ရေမွှာရေပိုးဝင်တယ်ဆိုတာ

သန္ဓေသားလေးတွေ မိခင်ဝမ်းဗိုက်ထဲမှာရှိစဉ်အခါ ပြင်ပရောဂါပိုးမွှားနှင့် ထိခိုက်မှုများမှကာကွယ်ရန် ရေမွှာရေ၊ ရေမွှာအိတ်နှင့် အမြှေးပါးတွေနဲ့ သဘာဝတရားကြီးက ကာကွယ်ပေးထားပါတယ်။

ထိုအကာအကွယ်ဖြစ်တဲ့ ရေမွှာရေနဲ့ အမြှေးပါးတွေကို ဘက်တီးရီးယားပိုးကူးစက်တဲ့ အခြေအနေကို Chorioamnionitis လို့ခေါ်ပြီး လမစေ့မီ ကလေးမီးဖွားခြင်း၊ သွေးဆိပ်တက်ခြင်းတို့ ဖြစ်နိုင်ကာ မိခင်ရော ကလေးပါ အန္တရာယ်ရှိနိုင်ပါတယ်။

✔ Chorioamnionitis(ရေမွှာရေနဲ့ အမြှေးပါးတွေ ပိုးဝင်ခြင်း) ဘာကြောင့်ဖြစ်လဲ။ ဘယ်သူတွေမှာ ဖြစ်နိုင်လဲ။

– အများစုမှာ မိန်းမကိုယ်နဲ့ စအိုမှ ဘက်တီးရီးယားပိုးများ သားအိမ်ကို ဆန်တက်ပြီး အမြှေးပါးနဲ့ ရေမွှာရေကို ကူးစက်တာဖြစ်ပါတယ်။
– ကလေးမွေးဖွားချိန် ကြာမြင့်နေတဲ့ အမျိုးသမီးတွေ
– ရေမွှာရေပေါက်ပြီး အချိန်အတန်ကြာ ကလေးမမွေးနိုင်သူများ
– တကိုယ်ရည်သန့်ရှင်းမှု အားနည်းသူများ
– မိန်းမကိုယ်တွင် ကူးစက်ရောဂါ ရှိသူများ
– မသန့်ရှင်းတဲ့ လက်တွေ၊ ပစ္စည်းတွေနဲ့ မိန်းမကိုယ်ကို ထိုးသွင်းစမ်းသပ်ခြင်းတွေကလည်း ဖြစ်နိုင်ပါတယ်။

✔ အချိန်မီ ကုသမှုမခံယူလျှင် ဘယ်လိုအန္တရာယ်တွေ ဖြစ်နိုင်လဲ။

– သွေးဆိပ်သင့်ခြင်း
– သားအိမ်နံရံ ပိုးဝင်ခြင်း
– ကလေးမီးဖွားချိန် သွေးအလွန်အကျွံဆင်းခြင်း
– တင်ပဆုံနှင့်အဆုတ်တွင် သွေးခဲခြင်း
– ဒဏ်ရာပိုးဝင်ပြီး ပြည်တည်ခြင်း
– မွေးဖွားလာမည့် ကလေးတွင်လည်း သွေးဆိပ်တက်ခြင်း၊( Pneumonia) နမိုးနီးယား အဆုတ်ရောင်ခြင်း၊ ဦးနှောက်အမြှေးပါးရောင်ခြင်း စတာတွေ ဖြစ်နိုင်ပြီး အသက်အန္တရယ်ရှိနိုင်တာကြောင့် စောလျင်စွာ ကုသမှုခံယူသင့်ပါတယ်။

✔ ရောဂါလက္ခဏာတွေက ဘာတွေလဲ။

ရေမွှာရေနဲ့ အမြှေးပါးမှာ ပိုးဝင်တဲ့ ကိုယ်ဝန်ဆောင်တွေမှာ အောက်ပါ ရောဂါလက္ခဏာတွေ ဖြစ်နိုင်ပါတယ်။
– အဖျားတက်ခြင်း
– နှလုံးခုန်မြန်ခြင်း
– ချွေးစီးများထွက်ခြင်း
– ဆီးစပ်နေရာကို စမ်းသပ်ပါက နာကျင်ခြင်း
– အနံ့ဆိုးသော အကျိအချွဲများဆင်းခြင်း

ထိုကဲ့သို့ ရောဂါလက္ခဏာတွေ ခံစားရလျှင် အသက်အန္တရာယ်ရှိနိုင်တာကြောင့် သက်ဆိုင်ရာဆရာဝန်နဲ့ စမ်းသပ်ဆွေးနွေးပြီး ကုသမှုအမြန်ဆုံး ခံယူသင့်ပါတယ်။ ဆရာဝန်ညွှန်ကြားချက်ဖြင့် ကလေးမမွေးဖွားမီနှင့် မွေးဖွားပြီး ပဋိဇီဝပိုးသတ်ဆေးသွင်းခြင်းများ ပြုလုပ်ခြင်း၊ ကလေးမီးဖွားခြင်းများပြုလုပ်နိုင်ပါတယ်။

ကျန်းမာလှပသော ဘဝတစ်ခု ပိုင်ဆိုင်စေရန် ရည်ရွယ်လျက်
ပွင့်ရည်(ဆေး၂)