ဘာကြောင့်များလဲ အဆီတွေရယ်

“မိချိုရေ။ တို့ရောက်ပြီဟေ့” အော်သံနှင့်အတူ ပိန်ပိန်ပါးပါး အာကျယ်အာကျယ်နဲ့ မိသီတာတစ်ယောက် ဦးဆောင်ကာ တစ်အုံတစ်မကြီး ဝင်လာကြသူတွေကတော့ မတွေ့တာကြာပြီဖြစ်တဲ့ တက္ကသိုလ်ဘဝ ချစ်သူငယ်ချင်းများပေါ့။ ကျောင်းပြီး အလုပ်ကိုယ်စီဖြစ်ကာ တစ်နေရာစီရောက်နေသူတွေ ဆွေမျိုးတွေအလားခင်မင်ရသူတွေ ပြန်တွေ့ရတော့ တော်တော်ပျော်တာပေါ့။ ဒီလိုတွေ့ရဖို့လဲ ချိန်းလိုက်ရတာ အာတွေကို ပေါက်ရော။

“ကဲ။ ရောက်ရင်လဲ အထုတ်တွေအရင်ချ။ အအေးသောက်ဦး။ ပြီးမှ စားဖို့ချက်ကြတာပေါ့။ “

ထုံးစံအတိုင်း အစားတစ်လိုင်းမိတ်ဆွေတွေဆိုတော့ တွေ့တဲ့အခါ မုန့်မဝယ်စားဖြစ်ရင် မုန့်လုပ်စားမယ်လေ။ ခဏနားကြပြီး ကျွတ်စီအောင် စကားပြောရင်း ဟော့ပေါ့တစ်အိုးကျသည်ပေါ့။

အိုးသံခွက်သံ တညံညံ စုံညီစားကြသည်ပေါ့။ အဲသည်မှာ စတော့တာပဲ။

“ဟဲ့ မြင့်။ ထည့်စားလေ။ နင်စားနေတဲ့ပုံက လိပ်စားနေသလိုပဲ။ ကိုယ့်အုပ်စုတွေအကြောင်း မသိတာလဲမဟုတ်ဘူး။ လက်မသွက်ရင် ငတ်သွားမယ်နော်။ “

‘အင်း။ သိပ်လည်းမစားချင်ပါဘူးဟာ။ ‘

“ဟဲ့ နင့်အကြောင်းမသိရင် ခက်မယ်။ အစားဆို ထိပ်ဆုံးကသူကများ။ “

‘”မိချိုရေ။ သိပ်မပြောနဲ့ဟ။ ဝိတ်လျော့နေရင်း ဝိတ်ပိုတက်လာလို့ဆိုပြီး မလာဘူး လုပ်နေတာ။ ဒီနေ့တောင် အတင်းခေါ်လာရတာ။ ‘”

“အွန်။ အေပီကေ။ စားမှာဖြင့်စား။ ပြီးမှ သူငယ်ချင်းတွေ ဝိုင်းပြီးစမ်းစစ်၊ စစ်ဆေးမေးမြန်းအဖြေရှာကြတာပေါ့။ ဟုတ်ပြီလား။”

စားသောက်ပြီး

“ကဲ။ ပြောပါဦး။ နင့်ရဲ့ ဝိတ်လျော့တဲ့ အစီအစဉ်တွေကို။”

‘အေးဟယ်။ ဝိတ်လျော့ရင် ဆန္ဒပြင်းထန်ဖို့လိုတယ်ဆိုတာလဲသိတယ်။ ဆန္ဒလဲရှိတယ်။ တကယ်လဲလုပ်နေတယ်။ အစားလျော့စားတယ်။ လေ့ကျင့်ခန်းလည်း ပြင်းပြင်းထန်ထန်မလုပ်ပေမယ့် ပုံမှန်လုပ်နေတာလဲဟာ။ ဘာလို့ ဒီအဆီတွေက ငါ့ကို ဒီလောက်ချစ်နေတာလဲမသိဘူး။’

“နင်က အစားအသောက်နဲ့ ပက်သက်ပြီး ဗဟုသုတရှိတဲ့သူဆိုတော့ ဘာစားလဲတော့ မမေးတော့ဘူး။ အဲလိုစလုပ်တာ ဘယ်လောက်ကြာပြီလဲ။ ဝိတ်က လုံးဝကျမသွားပဲ တက်လာတာလား။”

‘၆ လလောက်တော့ရှိရောပေါ့။ ၅ ပေါင်တောင် ပြည့်အောင်မကျဘူးရယ်။ အခုလည်း နည်းနည်းစားတာနဲ့ ပြန်တက်လာရော။ အကြံပေးကြပါဦးဟယ်။ ‘

“အေး။ ငါ့သိထားတာတွေတော့ ရှိတယ်။ နင်သိချင်တယ်ဆိုရင်တော့ပြောပြမယ်လေ။”

‘”ပြောပြလိုက်ပါတော့ မိချိုရယ်။ ဟိုတစ်ယောက် တော်ကြာဒီစိတ်နဲ့ သေနေပါဦးမယ်။ ဟဲဟဲ။”’

