“ဆရာ ကျွန်မ ဘာနည်းသုံးရင်ကောင်းမလဲ”

သားဆက်ခြားနည်းတွေအကြောင်း အရေးများ၊ အပြောများတဲ့အခါမှာ အမျိုးသမီးတွေက ကျွန်တော့်ကို လာလာမေးကြပါတယ်။ အဲဒီမေးခွန်းတွေထဲက အများဆုံးတစ်ခုက ဘာလဲဆိုတော့ ခု ဆောင်းပါးခေါင်းစဉ် ပေးထားသလိုပဲ၊ ကျွန်မ ဘာကိုယ်ဝန်တားနည်း သုံးရင်ကောင်းမလဲ ဆိုတဲ့ မေးခွန်းဖြစ်ပါတယ်။
တကယ်တော့ ဘယ်နည်းက သင့်တော်တယ် ဆိုတာမျိုး အဲ့လိုလှေနံဓားထစ် ပြောလို့မရပါဘူး။ ကိုယ်ဝန်တားနည်းတွေအားလုံးမှာ သူ့ဟာနဲ့သူ အားနည်းချက်၊ အားသာချက်တွေ ရှိကြပါတယ်။ ဘယ်တစ်ခုကတော့ဖြင့် အကောင်းဆုံးဆိုတာမျိုး မရှိပါဘူး။ ကိုယ်နဲ့သင့်တော်တာ ကိုယ်ရွေးနိုင်ဖို့ပါပဲ။
နောက်ပြီး အမျိုးသမီးတချို့က ဘာလုပ်တတ်ကြသေးလဲဆိုရင် တခြားလူသုံးတာ လိုက်သုံးကြတာပဲ။ သူက သောက်ဆေးနဲ့ အဆင်ပြေတယ်ဆို ကိုယ်လည်း လိုက်သောက်တယ်။ သူက သားအိမ်ထဲထည့်တာ အဆင်မပြေဖြစ်သွားတယ်ဆို ကိုယ်လည်း ကြောက်ပြီး မထည့်တော့ဘူး။ တကယ်တော့ တစ်ယောက်နဲ့တစ်ယောက် မတူပါဘူး။ သူနဲ့အဆင်ပြေတဲ့နည်းက ကိုယ်နဲ့ပြေချင်မှပြေမယ်။ ဒီလိုပဲ သူနဲ့အဆင်မပြေတဲ့ နည်းတစ်ခုကလည်း ကိုယ်နဲ့ကျ ပြေချင်ပြေနေမှာပေါ့။ ဒါကြောင့် ကိုယ်သုံးမယ့်နည်းကို ကိုယ်တိုင်ရွေးချယ်ဆုံးဖြတ်တာ အကောင်းဆုံးပါပဲ။
အဲဒီအတွက် ထည့်စဉ်းစားသင့်တဲ့ အချက်တချို့ကို အဆင့်လိုက် ရေးပေးသွားပါမယ်။
၁။ ဘယ်နှနှစ် ကိုယ်ဝန်တားထားချင်တာလဲ
သားဆက်ခြားနည်းတွေမှာ ကာလတိုနည်းနဲ့ ကာလရှည်နည်းရယ်လို့ ရှိတယ်။ လပိုင်းလောက်၊ နှစ်အနည်းငယ်လောက်ပဲ တားထားမယ်ဆို ကွန်ဒုံး၊ ဆေးကတ်နဲ့ ထိုးဆေးတွေ သုံးလို့ရတယ်။ နှစ်ရှည်တားထားချင်တာဆို သားအိမ်ထဲထည့်တာ၊ လက်မောင်းထဲထည့်တာတွေ လုပ်လို့ရတယ်။ စဉ်းစားကြည့်၊ ကိုယ်ဝန်ကို ၅ နှစ်လောက် တားထားချင်တဲ့သူဟာ ရက်ပေါင်း ၁၈၀၀ ကျော်လောက်ကို တစ်နေ့တစ်လုံး ဆေးသောက်ရမယ်ဆို လွယ်ပါ့မလား။ ၃ လကိုတစ်ခါနဲ့ အကြိမ် ၂၀ ဆေးထိုးရမယ်ဆို အဆင်ပြေပါ့မလား၊ မှန်မှန်လုပ်နိုင်ပါ့မလား ကိုယ့်ကိုယ်ကိုယ်မေးကြည့်ပါ။
၂။ ဟော်မုန်းပါတာလား မပါတာလား
