ခြေဆီမထွက်တဲ့အခါ

ဆောင်းတွင်းရောက်လာပြီဆိုရင် အချို့သူတွေမှာ ခြေဆီမထွက်တဲ့အတွက် ခြေထောက်တွေခြောက်ကာ အက်ကွဲလာပြီး စိတ်အနှောက်အယှက်ဖြစ်ရတတ်ပါတယ်။ အချို့ဆိုရင် အကွဲလွန်ပြီး နာလာကာလမ်းမလျှောက်နိုင်တာတွေ၊ သွေးထွက်လာတဲ့အတွက်စပ်ပြီးပိုးဝင်တာတွေရှိလာတတ်ပါတယ်။ ဒါဟာ ဘာကြောင့်လဲ၊ ဘယ်လိုကာကွယ်ကြမလဲဆိုတာလေးတွေကိုတင်ပြလိုက်ပါတယ်။

ဆောင်းတွင်းအေးလာတဲ့အခါ သွေးလည်ပတ်မှုလည်းနှေးကွေးသွားတတ်ပါတယ်။ ဒီအခါမှာ ခြေထောက် အထူးသဖြင့် ခြေဖနောင့်နဲ့ခြေဖဝါးမှာ သွေးစီးဆင်းမှုနှေးကွေးနည်းပါးသွားပြီး ခြောက်ကပ်လာပါတယ်။အထူးသဖြင့် သံမံတလင်း၊ ကြွေပြားအစရှိတဲ့ အေးစက်စက်အရာဝတ္ထုတွေပေါ်မှာ ဖိနပ်မပါဘဲ အချိန်ကြာကြာအလုပ်လုပ်ရသူတွေမှာလည်းအဖြစ်များပါတယ်။

နာတာရှည်ရောဂါသည်များနဲ့ ဆီးချိုသည်များမှာတော့ ခြေဆီမထွက်လို့ခြေထောက်အက်ကွဲတအြခါ အထူးပိုမိုဂရုစိုက်ရပါတယ်။ သူတို့မှာခြေထောက်ခြောက်သွေ့အက်ကွဲရင် အခြားသူတွေထက်ပျောက်ဖို့ပိုကြာတတ်သလို ပိုးဝင်ခြင်းအစရှိသော နောက်ဆက်တွဲအကျိုးဆိုးများလည်းဖြစ်လာနိုင်ပါတယ်။

ခြေဆီမထွက်လို့ခြေထောက်ကွဲအက်ခြင်းကိုသက်သာစေဖို့ကတော့ အေးသောနေရာများကိုသွားလာမယ်ဆိုပါက ခြေအိတ်ဝတ်ပါ သို့မဟုတ် ဖိနပ်လုံလုံစီးပါ။ ခြောက်သွေ့ကွဲအက်သောခြေဖဝါးနဲ့ ခြေဖနောင့်ကို အလှဆီ(glycerin)လိမ်းပါ၊ သဘာဝနည်းတစ်ခုဖြစ်တဲ့ ငှက်ပျောသီးမှည့်အခွံကိုအုပ်ပေးခြင်းလည်းပြူလုပ်နိုင်ပါတယ်။ အစားအသောက်အနေနဲ့ကတော့ သွပ်ဓာတ်(Zinc)၊ ဗီတာမင်အီး(Vitamin E)၊ Omega 3အဆီဓာတ်ပါသောအစားအစာများကို စားပေးခြင်းအားဖြင့်သက်သာစေနိုင်မှာပဲဖြစ်ပါတယ်။

မေတ္တာဖြင့်
စိုင်းမြတ်သူ