အိပ်မပျော်တဲ့ပိစိလေးတွေကိုချော့သိပ်ကြမယ်

အခါမလည်ခင်အချိန်မှာခကလေးငယ်လေးတွေဟာ နေ့နဲ့ညမှားပြီးအိပ်လိုအိပ်၊ အိပ်ချိန်မှာမျက်စိအပြူးသားနဲ့ ဟိုသည် လိုက်ကြည့်ပြီးမအိပ် ဖြစ်နေတဲ့အခါ မေမေဖေဖေတို့အတော်ဒုက္ခရောက်ကြရပါတယ်။ ဒါကြောင့် ကလေးငယ်များ အိပ်ပျော်စေဖို့ ကြိုးစားပေးနိုင်တဲ့အချက်လေးတွေကိုတင်ပြလိုက်ပါတယ်။

၁။ အလင်းရောင်စူးစူးရှိနေပြီး အသံများဆူညံနေတဲ့အခါ ဥပမာ တီဗီဖွင့်ထားတဲ့အခန်းထဲမှာ ကလေးကိုသိပ်မယ်ဆိုရင် လွယ်လွယ်နဲ့အိပ်မပျော်နိုင်ပါဘူး။ ဒါကြောင့် မီးအလင်းရောင်နည်းပါးပြီး ဆူညံမှုကင်းတဲ့ ဆိတ်ငြိမ်ဝန်းကျင်လေးတစ်ခုဖန်တီးကာသိပ်ပေးပါ။

၂။ ကလေးငယ်မအိပ်ခင်မှာ မေမေ့ပေါ်မှာပဲဖြစ်ဖြစ် ဖေဖေ့ပေါ်မှာပဲဖြစ်ဖြစ် ချော့ပြီး လှုပ်ကာသိပ်ပေးပါ။ ကလေးငယ်အိပ်ချင်မူးတူးဖြစ်လာပြီတိုတော့မှ သူ့ရဲ့ပုခက်ထဲကိုထည့်ပြီးသိပ်ပေးပါ။

၃။ မအိပ်ခင်မှာ မေမေ့နို့ချိုကိုတိုက်ပေးပါ။ နို့တိုက်နေရင်းနဲ့ကလေးငယ်ဟာ ဗိုက်ဝလာပြီး မျက်ခွံတွေစင်းလာပါလိမ့်မယ်။ ဒီအချိန်မှာ သိပ်ဖို့အကောင်းဆုံးပဲဖြစ်ပါတယ်။

၎။ နေ့လည်နေ့ခင်းတွေမှာ အရမ်းကြီးအိပ်မပစ်ပါစေနဲ့။ ကလေးငယ်လေးတွေဟာ နေ့ခင်းမှာ အချိန်အကြာကြီးဆက်တိုက်အိပ်ထားတဲ့အခါ ညဘက်မှာမျက်စိကြောင်ပြီး ဆော့ဖို့ပဲအာရုံရောက်နေတတ်ပါတယ်။ ဒီအခါ နေ့နဲ့ညမှားပြီးအိပ်တဲ့သံသရာလည်သွားပြီး ပြုပြင်ရခက်ခဲတတ်ပါတယ်။

၅။ ကလေးရဲ့မျက်နှာပေါ်ကို တစ်ရှူးစက္ကူအဖြူစလေးနဲ့ နဖူးပေါ်မှတဆင့် မျက်နှာတစ်လျှောက်သပ်ချပေးပါ။ အနောက်နိုင်ငံအချို့မှာ ဒီနည်းကို ကလေးငယ်လေးတွေကိုအိပ်ပျော်အိပ်မွေ့ချတဲ့နည်းလမ်းတစ်ခုအနေနဲ့ သတ်မှတ်ပြီးအသုံးပြုနေကြပါတယ်။

၆။ ကလေးငယ်နဲ့မျက်လုံးခြင်း ဆုံပြီးမမြှူမိပါစေနဲ့။ အဖေအမေကမြှူတဲ့အခါ ကလေးကပိုမြူးလာပြီး ချော့သိပ်ရခက်ခဲတတ်ပါတယ်။

၇။ မိခင်သို့မဟုတ်ဖခင်နဲ့အတူတကွ အိပ်စက်ခြင်းဟာလည်း ကလေးအတွက်စိတ်ချလက်ချအိပ်ပျော်စေဖို့ အထောက်အကူပြုပါတယ်။

၈။ မအိပ်ခင်မှာ ခြေဆုပ်လက်ဆုပ်သဘောမျိုး ဆယ်မိနစ်ခန့်နှိပ်ပေးမယ်ဆိုရင် အိပ်စက်ခြင်းကိုအထောက်အကူပြုတယ်လို့ဆိုပါတယ်။

ဒီနည်းလမ်းလေးတွေအသုံးပြုပြီး အိပ်စက်ဖို့ရာအသုံးပြုကြည့်ပါ။ ဖေဖေမေမေတို့အတွက်လည်း အိပ်ရေးမပျက်တော့ဘဲ မနက်ပိုင်းအလုပ်ခွင်ကိုကြည်ကြည်လင်လင်နဲ့ဝင်နိုင်စေဖို့ရာ တင်ပြလိုက်ပါတယ်။

မေတ္တာဖြင့်
စိုင်းမြတ်သူ