ကာလတိုနည်းထဲမှာလည်း ဟော်မုန်းပါတာနဲ့ မပါတာရှိသလို၊ ကာလရှည်နည်းတွေထဲမှာလည်း ရှိပါတယ်။ ဘာကွာမလဲဆိုတော့ ဟော်မုန်းပါတဲ့နည်းတွေသုံးရင် ဟော်မုန်းရဲ့ ဘေးထွက်ဆိုကျိုးတွေကို ခံစားရတာမျိုး ရှိနိုင်တယ်။ ကိုယ်အလေးချိန် အပြောင်းအလဲဖြစ်တာ၊ အသားအရည်ပြောင်းသွားတာ၊ ခေါင်းမူးတာ၊ ပျို့အန်တာတွေ ဖြစ်တတ်တယ်။ ဒီနေရာမှာ တစ်ခု သိစေချင်တာက ဒါတွေဖြစ်ကိုဖြစ်မယ်လို့တော့ မဟုတ်ဘူး။ တစ်ယောက်နဲ့တစ်ယောက် မတူကြဘူး၊ တချို့ဖြစ်တယ်၊ တချို့မဖြစ်ဘူး။ နောက်ပြီး ၀လာတာဆိုတာကလည်း ဒီနည်းတွေကြောင့် ၀တာက နည်းနည်းပဲ၊ အဓိကက အသက်အရွယ်နဲ့ နေထိုင်မှုပုံစံကြောင့်သာ ၀လာတာဖြစ်တယ်။ ဒါကြောင့် ကိုယ့်အနေနဲ့ အစားရှောင်မယ်၊ လေ့ကျင့်ခန်းများများ လုပ်မယ်ဆိုရင် ၀မလာအောင် ထိန်းထားလို့ရမယ်။ ကာလတိုနည်းဖြစ်တဲ့ ကွန်ဒုံးနဲ့ ကာလရှည်နည်းထဲက တစ်ခုဖြစ်တဲ့ သားအိမ်တွင်းထည့်ပစ္စည်းတို့က ဟော်မုန်းမပါတာမို့ ဒီလိုဘေးထွက်ဆိုးကျိုးတွေ မခံစားချင်ဘူးဆိုရင် ရွေးချယ်လို့ရတယ်။
သားဆက်ခြားနည်းတစ်ခုကို ရွေးတော့မယ်ဆို အဓိက စဉ်းစားရမှာက ဒီနှစ်ခုပါပဲ။ ဘယ်နှနှစ်တားချင်တာလဲ၊ ဟော်မုန်းပါတာဆို အဆင်ပြေမလား။ ဒီလောက်ဆို တော်တော်လေးလည်း စဉ်းစားရလွယ်လာပြီ။ ပြီးတော့မှ အသေးစိတ် ထပ်စဉ်းစားရမှာတချို့ကို ဆက်ရေးပါမယ်။
၃။ ရာသီပုံမှန်ပေါ်မှ အဆင်ပြေတာလား
ကွန်ဒုံးနဲ့ သားအိမ်တွင်းထည့်ပစ္စည်းကတော့ ရာသီပုံမှန်ပေါ်တယ်။ နေ့စဉ်သောက်ဆေးကတ်ကလည်း နောက်ဆုံးတန်း အားဆေးလုံးတွေ သောက်နေပြီဆိုရင် သွေးဆင်းလာတတ်တယ်။ ၃လခံထိုးဆေးနဲ့ လက်မောင်းတွင်းထည့်ပစ္စည်းကတော့ ရာသီမပေါ်တာများတယ်။ အဲ့လိုမပေါ်လို့လည်း ဘာရောဂါမှတော့ မဖြစ်ဘူး။ သူ့ရဲ့ အာနိသင်ကြောင့် ဖြစ်တာပဲ။ ဒီအခါ တချို့အမျိုးသမီးတွေက အလုပ်ရှုပ်တောင် သက်သာသေးတယ် ဆိုပြီး သဘောကျပေမယ့် တချို့အမျိုးသမီးတွေကတော့ ရာသီမပေါ်ရင် မနေတတ်ဘူး၊ မိန်းမ မဆန်သလို ခံစားရတယ်လို့ ထင်တတ်ကြတယ်။ ဒီလိုဆိုရင်တော့ ရာသီမပေါ်တတ်တဲ့နည်းတွေကို အသုံးပြုဖို့ အဆင်ပြေနိုင် မပြေနိုင် သေချာစဉ်းစားသင့်တယ်။
၎။ ကလေး ချက်ချင်းပြန်ရမှ အဆင်ပြေတာလား
သားဆက်ခြားနည်းတွေ အားလုံးထဲမှာ ၃ လခံထိုးဆေးမှာပဲရှိတဲ့ ထူးခြားချက်တစ်ခုက အာနိသင်ကျန်တတ်တာပါပဲ။ ဆိုလိုတာက ဆေးထိုးရပ်လိုက်ပေမယ့် ကလေးချက်ချင်း ပြန်မရတတ်ဘူး။ လုံးမ၀မရနိုင်တော့တာ မဟုတ်ပေမယ့် လအနည်းငယ်စောင့်ရတတ်တယ်။ ပြီးတဲ့အခါ ကိုယ်ဝန်ပြန်ရလာလိမ့်မယ်။ ဒါပေမယ့်လည်း ကိုယ်ဝန်လိုချင်ရင် ချက်ချင်းရမှဖြစ်မယ် ဆိုတဲ့ စုံတွဲမျိုးတွေအတွက်တော့ ဒါကို သေချာစဉ်းစားရမယ်။ အထူးသဖြင့် ကလေးတစ်ခါမှ မမွေးဖူးသေးတဲ့ စုံတွဲတွေဆို ပိုလို့ သတိထားရပါလိမ့်မယ်။