‘ကောင်မစုတ်။ နင်က ဘာစားစား ဝမှမလာတာ။ ပြောအားရှိတာပေါ့။’

“ကဲ။ တော်ပါတော့ဟဲ့။ ပိန်ချင်စိတ်ရှိတယ်။ ပိန်ဖို့လဲ ကြိုးစားနေသူတွေ ဝိတ်မကျတာ ဒီအချက်တွေကြောင့် ဖြစ်နိုင်တယ်တဲ့။ ၁။ အိပ်ချိန် များလွန်း နည်းလွန်းတာ၊ ၂။ ရေသောက်နည်းတာ၊ ၃။ အစာတစ်လုပ်နဲ့ တစ်လုပ်စားဖို့ အချိန်ကြာလွန်းတာ၊ ၄။ အပြင်ထွက်စားလွန်းတာ၊ ၅။ တစ်နေကုန်အထိုင်များတာ၊ ၆။ လေ့ကျင့်ခန်းလုပ်ပြီး ပင်ပန်းတာကို အစား၊ အချိုရည်၊ စွမ်းအားဖြည့်အစာတွေ ပြန်ဖြေတာ၊ ၇။ စိတ်ဖိစီးမှုများတဲ့အခါ မထင်မှတ်ဘဲ မုန့်တွေစားမိတာ၊ ၈။အမြန်စာ အသင့်စာတွေ စားလွန်းတာ တွေကြောင့်လဲ ပိန်သင့်သလောက် မပိန်ဘဲရှိနေတတ်တယ်တဲ့။ ကဲ ကိုယ်ဘယ်အချက်တွေနဲ့ကိုက်နေလဲ စဉ်းစားကြည့်လေ။ “

‘အင်း။ ငါက ရေအစား အချိုရည်ကိုတော့ ခဏခဏ သောက်ဖြစ်နေတယ်။ အလုပ်နဲ့မအားတော့ ဝယ်စားဖြစ်တာများတယ်။ စိတ်ညစ်တဲ့အခါ ပိုစားမိတာတော့ရှိတယ် ဟ။’

“အဲဒါတွေက ပြဿနာပေါ့။ အချိုရည်တွေက ကယ်လိုရီပိုပါတဲ့အပြင် လိုအပ်တဲ့ရေပမာဏလဲမရတော့ စွမ်းအင် လောင်ကျွမ်းမှုနည်းပြီး ပိုလာတာပေါ့။ အပြင်စာတွေက ကိုယ်အိမ်မှာချက်စားသလို မဖြစ်နိုင်ဘူးလေ။ အရသာပိုရှိအောင် ဝယ်စားသူစိတ်ကျေနပ်အောင် ချက်ရတာဆိုတော့ ကယ်လိုရီပိုများမှာကတော့ ပြောမနေနဲ့။ ပြီးတော့ နင်လုပ်နေတဲ့အလုပ်ကလဲ ပင်ပန်းတယ်မလား။ ပင်ပန်းတော့ တစ်ခါတစ်လေပိုစားမိတာ၊ မုန့်စားမိတာတွေ ဖြစ်တော့ မှန်းထားသလောက် မပိန်တော့ဘူးပေါ့။ “

‘အေးနော်။ ငါက ဒီလကုန်လို့ ထင်သလောက်မကျရင် ပိန်ဆေးတောင် သုံးမလားစဉ်းစားနေတာ။ ‘

“မယ်မင်းကြီးမရယ်။ ဆေးတွေ သုံးတာထက် နည်းမှန်လမ်းမှန် ဝိတ်ချတာက အကောင်းဆုံးဆိုတာ နင်လဲသိရဲ့သားနဲ့။ ဆေးသုံးတယ်ဆိုတာ အမှန်တကယ် လိုအပ်တဲ့သူတွေ ဆရာဝန်နဲ့တိုင်ပင်ပြီး သုံးရတာကို။ မသိတာလဲ မဟုတ်ဘဲနဲ့။ ပြီးတော့ အနှစ် ၂၀ လောက်စားထားတာကို ချက်ချင်းအကုန်ကျဖို့ထက် တစ်ပတ်ကို ၂ ပေါင်လောက် ပုံမှန်ကျအောင်လုပ်တာက ပိုပြီးကြာရှည်ထိန်းထားနိုင်သလို ကျန်းမာရေးနဲ့လဲ ညီတယ်။ ပြီးတော့ လေ့ကျင့်ခန်းကို အမြဲတမ်းတစ်မျိုးတည်းလုပ်မယ့်အစား တစ်ပတ်တစ်မျိုး အခြားအားကစားတွေပါ ပြောင်းပြောင်းပြီးနည်းနည်းလောက်လုပ်ပေး။ အခုပြောတာတွေကို အရင်ပြင်ပြီး မရတော့မှ ကိုယ့်ဆရာတွေနဲ့ တိုင်ပင်ကြည့်တာပေါ့။ ဟုတ်ပြီလား။ “

သည့်နောက်တော့ ရောက်တတ်ရာရာ ပြောဆိုကြပြီး အချိန်တန် အိမ်ပြန် လမ်းခွဲရန် နှုတ်ဆက်ကြရလေတော့သည်။

ရီချို(ဆေး ၁)