်။

Circumcision လုပ်လိုက်တဲ့အတွက် အသက်တစ်နှစ်အောက်ကလေးတွေမှာ ဆီးလမ်းကြောင်းပိုးဝင်နိုင်မှုကို သိသိသာသာလျော့ကျစေနိုင်တယ်တဲ့။ နောက်ပြီးတော့ အရေပြားရှည်နေလို့ ရွှေပန်းကိုအရေပြားကငုံမိပြီး ရှူရှူးပေါက်လို့မရတဲ့ Phimosisလိုရောဂါမျိုးကိုလဲ ကာကွယ်ပေးတာပေါ့ကွာ။ အရေပြားနဲ့ရွှေပန်းလေးကြားမှာ သန့်ရှင်းမှုမရှိရင် ဘက်တီးရီးယားတွေခိုကပ်ပြီး ညစ်ပတ်နေနိုင်တဲ့ပြသနာကိုလဲရှင်းပေးနိုင်တာပေါ့။”

“ဟုတ်ကဲ့အကို။ ဒီကလေး လူကြီးဖြစ်လာရင်ရော ဘာတွေကောင်းကျိုးရှိလဲဗျ။”

” Circumcision လုပ်ခြင်းဟာ လိင်အင်္ဂါကင်ဆာနဲ့ ဆီးကျိတ်ကင်ဆာဖြစ်ပွားမှုကိုလဲ ကာကွယ်ပေးတယ်တဲ့။ နောက်ပြီး လိင်ဆက်ဆံရာကနေကူးတတ်တဲ့ ဂနိုတို့၊ဆစ်ဖလစ်တို့ ကူးစက်နိုင်ခြေကိုလည်းလျှော့ချပေးတယ်။ ဒီပိုးတွေက ကိုယ့်ရဲ့လိင်ဆက်ဆံဖော်ကတစ်ဆင့် အရေပြားအောက်မှာခိုကပ်ပါလာပြီး ရောဂါဖြစ်စေနိုင်တဲ့အတွက် Circumcisionလုပ်ထားတဲ့လူတွေမှာတော့ အဖြစ်နည်းသွားတယ်လို့ဆိုကြတယ်။

ယောကျာ်းလေးကတစ်ဆင့် မိန်းကလေးဆီကိုလည်း ကူးစက်နိုင်ခြေနည်းသွားတဲ့အတွက် ကိုယ့်ရဲ့မိန်းကလေးဖော်မှာ HPV ဗိုင်းရပ်စ်ကြောင့်ဖြစ်တတ်တဲ့ သားအိမ်ခေါင်းကင်ဆာဖြစ်ပွားမှုကိုလည်း လျှော့ချပေးတယ်တဲ့။ ဟော ကုန်ကုန်ပြောရရင် HIVပိုးကူးစက်နိုင်ခြေကိုတောင် လျော့နည်းစေတယ်ညီလေး။ အိမ်ထောင်ရေးသာယာမှုကိုလည်း ကြာကြာခံစားရစေတယ်တဲ့။”

“ဒါဆိုရင်တော့ ကောင်းကျိုးများနေတာပဲအစ်ကို။ ဆိုးကျိုးရောရှိလားဗျ။”

“ဆိုးကျိုးအနေနဲ့ကတော့ ဖြတ်တောက်ရင်းနဲ့သွေးထွက်လွန်တာ၊ ပိုးဝင်သွားတာတွေကြောင့် အသက်အန္တရာယ်ရှိနိုင်တယ်။ ဒါပေမယ့် ဆေးရုံဆေးခန်းတွေမှာ စနစ်တကျလုပ်မယ်ဆိုရင်တော့ ဖြစ်နိုင်ခြေနည်းတာပေါ့ညီလေး။ အဲ.. မွေးရာပါ လိင်အင်္ဂါပုံစံမမှန်တဲ့သူတွေ၊ ဆီးလမ်းကြောင်းပုံစံမမှန်သူတွေ၊ လမစေ့ဘဲမွေးတဲ့တစ်နှစ်အောက်ကလေးတွေ၊ သွေးရောဂါရှိသူတွေအတွက်တော့ အရေပြားဖြတ်ဖို့အဆင်မပြေဘူးပေါ့ကွာ။ ဒီတော့ပုံမှန်ကလေးတစ်ယောက်မှာ Circumcisionလုပ်သင့်မလုပ်သင့် ကိုယ့်ဆုံးဖြတ်ချက်နဲ့ကိုယ်သာ စဉ်းစားပေါ့”

ညနေစောင်းပြီဖြစ်သဖြင့် အိမ်ပြန်ရန် ဒေါက်တာနှင်းငွေလက်ဆွဲအိတ်ကိုယူလိုက်သည်။ မနက်ဖြန်တွင် ကလေးငယ်အားပတ်တီးလဲပြီးရက်ချိန်းပြန်ကြည့်ရန် ဤနေရာသို့ပြန်လာရဦးမည်။ သဘက်ခါလဲပြန်လာရဦးမည်။ ရွှေပန်းထိပ်အရေပြားဖြတ်တောက်ရန်လာသော ကလေးငယ်များရှိနေသ၍ နေ့ရက်တိုင်းသည် ထို့အတူပင်ဖြစ်သည်..။

မေတ္တာဖြင့်
စိုင်းမြတ်သူ