၅။ တစ်နေ့တစ်လုံး သောက်ဖို့ အဆင်ပြေနိုင်လား
ဒါက နေ့စဉ်သောက်ဆေးကတ်ကို ရွေးတော့မယ်ဆို ကိုယ့်ကိုယ်ကိုယ် မဖြစ်မနေ မေးသင့်တဲ့မေးခွန်းပါ။ နေ့စဉ်နေ့တိုင်း အချိန်မှန်ဆေးသောက်ဖို့ဆိုတာ ထင်သလောက် မလွယ်ပါဘူး။ ဒါကြောင့်မို့ ကိုယ်ဟာ ဒီလိုသောက်နိုင်တဲ့ အခြေအနေရှိလား စဉ်းစားပါ။ နောက်ပြီး ဆေးသောက်ဖို့ မေ့ခဲ့ရင် ဘယ်လိုလုပ်ရမယ်ဆိုတာကိုလည်း သိအောင် လုပ်ထားစေချင်ပါတယ်။ ဒီဆေးကတ် သောက်နေတဲ့ အမျိုးသမီးအများစုဟာ သောက်သာသောက်နေကြတယ်၊ မေ့ခဲ့ရင် ဘယ်လိုလုပ်ရမလဲဆိုတာကို မှန်မှန်ကန်ကန် သိမနေကြပါဘူး။
၆။ အမျိုးသားရဲ့ ဆန္ဒ
သားဆက်ခြားတဲ့ကိစ္စဟာ အမျိုးသမီးတစ်ယောက်ရဲ့ ကိုယ်ပိုင်ဆုံးဖြတ်ခွင့် ဆိုပေမယ့် ကွန်ဒုံးလို နည်းလမ်းမျိုးကျ အမျိုးသားရဲ့ပူးပေါင်းပါဝင်မှု လိုအပ်ပါတယ်။ သားအိမ်ထဲထည့်တာဆိုလည်း အမျိုးသားက သဘောမကျဘူး ဆိုတာတွေ ရှိတတ်တာမို့ သူနဲ့တိုင်ပင်ပြီးမှ ရွေးချယ်တာ ပိုအဆင်ပြေပါတယ်။ ဆေးခန်းသွားတဲ့အခါ ဆရာဝန်နဲ့ ဆွေးနွေးရင် သူ့ကိုပါ တစ်ပါတည်း ခေါ်သွားတာမျိုး လုပ်နိုင်ပါတယ်။
၇။ သောက်နေတဲ့ဆေးနဲ့ ဖြစ်နေတဲ့ရောဂါတွေ
ဥပမာ တီဘီဆေးသောက်နေတဲ့အချိန်ဆို ဟော်မုန်းပါတဲ့နည်းတွေ သုံးလို့မရဘူး။ သုံးရင် အာနိသင်ကျတတ်လို့ ကိုယ်ဝန်ရသွားတာမျိုး ဖြစ်တတ်တယ်။ နောက်ပြီး လိင်ကတစ်ဆင့် ကူးစက်တဲ့ရောဂါတွေ၊ သားအိမ်အနေအထား အဆင်မပြေတာတွေ ရှိနိုင်ရင်လည်း ဆရာဝန်နဲ့ စစ်ဆေးပြီး စိတ်ချရမှ သားအိမ်ထဲထည့်တာမျိုး လုပ်သင့်တယ်။ ဒီလိုမျိုး ဘယ်ဆေးက မတည့်ဘူး၊ ဘယ်ရောဂါနဲ့ဆို အဆင်မပြေဘူးဆိုတာတွေကတော့ သာမန်လူတစ်ယောက်အနေနဲ့ မသိနိုင်တာမို့ ဆရာဝန်ကိုသာ သေချာပြောပြရမှာဖြစ်ပါတယ်။ ဒါမှ သူက အကောင်းဆုံးအကြံဉာဏ်တွေ ပေးနိုင်မှာပါ။
ခုပြောခဲ့တဲ့အချက်တွေကတော့ ကိုယ်ဝန်တားနည်းတစ်ခု သုံးတော့မယ်ဆိုရင် ကိုယ်နဲ့ဘယ်နည်းလမ်းနဲ့က သင့်တော်သလဲဆိုတာကို ရွေးချယ်နိုင်ဖို့အတွက် အဆင့်ဆင့်စဉ်းစားသင့်တာလေးတွေ ဖြစ်ပါတယ်။ ဒီအပေါ် အခြေခံ၊ ဆရာဝန်ဆရာမက ပြောပြတဲ့ အချက်တွေနဲ့ ပေါင်းစပ်ပြီး ကိုယ်နဲ့အသင့်တော်ဆုံးဖြစ်မယ့် နည်းတစ်ခုကို ရွေးချယ်နိုင်ကြစေဖို့ ရည်ရွယ်ပါတယ်။

ဒေါက်တာ ဖြိုးသီဟ